ވާވޭ މޭޓް 20 އަދި 20 ޕްރޯ ފޯނު ދިރާގުން ލޯންޗުކޮށްފި

ވާވޭގެ އެންމެ ފަހުގެ ފްލެގްޝިޕް ފޯނު، ވާވޭ މޭޓް 20 އަދި 20 ޕްރޯގެ ފޯނު ދިރާގުން ލޯންޗުކޮށްފިއެވެ.

މި ސީރީސްގެ ފޯނުތައް ދިރާގުން ލޯންޗުކޮށްފައިވަނީ ހުކުރު ދުވަހުގެ ރޭ ދިރާގު ހެޑް އޮފީހުގައި ބޭއްވި ހާއްސަ ހަފްލާއެއްގައެވެ. އެ ރަސްމިއްޔާތުގެ ތެރެއިން ދިރާގުން ވަނީ ފޯނަށް ޕްރީ އޯޑަރ ކުރި ކަސްޓަމަރުންނަށް ފޯނުތައް ހަވާލުކޮށްފައެވެ.

ހަފްލާގެ ތެރެއިން ވާވޭ ސްރީލަންކާގެ ޖެނެރަލް މެނޭޖަރު ވިދާޅުވީ ދިރާގާ ގުޅިގެން ފޯނު ރާއްޖެއަށް ތައާރަފު ކުރުމަކީ ލިބުނު އުފަލެއް ކަމަށާއި ތައާރަފު ކުރެވުނު ސްމާޓު ފޯނުގައި ގިނަ ފީޗާތައް ހިމެނޭ ކަމަށެވެ.

ފޯން ނެގި ކަސްޓަމަރުންނަށް ހަމަސްވަންދެން ފަސް ޖީބީގެ ހިލޭ އިންޓަނެޓު ލިބޭނެކަމަށް ވެސް ދިރާގުން ބުންޏެވެ. އަދި ވާވޭ މޭޓް 20، 128 ޖީބީގެ ފޯނަކަށް އެޑްވާންސް ޕޭމެންޓުގެ ގޮތުގައި ދައްކަން ޖެހެނީ 2999 ރުފިޔާ އެވެ. މަހަކަށް ދައްކަންޖެހެނީ 988 ރުފިޔާއެވެ.

މޭޓް 20 އަށް އެޑްވާންސް ޕޭމެންޓުގެ ގޮތުގައި 10،999 ރުފިޔާ އަދި މެޓް 20 ޕްރޯ އަށް 15،999 ރުފިޔާ ދައްކަން ޖެހެއެވެ. ދިރާގުން ބުނީ ފޯނު ގަންނަ ކަސްޓަމަރުންނަށް ހިލޭ ހަދިޔާއެއްގެ ގޮތުގައި ފްލިޕް ކަވަރެއް އަދި މެޓް 20 ޕްރޯ ގަންނަ ކަސްޓަމަރުންނަށް ފްލިޕް ކަވަރާއެކު ވަޔަލަސް ޗާޖަރެއް ދިނުމަށް ނިންމާފައިވާ ކަމަށެވެ. އަދި އެ ހަދިޔާތައް ދޭނީ ސްޓޮކް ހުސްވަންދެން ކަމަށް ދިރާގުން ވަނީ ބުނެފައެވެ.

ވާވޭ މޭޓް 20 ސީރީޒްގައި ދުނިޔޭގެ އެންމެ ފުރަތަމަ 7 އެންއެމް މޮބައިލް އޭއައި ޗިޕްސެޓް ހިމަނާފައިވާއިރު އެ ފޯނުގައި އަލްޓްރާ ވައިޑް ތިން ކެމެރާ ލެންސް ހިމެނެއެވެ. އަލަށް ތައާރަފުކުރި ވާވޭ މޭޓް 20 އާއި ވާވޭ މޭޓް 20 ޕްރޯ އަކީ މަތީ ފެންވަރުގެ ޓެކްނޮލޮޖީ ބޭނުންކޮށްގެން ބޮޑު ސްކްރީނަކާ އެކު ޑިޒައިން ކޮށްފައިވާ ފޯނެކެވެ. މި ފޯނުތަކަކީ ދުނިޔޭގެ އެންމެ ފުރަތަމަ 7 ނެނޯމީޓަރުގެ އޭއައި ޗިޕް އެކުލަވާލައިގެން އުފައްދާފައިވާ ފޯނެވެ. އަދި މި ދެ ފޯނުގެ ކެމެރާ ފަރުމާ ކުރީ ދުނިޔެ އަށް މަޝްހޫރު ލެއިކާ ކުންފުންޏާ ވާވޭ ގުޅިގެންނެވެ.

އަލަށް ވާވޭއިން ތައާރަފް ކުރި މޭޓް 20 ގެ ލިބެން ހުންނަނީ މިޑްނައިޓް ބްލޫ އަދި ކަޅު ކުލައެވެ. އަދި ވާވޭ މޭޓް 20 ޕްރޯ 128 ޖީބީގެ މެމޮރީ އާއެކު، ކަޅު، ޓުވައިލައިޓް ކުލަ އަދި އެމަރަލްޑް ގްރީން ކުލައިގައި ވެސް ލިބެން ހުރެއެވެ.