ރާއްޖޭގެ އެންމެ ޒަމާންވީ ޓޫރިސްޓް ހޮޓާ ކަމަށްވާ ނަސަންދުރަ ޕެލެސް ހުރި ބިމުގައި ޒަމާނީ ފެންވަރަށް ހޮޓަލެއް ތަރައްގީ ކުރަން ބަޔަކާ ހަވާލުކުރީ ކޮރަޕްޝަނަށް މަގުފަހިވާ ގޮތަށް ކަމަށް ބުނާ މައްސަލަ އެންޓި ކޮރަޕްޝަން ކޮމިޝަން(އޭސީސީ)އިން އަލުން ދިރާސާ ކުރަން ފަށައިފި އެވެ.

ނަސަންދުރަ ހުރި ބިން، އިތުރު ބިމަކާ އެކު 50 އަހަރަށް ކުއްޔަށް ދޫކުރީ 2015 ވަނަ އަހަރުގެ ތެރޭގަ އެވެ.

އޭސީސީން އަލުން މައްސަލަ ބަލަން ފަށާފައި ވަނީ ޕްރޮސެކިއުޓަރ ޖެނެރަލުން އަނބުރާ އެ މައްސަލަ އެކަމިޝަނަށް ފޮނުވާފައި ވަނިކޮށެވެ. އަނބުރާ އެ މައްސަލަ ޕީޖީން އޭސީސީއަށް ފޮނުވާފައި ވަނީ ސައްހަ އެއްބަސްވުމެއް ކަމަށާއި އެ މައްސަލައިގައި ތުހުމަތުކުރެވޭ ފަރާތްތަކުގެ މައްޗަށް ދައުވާ ކުރެވިދާނެ ކަމަށް ނުފެންނަ ކަމަށާއި، ދަޢުވަ ކުރާނެ އަސާސެއް އޮތް ކަމަށް ނުފެންނަ ކަމަށް ބުނެއެވެ. އެ މައްސަލަ އަނބުރާ އޭސީސީއަށް ފޮނުވާލީ 14 އޮގަސްޓް 2018ގައި އެވެ.

" އެ އެއްބަސްވުމުގެ ދަށުން މިނިސްޓްރީ އޮފް ޓޫރިޒަމް އިން ނަސަންދުރަ ޕެލަސް ހޮޓެލް ކުއްޔަށްދޫކޮށްފައިވަނީ ޤާނޫނު ނަންބަރު 99/2 (ދިވެހިރާއްޖޭގެ ޓޫރިޒަމާބެހޭ ޤާނޫނު) ގެ 5ވަނަ މާއްދާއާ ޚިލާފަށް ނޫންކަމަށް އެޓަރނީ ޖެނެރަލްގެ އޮފީހުން މިނިސްޓްރީ އޮފް ޓޫރިޒަމަށް ލަފާދެއްވާފައިވާތީއާއި، އެމް.އެމް.ޕީ.އާރް.ސީ އިން ނަސަންދުރަ ޕެލަސް ހޮޓެލް ކުއްޔަށްދިނުމުގައި ސީ.އެސް.އާރް ކޮމްޕޮނަންޓް ހިމެނުމުގެ އިތުރުން، އެއްބަސްވުމުގައި ސޮއިކުރިއިރު ލީސް އެކުއިޒިޝަން ކޮސްޓް ނަގަންޖެހޭކަން ބަޔާންކޮށްދޭ އެއްވެސް ޤާނޫނެއް ނުވަތަ ޤަވާޢިދެއް ނުވަތަ އުސޫލެއް އޮތްކަން ތަޙްޤީޤުން އެނގެން ނެތަތީ، މިމައްސަލައިގައި ތުހުމަތުކުރެވޭ ފަރާތްތަކުގެ މައްޗަށް ދަޢުވާކުރެވިދާނެކަމަށް ނުފެންނަކަމަށާއި، ދަޢުވަކުރާނެ އަސާސެއް އޮތްކަމަށް ނުފެންނަކަމަށް ބަޔާންކޮށް، 14 އޮގަސްޓް 2018ގައި ޕްރޮސިކިއުޓަރޖެނެރަލްގެ އޮފީހުން ވަނީ މިމައްސަލަ އަނބުރާ މިކޮމިޝަނަށް ފޮނުވާފައެވެ. " އޭސީސީން ބުނެއެވެ.

ނަސަންދުރަ ބިން ޒަމާނީ ފެންވަރަށް ތަރައްގީ ކުރަން ހަވާލުކޮށްފައި ވަނީ ކުރީގެ ރައީސް އަބްދުﷲ ޔާމީންގެ ޅިޔަން ބޭފުޅެއް ކަމަށްވާ މުހައްމަދު މަނިކު (އެއްލައިދޫ މަނިކު)ގެ ހިއްސާ އޮންނަ އެންޕީއެޗް އިންވެސްޓްމަންޓްސްއަށެވެ. އެ ކުންފުނިން ވަނީ އެ ހޮޓެލް ތަރައްގީ ކުރުމަށް ސްރީލަންކާގެ ކުންފުންޏާއެކު އެއްބަސްވުމެއްގައި ސޮއިކޮށްފައެވެ.

އެމްއެމްޕީއާރުސީގެ ހިޔާނާތުގެ މައްސަލައިގައި އޮޑިޓަރ ޖެނެރަލް ތައްޔާރުކުރެއްވި ހާއްސަ އޮޑިޓްގައި ބުނެފައިވާ ގޮތުގައި ކުރިން އޮތް ނަސަންދުރައިގެ އެއްބަސްވުން ޓޫރިޒަމް މިނިސްޓްރީން 2015 ވަނަ އަހަރުގެ ޖެނުއަރީ 27 ގައި ބާތިލްކޮށް، ހަމަ އެ ދުވަހު ނަސަންދުރައިގެ ބިމާއި އެތަނާ ޖެހިގެން ކުރިން އައިލެންޑް އޭވިއޭޝަން ސަރވިސަސް ހިންގި ހ. އޯކިޑް ލޮޖްގެ ބިން ވެސް އެމްއެމްޕީއާރުސީއަށް ދިނުމުގެ އެއްބަސްވުމުގައި ޓޫރިޒަމް މިނިސްޓްރީން ސޮއިކުރިއެވެ.

އޭރުގެ ޓޫރިޒަމް މިނިސްޓަރގެ އަތުން ދައުލަތަށް ލިބުނު ގެއްލުންކަމަށްވާ 4.8 މިލިއަން އެމެރިކާ ޑޮލަރު ހޯދުމަށް، 19 މާރިޗު 2018ގައި މިނިސްޓްރީ އޮފް ޓޫރިޒަމްއަށް އޭސީސީން ވަނީ އަންގާފައެވެ.