2018 ވަނަ އަހަރަކީ ރާއްޖޭގެ ތާރީހު ބަދަލު ކުރި އަހަރެއް: ރައީސް ނަޝީދު
1 ޖެނުއަރީ 2019 | އަންގާރަ 14:02އެމްޑީޕީގެ މެނިފެސްޓޯ އަކީ ސިޔާސީ ވެރިން ރައްޔިތުންނަށް ދަރާފައިވާ ދަރަނީގެ ބޮޑު ލިސްޓެއް
ރައީސް މުހައްމަދު ނަޝީދު، ކެމްޕޭން އިވެންޓުގައި ވާހަކަދައްކަވަނީ
ނިމިގެން ދިޔަ 2018 ވަނަ އަހަރަކީ ރާއްޖޭގެ ތާރީހު ބަދަލު ކޮށްލި އަހަރެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ވިލުފުށި ދާއިރާގެ ޕްރައިމަރީ އަށް ކުރިމަތިލާފައިވާ ހަސަން އަފީފްގެ ކެމްޕޭނު ލޯންޗު ކުރުމުގެ ހަފްލާގައި ވާހަކަ ދައްކަވަމުން ރައީސް ނަޝީދު ވިދާޅުވީ، ނިމިގެން ދިޔަ އަހަރު ދިވެހި ރައްޔިތުން ވަނީ ބީވެގެން ދިޔަ ޑިމޮކްރެސީ އަނބުރާ ރާއްޖެ ގެނެސްފައިވާ ކަމަށެވެ. އަދި ރާއްޖޭގެ ތާރީހު ބަދަލު ކޮށްލީ ހުދުމުހުތާރު ވެރިކަމެއް ކުރަމުންދިޔަ ކުރީގެ ރައީސް ޔާމިންގެ ވެރިކަން ރައްޔިތުން ނިކުމެ ބަދަލު ކޮށްލި ހިސާބުން ކަމަށް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، ރައްޔިތުން ވެރިކަން ބަދަލު ކޮށްލީ ފޮނި އުއްމީދުތަކަކާއި އެކު ކަމަށާއި އެކަން އެމްޑީޕީން ހަދާން ނައްތައި ނުލާ ކަމަށެވެ.
ސަރުކާރުން ވެފައިވާ ވައުދުތައް ފުއްދުމަށް އެޕާޓީން މަސައްކަތް ކުރާނެ ކަމަށް ވެސް އެމަނިކުފާނު ވިދާޅުވިއެވެ.
'' ރައީސް ސޯލިހުގެ ވައުދު ތަކަކީ ރަނުން ރަނަށް އަކުރުން އަކުރަށް ފުއްދައިދޭނެ ވައުދު ތަކެއް '' ނަޝީދު ވިދާޅުވިއެވެ.
މީގެއިތުރުން ނަޝީދު ވިދާޅުވީ، ރައްޖޭގެ ރައްޔިތުންނަށް ބޯހިޔާވަހިކަން ހޯދައި ދިނުމަކީ ސިޔާސީ ލީޑަރުންގެ ބޮލުގައި އެޅިފައިވާ ދަރަންޏެއް ކަމަށެވެ. އެގޮތުން އެމްޑީޕީގެ މެނިފެސްޓޯ އަކީ ސިޔާސީ ވެރިން ރައްޔިތުންނަށް ދަރާފައިވާ ދަރަނީގެ ބޮޑު ލިސްޓެއްކަމަށާއި އެމްޑީޕީން ދަރަނި އަދާކުރާނެ ކަމަށް އެމަނިކުފާނު ވިދާޅުވިއެވެ.
''ރައީސުލް ޖުމްހޫރިއްޔާގެ ޒައާމަތުގައި ދިވެހި ސަރުކާރުން އެ މަސައްކަތްތައް ހިންގާނެ. އަދި އިރާދަ ކުރެއްވިއްޔާ އެ މަސައްކަތްތަކުގެ ކާމިޔާބު ތިޔަ ބޭފުޅުންނަށް ފެނިގެންދާނެ '' ނަޝީދު ވިދާޅުވިއެވެ.
