މާކުރަތު ޖަނަރޭޓަރަށް ދިމާވެފައިވާ މައްސަލަ ހައްލު ކުރުމަށް ދަނީ މަސައްކަތް ކުރަމުން: ފެނަކަ
ކަރަންޓަށް ހައްލު ނުގެނެސްފިނަމަ ފެނަކަ އޮފީސް ބަންދުކުރާނަން
ރ. މާކުރަތު، ޖަނެރޭޓަރަށް މައްސަލަ ދިމާވެ އެކަށީގެންވާ ގޮތުގައި ހިދުމަތް ނުދެވޭ
ރ. މާކުރަތު ޖަނަރޭޓަރަށް ދިމާވެފައިވާ މައްސަލަ ހައްލު ކުރުމަށްޓަކައި މިހާރުވެސް މަސައްކަތް ކުރަމުންދާ ކަމަށް ފެނަކަ ކޯޕަރޭޝަނުން ބުނެފިއެވެ.
ފެނަކައިން ނެރުނު ބަޔާނެއްގައި ބުނެފައިވަނީ މާކުރަތުގެ ކަރަންޓްގެ ހާލަތު އާންމު ހާލަތަކަށް ގެނެވެންދެން މަތީ ލޯޑް ނަގާ އިލެކްޓްރޯނިކް އާލަތްތައް ވީހާވެސް މަދުން ބޭނުން ކުރެއްވުމާއި ކަރަންޓް ބޭނުން ކުރެވެމުންދާ މިންވަރު ވީހާވެސް މަދު ކުރެއްވުމަށް ރައްޔިތުންނަށް އިލްތިމާސް ކުރާ ކަމަށެވެ.
ރ. މާކުރަތު ބްރާންޗްގައި އެ ކުންފުނީގެ ފަރާތުން ކަރަންޓުގެ ޚިދުމަތް ފޯރުކޮށްދެމުންގެންދާ އިންޖީނުތަކުގެ ތެރެއިން 160 ކިލޯވޮޓްގެ ޖަނަރޭޓަރަށް ދިމާވި މައްސަލައަކާއި ގުޅިގެން މުޅި ރަށަށް ކަރަންޓު ފޯރުކޮށްދެމުން މިވަގުތު މިގެންދަނީ 80 ކިލޯވޯޓްގެ 2 ޖަނަރޭޓަރަކުން ކަމަށް ފެނަކައިން ވަނީ ބުނެފައެވެ. އަދި މި 2 ޖަނަރޭޓަރަކީ މުޅިރަށަށް ކަރަންޓު ދެވޭވަރަށްވުރެ ކުޑަ ޖަނަރޭޓަރ ތަކަކަށްވުމުން މުޅިރަށަށް އެއްފަހަރާ ކަރަންޓު ދިނުމުގައި މައްސަލަ ދިމާވަމުން ދާތީ 160 ކިލޯވޮޓްގެ ޖަނަރޭޓަރުގެ މަރާމާތުގެ މަސައްކަތް ނިންމާ އާންމު ހާލަތަށް ގެނެވެންދެން ރަށުގެ އެކި ސަރަހައްދުތަކުން ދޭތެރެ ދޭތެރެއިން ކަރަންޓު ކެނޑެމުންދާނެ ކަމަށްވެސް ފެނަކަ ކުންފުނިން ބުންޏެވެ.
އެހެންކަމުން މިކަމާއި ގުޅިގެން ދިމާވެދާނެ އެންމެހާ ދަތިތަކަށް ރައްޔިތުންގެ އަރިހުން ނިހާޔަތަށް މައާފަށް އެދޭ ކަމަށާއި، އަދި މާކުރަތު ރައްޔިތުންގެ ފަރާތުން ލިބެމުންދާ އެއްބާރުލެއްވުމާއި ކެތްތެރިކަމަށްޓަކައި އެ ކުންފުނިން ޝުކުރު ދަންނަވާ ކަމަށްވެސް މިބަޔާނުގައި ބުނެފައިވެއެވެ.
