ރައީސް އަބްދުﷲ ޔާމީންގެ ވެރިކަމުގައި ރޫޅާލި ކަޅުވަކަރު މިސްކިތް މިހާރު ބަހައްޓަން ކަނޑައަޅާފައިވާ ތަނާމެދު ދީނީ ބައެއް އިލްމުވެރިން ކަންބޮޑުވުން ފާޅުކުރައްވާފައިވާތީ، އެކަމާމެދު ވިސްނައި މަޝްވަރާ ކުރަމުންދާ ކަމަށް ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެ އެވެ. 

ވިންޓަރ ޕާކެއް ހެދުމަށް ނެގި 200 އަހަރުވެފައިވާ ހިރިގަލުގެ މިސްކިތް އަލުން ބެހެއްޓުމަށް ހަމަޖައްސާފައިވަނީ ޗާންދަނީ މަގާއި މެދު ޒިޔާރަތް މަގު ގުޅޭ ކަންމަތީގަ (ކުރިން ދިރާގު އިމާރާތް ކަންމަތި) އެވެ. އިސްލާމީ މަރުކަޒުގެ އުތުރު ފަރާތުގެ ދޮރާ ދިމާވާ ގޮތަށް ކަޅުވަކަރު މިސްކިތް ބަހައްޓާތީވެ، ރައީސް އަބްދުﷲ ޔާމީންގެ ރަނިން މޭޓަކަށް ވެސް ހުންނެވި އިސްލާމިކް ޔުނިވާސިޓީގެ ކުރީގެ ޗާންސެލަރު ޑރ. މުހައްމަދު ޝަހީމް ވިދާޅުވި މިސްކިތެއްގެ ދޮރުމަތީ މިސްކިތެއް ބެހެއްޓުމަކީ ރަނގަޅު ކަމެއް ނޫން ކަމަށެވެ. 

ކީރިތި ރަސޫލާގެ ހަޔާތްޕުޅުގައި ވެސް މިސްކިތެއްގެ ދޮރުމަތީ މިސްކިތެއް އެޅުން ވަނީ މަނާކުރައްވާފައި ކަމަށް ޑރ. ޝަހީމް ވިދާޅުވި އެވެ. 

ކަޅުވަކަރު މިސްކިތް ބަހައްޓަނީ އެތަނުގައި ނަމާދު ނުކުރެވޭ ގޮތަށް ކަމަށްވާ ނަމަ އަދި ތަރައްގީގެ ގޮތުން ހުންނަ އިމާރާތެއްގެ ގޮތުން ނަމަ މިހާރު ކަނޑައަޅާފައިވާ ތަނުގައި ބެހެއްޓުން މައްސަލައެއް ނޫން ކަމަށް އޭނާ ވިދާޅުވި އެވެ. 
 

ކަޅުވަކަރު މިސްކިތް އަލުން ބެހެއްޓުމުގެ ކަންކަމުގައި މިއަދު އިލްމުވެރިން ޚިޔާލު ފާޅުކޮށް ގައުމި ފެންވަރުގައި މަޝްވަރާ ކުރެވޭތީ އަޅުގަނޑު އުފާކުރަން. އިލްމުވެރިންގެ ކަންބޮޑުވުންތަކާމެދު އަދުގެ ސަރުކާރުން ގެންދަނީ ވިސްނައި މަޝްވަރާކުރަމުން ކަމަށް ޔުމްނާ ވިދާޅުވި އެވެ. "ކަޅުވަކަރު މިސްކިތަކީ ދިވެހި އިސްލާމީ ތާރީޚް ދައްކުވައިދޭ މުހިންމު ބިނާއެއް. ދިވެހިން އެ މިސްކިތުގައި ނަމާދުކުރާތާ 200 އަހަރަށް ވުރެ ގިނަ ދުވަސްވެއްޖެ. މައްސަލައަކަށްވީ ކުޅޭ ތަނެއް ހަދަން އެފަދަ މިސްކިތެއް ނެގިގެން ދިއުން،" އޭނާ ވިދާޅުވި އެވެ. 

ކުރީގެ ރައީސް ޔާމީންގެ ވެރިކަމުގައި ކަޅުވަކަރު މިސްކިތް 2016 ވަނަ އަހަރުގެ މެއި 8 ވަނަ ދުވަހު ވަނީ ރޫޅާލާފައެވެ. އެއަށްފަހު މިސްކިތް ހުރި ސަރަހައްދުގައި ރައީސް ޔާމީން ހެދީ ކުޑަކުދިން ކުޅެ މަޖާކޮށް ހެދުމަށް ވިންޓަރ ޕާކެކެވެ.