އިންޑޮނީޝިއާއަށް ސުނާމީއެއް އަރައި 43 މީހުން މަރުވެއްޖެ
23 ޑިސެމްބަރު 2018 | އާދީއްތަ 05:22ދެ ރާޅެއް އަރާފައިވޭ
ސުނާމީ އަރާފައިވަނީ ސުންޑަ ސްޓްރެއިޓް ސަރަހައްދަށް
އިންޑޮނީޝިއާގެ ސުންޑަ ސްޓްރެއިޓް ސަރަހައްދަށް އެރި ސުނާމީއެއްގައި މަދުވެގެން 43 މީހުން މަރުވެ 584 މީހުން ޒަޚަމްވެއްޖެ ކަމަށް އެ ގައުމުގެ ސަރުކާރުން ބުނެފިއެވެ.
އެ ގައުމުގެ ޑިޒާސްޓަރ މެނޭޖްމަންޓް އޭޖެންސީން ބުނީ ދެ މީހަކު ގެއްލިފައިވާއިރު އެތައް ސަތޭކަ އިމާރާތެއް ހަލާކުވެފައިވާ ކަމަށެވެ.
އެ އެޖެންސީން ބުނީ ސުނާމީ އަރާފައި ވަނީ ކަރަކަޓޯއާ އަލިފާންފަރުބަދަ ގޮވައި ކަނޑުއަޑިން ބިންގަޑު ކަނޑައިގެން ގޮސްގެން ކަމަށް ބެލެވޭކަމަށެވެ.
ސުންޑަ ސްޓްރެއިޓަކީ ޖަވާއާއި ސުމަޓްރާ އާއި ދެމެދުން ޖާވާ ކަނޑާ އިންޑިއާ ކަނޑު ގުޅުވައިދޭ ކަނޑުއޮޅިއެވެ.
މީހުން މަރުވެފައިވާ ކަމަށް ރިޕޯޓްކޮށްފައި ވަނީ ޕަންޑެލަންގް، ސައުތު ލަމްޕަންގް އަދި ސެރަންގް ސަރަހައްދުންނެވެ.
ޑިޒާސްޓަރ މެނޭޖްމަންޓުން ބުނީ ބުރުހަމަ ހަނދެއްގެ ދުވަސްވަރު ހަނދުއަރައި އަދި ބޮޑުދިޔައިގެ ވަގުތަށް ވުމަކީ ރާޅުތަކުގެ ބާރު ގަދަވި ސަބަބެއްކަމުގައި ވެދާނެ ކަމަށެވެ. އެ އެ ޖެންސީން ވަނީ މަރުވި މީހުންގެ އަދަދު އިތުވެދާނެކަމުގެ އިންޒާރު ދީފައެވެ.
ދެ ރާޅެއް އަރާފައިވާއިރު ފުރަތަމަ ރާޅަށްވުރެ ބާރުގަދައީ ފަހުން އައި ރާޅުކަމަށް މަންޒަރު ދުށް މީހުން ވަނީ ބުނެފައެވެ.
ވޭތުވެދިިޔަ ދެ ތިންމަހު އަނަކް ކަރަކަޓޯއާ އަލިފާން ފަރުބަދަައިގެ ހަރަކާތްތައް ވަނީ އިތުރުވެފައެވެ.
އިންޑޮނީޝިއާގެ ޖިއޮލޮޖިކް އޭޖެންސީން ބުނީ ހުކުރު ދުވަހު ފަރުބަދަ ގޮވާފައިވާއިރު ފަރުބަދައިގެ ގޮވުން 12 ސިކުންތައް ދެމިގެންގޮސްފައިވާ ކަމަށާއި ފަރުބަދައިން އެރި ދުމާއަޅި 400 މީޓަރަށް އަރާފައިވާ ކަމަށެވެ.
އެ އޭޖެންސީން ވަނީ ފަރުބަދައާ ދެ ކިލޯމީޓަރަށްވުރެ ކައިރީގައި ނުތިބުމަށް އިލްތިމާސްކޮށްފައެވެ.