އަދި ކަރަންޓު ކެނޑުމުގެ މައްސަލަޔަށް އެކަށީގެންވާ ހައްލެއް 24 ގަޑި އިރު ތެރޭގައި ނުގެނެސްފިނަމަ، ރައްޔިތުން ނިކުމެ ފެނަކަ އޮފީސް ބަންދުކުރަން ނިންމާފައިވާ ކަމަށްވެސް ރ.މާކުރަތު ކައުންސިލުން ވަނީ ބުނެފައެވެ.
ރާއްޖެއެމްވީއަށް މައުލޫމާތު ދެއްވަމުން މާކުރަތު ކައުންސިލްގެ ރައީސް ހަސަން އަލީ ވިދާޅުވީ އެރަށަށް ކަރަންޓުގެ ކުއްލި ކުއްލިއަށް ކެނޑޭ މައްސަލައަކީ ހައްލު ނުކުރެވިފައިވާ ބޮޑު މައްސަލަ އެއް ކަމަށާއި، މިމައްސަލައަށް ދޮޅު އަހަރަށް ވުރެ ގިނަ ދުވަސްވެފައިވާ ކަމަށެވެ.
ހަސަން ވިދާޅުވީ ކަރަންޓަށް މައްސަލަ ދިމާވުމުން ކޮންމެ ފަހަރަކު ވެސް ގެންނަނީ ވަގުތީ ހައްލު ކަމަށާއި، ނަމަވެސް މިވަގުތީ ހައްލުގެ ސަބަބުން ރައްޔިތުންނަށް ލިބެނޭ ބޮޑެތި ގެއްލުން ކަމަށެވެ. އެގޮތުން ރައްޔިތުން އެކި ފަހަރު މަތިން ޝަކުވާ ހުށަހެޅުމުންވެސް ކަރަންޓުގެ މައްސަލައަށް ދާއިމީ ހައްލެއް ގެނެވެފައި ނުވުމުގެ ސަބަބުން ރައްޔިތުން ވަނީ ހޮނިހިރު ދުވަހުގެ ރޭގަނޑު އިންޖީނުގެ ކައިރީގައި އަޑު އުފުލާ ނުރުހުން ފާޅުކޮށް 24 ގަޑި އިރު ތެރޭގައި މައްސަލައަށް އެކަށީގެންވާ ހައްލެއް ނުގެނެސްފިނަމަ ފަނަކަ އޮފީސް ބަންދު ކުރާނެކަމަށް ބުނެފައެވެ.
ކައުންސިލްގެ ރައީސް އިތުރަށް ވިދާޅުވީ ރައީސް ޔާމީންގެ ސަރުކާރުގައި ކަރަންޓުގެ މައްސަލައަށް ހައްލު ހޯދުމަށް ގިނަ މަސައްކަތްތަކެއް ކުރި ކަމަށާއި، ނަމަވެސް އެ އިރު ފެނަކައިން އެއްވެސް އެއްބާރުލުމެއް ދީފައި ނުވާ ކަމަށެވެ.
އައު މެނޭޖަރާއި އިންޖީނުގެ ހަވާލުކުރުމުން ކަރަންޓު ކެނޑުމުގެ މައްސަލަ އިތުރައް ދިމާވަމުން އަންނަ ކަމަށާއި އިންޖީނުގެއަށް ގަސްތުގައި އޭނާ ގެއްލުން ދީފައިވާކަމަށް ގިނަ ބަޔަކު ތުހުމަތުކުރާކަމަށް ކައުންސިލްގެ ރައީސްވަނީ ވިދާޅުވެފައެވެ. އަދި މިހާރު އިންޖީނުގޭގައި ވަޒީފާ އަދާކުރާ އިސްފަރާތަކީ ސިޔާސީ ނުފޫޒުން ރައީސް ޔާމިންގެ ސަރުކާރުގައި ދިން މަގާމެއް ކަމަށާއި އޭނާއަށް މަގާމުގެ މަސްއޫލިއްޔަތު ރަނގަޅަށް އަދާ ނުކުރެވޭ ކަމަށް ހަސަން ވަނީ ވިދާޅުވެފައެވެ.
މާކުރަތަކީ 1331 މީހުންގެ އާބާދީއެއް އޮންނަ ރަށެކެވެ.
