ތިން ވަނަ ދައުރުގެ މުއްދަތު މި މަހުގެ 15އާ ހަމައަށް އަނެއްކާވެސް އިތުރުކޮށްފި
އެގޮތަށް ނިންމީ ސަރުކާރުން ހުށަހަޅާފައިވާ ކަންކަން ފާސްކުރުމަށް
ރައްޔިތުންގެ މަޖިލިސް
ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ކަންތައްތައް ފާސްކުރުމަށްޓަކާ، މަޖިލީހުގެ ތިން ވަނަ ދައުރުގެ މުއްދަތު އަނެއްކާވެސް ދިގު ދަންމާލަން ފާސްކޮށްފިއެވެ.
މަޖިލީހުގެ ގަވައިދުގައި ބުނެފައިވާ ގޮތުން ތިން ވަނަ ދައުރުގެ ޖަލްސާތައް ކުރިއަށް ދާނީ އޮގަސްޓް 27 އިން ފެށިގެން މި ހިނގާ ނޮވެމްބަރު މަހުގެ ނިޔަލަށެވެ. ނަމަވެސް މިދިޔަ ބުދަ ދުވަހުގެ ރޭ ބޭއްވި ޖަލްސާގައި ވެސް ވަނީ އަންނަ ބުރާސްފަތި ދުވަހުގެ ނިޔަލަށް މަޖިލީހުގެ ތިން ވަނަ ދައުރުގެ މުއްދަތު ދިގު ދަންމާލާފައެވެ.
ނަމަވެސް އަންގާރަ ދުވަހުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ރައީސް ގާސިމް އިބްރާހިމް ވިދާޅުވީ ސަރުކާރުން މަޖިލީހަށް ހުށަހަޅާފައިވާ ކަންކަން ބުރާސްފަތި ދުވަހުގެ ނިޔަލަށް ނުނިންމޭނެތީ މުއްދަތު އިތުރު ކުރުމަށް ހުށަހަޅާ ކަމަށެވެ. އެގޮތުން ވޯޓަށް އަހައި، ތިން ވަނަ ދައުރުގެ މުއްދަތު މި މަހުގެ 15 ވަނަ ދުވަހުގެ ނިޔަލަށް އިތުރު ކުރުމަށް ވަނީ ފާސްކޮށްފައެވެ.
އާ ސަރުކާރުން ރައްޔިތުންގެ މަޖިލީހަށް ތިން ބިލެއް ހުށަހެޅިއެވެ. އޭގެ ތެރެއިން އެއް ބިލު މަޖިލީހުން ވަނީ ފާސްކޮށްފައެވެ. އެއީ ޕެޑުން ޓެކްސް ނެގުން ހުއްޓުވުމުގެ ބިލެވެ. ސަރުކާރުން ހުށަހެޅި ބިލްތަކުގެ ތެރެއިން މަޖިލީހުގައި މިހާރު ކުރިއަށް ދަނީ ގާނޫނީ ވަކީލުންގެ ކަންކަން ބެލެހެއްޓުމަށް ބާ އެސޯސިއޭޝަން އުފެއްދުމަށް ހުށަހަޅާފައިވާ ގާނޫނީ ހިދުމަތުގެ ބިލާއި ހިޔާނާތާއި މަރުތައް ތަހުގީގު ކުރުމަށް އުފައްދާފައިވާ ކޮމިޝަންތަކަށް ބާރު ދިނުމާ ގުޅޭ ބިލެވެ.
