ޓާޓާ ފްލެޓުގެ ދޮރަކުން ބިއްލޫރިގަނޑެއްގެ ބައެއް ވެއްޓިއްޖެ
27 ޖުލައި 2017 | ބުރާސްފަތި 21:15މި ހާދިސާގައި އެއްވެސް މީހަކަށް އަނިޔާއެއް ނުވޭ
ޓާޓާ ފްލެޓުގެ ބިއްލޫރިގަނޑެއްގެ ބައެއް ވެއްޓިފައި
ކުރީގެ ޢަރަބިއްޔާ ސުކޫލް ހުރި ބިމުގައި އަޅާފައިވާ ޓާޓާ ފުލެޓްތަކުގެ މަގާއި ދިމާލަށް ހުރި ދޮރަކުން ބިއްލޫރިގަނޑެއްގެ ބައެއް ވެއްޓިއްޖެއެވެ.
ބިއްލޫރިގަނޑެއްގެ ބައެއް ވެއްޓިފައިވަނީ ޓާޓާ ފްލެޓްގެ ފުރަތަމަ ފަންގިފިލާގައި އިންނެވެ.
ފުލުހުންގެ މީޑިއާ އޮފިޝަލް ވިދާޅުވީ ޓާޓާ ފްލެޓްގެ ބިއްލޫރިގަނޑެއްގެ ބައެއް ވެއްޓިގެން ފުލުހުންނަށް ރިޕޯޓްކޮށްފައިވަނީ ބުރާސްފަތި ދުވަހުގެ ހަވީރުކަމަށާއި މި ހާދިސާގައި އެއްވެސް މީހަކަށް އަނިޔާ ނުވާކަމަށެވެ. އަދި ހައުސިންގ މިނިސްޓްރީގެ ފަރާތުން އެތަން އެއްކޮށް ސާފުކޮށް ނިންމާފައިވާކަމަށްވެސް ފުލުހުންގެ މީޑިއާ އޮފިޝަލް ވިދާޅުވިއެވެ.
ފުލެޓްގައި މަގާއި ދިމާލަށް ހުރި ދޮރުން ބިއްލޫރި ގަނޑެއްގެ ބައެއް ވެއްޓެން ދިމާވި ސަބަބު އަދިވަނީ ސާފުވާ ގޮތްނުވެފައެވެ.
ފްލެޓްތަކުގެ މަސައްކަތް އެއްކޮށް ނިންމި މީހުން އެތާނގައި ދިރިއުޅެން ފައްޓާފައިވަނީ މިއަހަރުގެ ޖޫން މަހުގައެވެ.
އެތަނުގައި ހުރި ރީޓެއިލް ފިހާރަތައް ފިޔަވައި، އެހެން ހުރިހާ ފްލެޓްތަކެއް އިންޑިޔާގެ ޓާޓާ ކުންފުނިން ދިވެހި ސަރުކާރާއި ޙަވާލުކޮށްފައި ވަނީ މިދިޔަ އަހަރުގެ އޭޕްރީލް މަހުގެ ތެރޭގައެވެ. އަރަބިއްޔާ ހުރި އިމާރާތުގައި 90 އެޕާޓްމަންޓް އަދި ގާކޮށި ހުރި އިމާރާތުގައި 198 އެޕާޓްމަންޓް ހިމެނެއެވެ. މިއިން ކޮންމެ އެޕާޓްމަންޓެއް ވެސް ހަދާފައިވަނީ ތިން ކޮޓަރި އާއި، ދެ ފާޚަނާ އާއި އަދި އެޓޭޗްކުރެވިފައިވާ ބަދިގެއެއް ހިމެނޭ ގޮތަށެވެ
