ފޮރިން މިނިސްޓަރު ޝާހިދު ޖަޕާނަށް ފުރާވަޑައިގެންފި
18 ޑިސެމްބަރު 2018 | އަންގާރަ 19:40ޖަޕާނުގެ ސަރުކާރުގެ އިސް އޮފިޝަލުންނާއެކު ބައްދަލުކުރައްވާނެ
ފޮރިން މިނިސްޓަރު އަބްދުﷲ ޝާހިދު
ރައީސް އިބްރާހިމް މުހައްމަދު ސޯލިހްގެ އަރިހުގައި އިންޑިއާއަށް ކުރެއްވި ދަތުރުފުޅަށްފަހު, ފޮރިން މިނިސްޓަރު އަބްދުﷲ ޝާހިދާ އެކު ދެ މިނިސްޓަރުން ޖަޕާނަށް ފުރާވަޑައިގެންފިއެވެ.
ފޮރިން މިނިސްޓަރު ޝާހިދު އަންގާރަ ދުވަހުގެ ރޭ ކުރެއްވި ޓްވީޓެއްގައި ވިދާޅުވީ ރައީސް ސޯލިހް އިންޑިއާއަށް ކުރެއްވި ރަސްމީ ދަތުރުފުޅުގައި އެމަނިކުފާނާ އެކު އެ ގައުމަށް ވަޑައިގަތުމަށްފަހު، ދިއްލީން ޖަޕާނަށް ފުރައިވަޑައިގެންފައިވާ ކަމަށެވެ.
އެމަނިކުފާނުގެ އަރިހުގައި އިކޮނޮމިކް މިނިސްޓަރ ފައްޔާޒް އިސްމާއީލާއި، ފިނޭންސް މިނިސްޓަރ އިބްރާހިމް އަމީރު ބައިވެރިވެވަޑައިގަންނަވައެވެ.
އެ ދަތުރުފުޅުގައި ޖަޕާނުގެ ސަރުކާރުގެ އިސް އޮފިޝަލުންނާ އެކު ބައްދަލުކުރައްވާނެ ކަމަށް މިނިސްޓަރު ޝާހިދު ވިދާޅުވިއެވެ.
މިއީ ވަޒީރުކަމާ ހަވާލުވެވަޑައިގަތްފަހު މިނިސްޓަރ ޝާހިދު ވަޑައިގަންނަވާ ތިން ވަނަ ޤައުމެވެ. އެގޮތުން މަޤާމާ ހަވާލުވެވަޑައިގަތުމަށްފަހު އެންމެ ފުރަތަމަ ވެސް އިންޑިއާއަށް އެމަނިކުފާނު ވަޑައިގެންނެވިއެވެ. އަދި އެއަށްފަހު ޔުނައިޓެޑް އަރަބް އެމިރޭޓްސްއަށް ވަޑައިގެންނެވިއެވެ.
މިނިސްޓަރު ޝާހިދު އިންޑިއާއަށް ކުރެއްވި ފުރަތަމަ ދަތުރުފުޅުގައި ވެސް މިނިސްޓަރު ފައްޔާޒާއި މިނިސްޓަރު އަމީރު ބައިވެރިވެވަޑައިގެންނެވިއެވެ.
