ކިނޮޅަހަށް އުދަ އަރަނީ
3 ޖެނުއަރީ 2019 | ބުރާސްފަތި 22:53ރަށު ތެރެއަށް ވަރަށް ބޮޑަށް ވަނީ ރާޅު އަރާފައި
ކިނޮޅަހަށް އުދަ އަރަނީ
ރ.ކިނޮޅަހަށް ވަރަށް ބޮޑަށް އުދައަރަން ފަށައިފިއެވެ.
ރާއްޖެއެމްވީއަށް މައުލޫމާތު ދެއްވަމުން ކިނޮޅުހުގެ ކައުންސިލްގެ ރައީސް އަހުމަދު ހުސެއިން ވިދާޅުވީ ކޮންމެ އަހަރެއްގެ އިރުވައި މޫސުމުގައި އެރަށަށް އުދައަރާ ކަމަށާއި، މިފަހަރު މާބޮޑަށް ރަށު ތެރެއަށް އުދަ އަރަމުން އަންނަ ކަމަށެވެ. އެގޮތުން ބުރާސްފަތި ދުވަހުގެ ރޭ ބަނދަރު ސަރަހައްދުން ވަރަށް ބޮޑަށް ރާޅު އަރާފައިވާ ކަމަށާއި، 70 ފޫޓާއި 100 ފޫޓުގެ ދެމެދަށް ރަށު ތެރެއަށް ކޯރު ހެދިފައިވާ ކަމަށް ހުސެއިން ވިދާޅުވިއެވެ.
ބަނދަރު ހަދާފައިވާ ގޮތުން އުދައެރުމުގެ ފުރުސަތު ބޮޑުކަން ފާހަގަކުރައްވައި ހުސެއިން ވިދާޅުވީ ބަނދަރަށް ފަސްއެޅި ތިލަވާ މައްސަލައަށް އެރަށުގެ ރައްޔިތުން ހައްލު ހޯދުމަށް މަސައްކަތް ކުރާތާ 7 އަހަރަށް ވުރެ ގިނަ ދުވަސް ވެފައިވާ ކަމަށާއި، ކައުންސިލުން ވެސް ކަމާބެހޭ މުއައްސަސާތަކުގެ ސަމާލުކަމަށް މިމައްސަލަ ގެނެސްފައިވާ ކަމަށެވެ. ނަމަވެސް ކުރީގެ ރައީސް ޔާމީންގެ ވެރިކަމުގައި ވެސް މިމައްސަލައަށް ދާއިމީ ހައްލެއް ހޯދައިދީފައި ނުވާ ކަމަށް އޭނާ ވިދާޅުވިއެވެ.
"އިރުވާ މޫސުމުގަ ބަނދަރު ޚާއްސަކޮށް ގަދަވާނެ. ގަދަވީމަ ފަސްއެޅި ތިލަވާނެ. އޮޑިދޯނި ފަހަރު ނުބޭއްވޭނެ ބަނދަރުގައެއް. ޔާމީންގެ ސަރުކާރުން އެއްފަހަރު މިމައްސަލަ ދިމާވެގެން ބަނދަރު ފުން ކޮށްދިން. ދާއިމީ ހައްލެއް ނުހޯދަދޭ." ހުސެއިން ވިދާޅުވިއެވެ.
މީގެ އިތުރުން ހުސެއިން ވިދާޅުވީ ލަފާފުރުމުގައި ދަތިކަމަކީ އެރަށުގެ ރައްޔިތުންނަށް މިހާރު ކުރިމަތިވަމުން އަންނަ އެންމެ ބޮޑު މައްސަލަ ކަމަށާއި، މޫސުން ގޯސްވެ، ގަދަވެއްޖެ ނަމަ އަތޮޅު ފެރީގެ ޚިދުމަތް ވެސް ނުލިބޭ ކަމަށެވެ. އޭނާ ވިދާޅުވީ ރަށުގެ އޮޑިދޯނި ފަހަރު ބާއްވަން ޖެހެނީ ކައިރި އެހެން ރަށްރަށުގެ ބަނދަރުގައި ކަމަށާއި، ނުވަތަ ރަށުގެ ދެކުނު ފަރާތުގައި ކަމަށެވެ. އަދި ވިދާޅުވީ މިއީ އޮޑިވެރިންގެ ވަރަށް ބޮޑު ކަންބޮޑުވުމެއް ކަމަށާއި، ރަށުގެ ރައްޔިތުން އުފަލަމުންދާ ތަކުލީފެއް ކަމަށެވެ.
ހުސެއިން ވިދާޅުވީ ރަށަށް އުދައެރުމުން އާންމު މުދަލަށް ގެއްލުންވާ ކަމަށާއި، ބައެއް އޮޑިފަހަރުތަކަށް ވެސް ގެއްލުން ވެފައިވާ ކަމަށެވެ.
