މާ ގިނަ ދުވަހެއް ނުވެއެވެ. އާރު ދައްކައިގެން، ނާރު އަރުވާފައި ވާހަކަ ދެއްކީ އިހަށް ދުވަހުއެވެ. ބާރު ދައްކައި، ގުންފައި ޖަހާފައި ހިނގީ ހަމަ މިދާކަށް ދުވަހުއެވެ. ބޮޑާ ކަމާއި މޮޅުކަން ދެއްކުމަށް، ބޮޑު ގޮނޑިއަށް ވެޑުވިގެން އިނދެ، ވާހަކަ ދެއްކި އިރު މި ނޫން ދުވަހެއް އަންނާނެ ކަމެއް ނޭނގޭ ކަހަލައެވެ. ޒަމާނެއް ކޮޅުން ވެސް ނުދެކޭ ދުވަސްތަކެއް، ފާއިތުވެގެން ދިޔައީ އެމަނިކުފާގެ ވެރިކަމުގައެވެ.
އެކަން ހަނދާން ނެތޭހާ ދުވަހެއް ނުވެއެވެ. އަނިޔާގެ ފާރު ނުހިކި، އެސްފިޔަ ޖަހާ ނުލެވި އުޅެނިކޮށް، އެއްކަލަ ޕާޓީގެ މީހުން އެ ވާހަކަ ގޮވަން ފަށައިފިއެވެ. ދައުލަތް ދަރަނިވެރި ކުރުވި ވާހަކައެވެ. ސިޔާސީ މަގާމުތަކުން ދައުލަތް މަތިބަރު ވި ވާހަކައެވެ. އިންސާފެއް ނެތް ވާހަކައެވެ. އަނިޔާވެރިކަމުގެ ވާހަކައެވެ.
އެކަމަކު އެ ވަރު ކުރާކަށް ނުވާނެއެވެ. އެމަނިކުފާނުގެ ބާރާއި އާރު ގެއްލި ދިޔަތާ މިވީ އެންމެ 36 ދުވަހެވެ. ސާޅީސް ވެސް އަދި ހަމަ ނުވެއެވެ. އެ ވަރު މަލާމާތެއް ކުރަން ހެޔޮވާނެތޯއެވެ؟ އަޑު އަޑު ނަގައި، ރާގު ރާގަށް އެ ގޮވެލިތައް އެމަނިކުފާނަށް އެ ރައްދު ކުރަނީ ހަމަ އެކަނިކުފާނުގެ ޕާޓީގެ ދޮރުމަތީގައި ތިބެއެވެ؟ މާ ދުރުނޫން ހިސާބެއްގައި އެމަނިކުފާނުގެ ގެކޮޅު ވެސް އެބަ ހުއްޓެވެ؟ ގައިމު އަޑުވެސް އިވޭނެތާއެވެ!
އެ މީހުން ގޮވީ ދައުލަތް ދަރަނިވެރިކޮށް، ކޮންމެ ދިވެއްސެއްގެ ބޮލަކަށް ޖެހޭ ދަރަނި ދޮޅު ލައްކައަށް އެރި ވާހަކައެވެ. އެމަނިކުފާނުގެ ވެރިކަމުގައި މަޖިލީހުގެ ރުހުމަކާ ނުލައި، ލޯނު ނެގި ވާހަކައެއް ނޮގޮވައެވެ. އެ ވާހަކަ ގޮވަން ހަނދާން ނެތުނީ ކަމަށް ވެދާނެއެވެ. އެމަނިކުފާނުގެ އެކުވެރިންނަަށް ދައުލަތުގެ ނިޝާން ޖަހައި، ސޮވެރިން ގެރެންޓީ ދިން ވާހަކައެއް ވެސް ނޮގޮވައެވެ. އެ ލޯނުތަކުގެ ތަފްސީލެއް މަޖިލީހަށް ހުށަނާޅާ ވާހަކަ ބުނަން އުޅެނިކޮށް ދޫ އޮޅުނީ ކަމަށްވެދާނެއެވެ. އެ ވަރަށް އަޑުއުފުލުމުން އެހެން ވެދާނެއެވެ. ގައިގަ ހުރި ބާރެއް ލާފައި އަޑު އުފުލަން އުޅެނިކޮށް، ބޭރުގެ ދަރަނީގެ 70 ޕަސެންޓަކީ ޗައިނާއަށް ދައްކަންޖެހޭ ފައިސާ ކަން ނުބުނެވި، އަޑު ދިޔައީ ކަމަށްވެދާނެއެވެ.
މިއީ ކޮންހަލަ ސަޕޯޓަރުންނެއްތޯއެވެ؟ މި ހުރިހާ ކަމެއް އެނގިތިބި، އެމަނިކުފާނާ ދިމާލަށް ދަރަނި ބޮލޭ ގޮވަނީއެވެ. މި ސަޕޯޓަރުން ހިތެއް ނުފުރޭ ހެއްޔެވެ؟ ވެރިކަމުގައި ދިންހާ ފައިސާ އާއި ލައްޒަތުގައި އުޅެފައި އައިސް އެމަނިކުފާނަށް ފުރައްސާރަ ކުރަން ލަދު ނުގަންނަ ކަމެވެ. ތާއިދު ލިބޭނެ ކަމަށް ބަލައި، މިލިއަން ކުރި ހަރަދުގެ މުގާބިލުގައި އެވަރުގެ ޝަޒާއެއް ދޭން ހެޔޮވާނެތޯއެވެ؟
