ޕީޖީގެ އިތުބާރު ނެތް ކަމުގެ ވޯޓު ނުނަގައި މަޖިލިސް ބާއްވަން ތާއިދެއް ނުކުރަން: ޝާހު
21 ޑިސެމްބަރު 2018 | ހުކުރު 09:07ދައުރުން ބޭރުން ޖަލްސާއެއް ބާއްވަން ލީޑަރުން ވަނީ އެއްބަސްވެފައި
ފުވައްމުލަކު އުތުރު ދާއިރާގެ މެމްބަރު އަލީ ޝާހު
ޕްރޮސެކިއުޓަރ ޖެނަރަލް (ޕީޖީ) އައިޝަތު ބިޝާމުގެ އިތުބާރު ނެތް ކަމުގެ ވޯޓު ނުނަގައި، މަޖިލީހުގެ ދައުރުގެ ބޭރުން ޖަލްސާއެއް ބާއްވަން ތާއިދު ނުކުރައްވާ ކަމަށް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ (ޖޭޕީ) ޕާލަމެންޓްރީ ގްރޫޕުގެ މެމްބަރު އަލީ ޝާހު ވިދާޅުވެއްޖެއެވެ.
މިދިޔަ މަހުގެ ފަހުކޮޅު ޖޭޕީއާ ގުޅިވަޑައިގެންނެވި ފުވައްމުލަކު އުތުރު ދާއިރާގެ މެމްބަރު ޝާހު ކުރެއްވި ޓްވީޓެއްގައި ވިދާޅުވީ މަޖިލީހުގެ 12 މެމްބަރުންނަށް ބޭއިންސާފުން ނިންމުންނަށް ނިންމެވި މުއައްސަސާތަކުގެ ބޭފުޅުންގެ އިތުބާރު ނެތް ކަމުގެ ވޯޓު ނަގަން ތައްޔާރުވަމުންދާ ކަމަށެވެ. އަދި ބިޝާމްގެ އިތުބާރު ނެތް ކަމުގެ ވޯޓު މަޖިލީހުގައި ކުރިއަށް ނުގެންގޮސް، ދައުރުގެ މެދުތެރެއިން އެއްވެސް ޖަލްސާއެއް ބާއްވަން ތާއިދު ނުކުރައްވާ ކަމަށް ޝާހު ވިދާޅުވިއެވެ.
ޝާހު އެގޮތަށް ވިދާޅުވެފައި ވަނީ ސަރުކާރުން މަޖިލީހަށް ހުށަހަޅާފައިވާ ބިލުތައް ފާސްކުރުމަށް ދައުރުން ބޭރުން ޖަލްސާއެއް ބޭއްވުމަށް ގުޅިފައިވާ ޕާޓީތަކުގެ ލީޑަރުން އެއްބަސްވެ ވަޑައިގެންފައިވަނިކޮށެވެ. ސަރުކާރުގެ އަޣުލަބިއްޔަތު މަޖިލީހުގައި އޮވެ، ސަރުކާރުން ބޭނުންވާ ބިލުތައް ފާސްނުވެ މަޖިލިސް ޗުއްޓީއަށް ދިއުމުން، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ކަންބޮޑުވުން ފާޅުކުރައްވާފައެވެ.
