އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ރައީސް އޮފީހުގައި ބޭނުންކުރުން ހުއްޓާލައިފި
ސަރުކާރުގެ 100 ދުވަހުގެ އަމާޒަކީ ސަރުކާރުގެ ވުޒާރާތަކާއި އޮފީސްތަކުގައި އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް މަދުކުރުން
ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު
އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ރައީސް އޮފީހުގައި ބޭނުން ކުރުން މިއަދުން ފެށިގެން ހުއްޓާލައިފި އެވެ.
އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ރައީސް އޮފީހުގައި ބޭނުންކުރުން ހުއްޓާލުމަށްޓަކައި އާދީއްތަ ދުވަހު ބޭއްވި ރަސްމިއްޔާތުގައި ރައީސް އިބްރާހިމް މުހައްމަދު ސޯލިހް ވިދާޅުވީ އިޔާދަނުކުރެވޭ ފަދަ ޕްލާސްޓިކް ފުޅި އާއި ކޮތަޅުގެ ބަދަލުގައި ރައީސް އޮފީހުގައި ތައާރްފަކުރާނީ އެއް ފަހަރަށް ވުރެ ގިނަ ފަހަރު ބޭނުންކުރެވޭ ފުޅި އާއި އެއްފަހަރަށް ވުރެ ގިނައިން ބޭނުންކުރާ ކޮތަޅު ކަމަށެވެ.
ރައީސުލްޖުމްހޫރިއްޔާ ވިދާޅުވީ އެ މަނިކުފާނުގެ ސަރުކާރުގެ 100 ދުވަހުގެ އަމާޒަކީ ސަރުކާރުގެ ވުޒާރާތަކާއި އޮފީސްތަކުގައި އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް މަދުކުރުން ކަމަށެވެ. މި ކަމަށް ސަރުކާރުގެ ވުޒާރާތަކާއި އޮފީސްތަކުގެ އެއްބާރުލެއްވުން ލިބޭނެ ކަމަށް އުއްމީދުކުރައްވާ ކަމަށް ރައީސުލްޖުމްހޫރިއްޔާ ވިދާޅުވިއެވެ. މި ހަރަކާތަކީ ޕްލާސްޓިކްގެ ނުރައްކާތެރިކަމަށް ހޭލުންތެރިކަން އިތުރުކުރުމަށް އެޅުނު މުހިންމު ފިޔަވަޅެއް ކަމުގައި ދެކިވަޑައިގަންނަވާ ކަމަށާއި، މި ހަރަކާތަކީ ތިމާވެށި ރައްކާތެރި ކުރުމާއި ހިމާޔަތް ކުރުމަށް އެޅޭ ވަރަށް މުހިއްމު ފިޔަވަޅެއް ކަމަށް ރައީސުލްޖުމްހޫރިއްޔާ ވިދާޅުވިއެވެ. ރައީސުލްޖުމްހޫރިއްޔާ ވިދާޅުވީ ރާއްޖޭގެ ކަނޑުތަކާއި ފަޅުތަކާއި ގިރިތަކަކީ ރާއްޖޭގެ އިގްތިސާދާއި ގުޅިފައިވާ ގުދުރަތީ މުހިންމު ވަސީލަތެއް ކަމަށެވެ. ނިސްބަތުން ރާއްޖެއަކީ ކުޑަ ގައުމެއް ނަމަވެސް ދުނިޔޭގެ ފަރުތަކުގެ ތިން ޕަސެންޓް އޮތީ ރާއްޖޭގައި ކަމަށާއި، އެއީ ހަތަރުހާސް ފައްސަތޭކަ އަކަކިލޯމީޓަރު ކަމަށް ރައީސުލްޖުމްހޫރިއްޔާ ވިދާޅުވިއެވެ. ރާއްޖޭގެ އިގްތިސާދުގެ އެންމެ މުހިންމު ދެ ސިނާއަތްކަމަށްވާ ޓުއަރިޒަމާއި މަސްވެރިކަންވެސް ބަރޯސާވެފައިވަނީ ކަނޑުތަކާއި، ފަޅުތަކާއި، ގިރިތަށްފަދަ ގުދުރަތީ ވަސީލަތްތަކައް ކަމަށް ރައީސުލްޖުމްހޫރިއްޔާ ވިދާޅުވިއެވެ.
"ނަމަވެސް އަޅުގަނޑުމެންގަ ކަނޑުތަކާއި ފަރުތަކާއި މެދު އަޅުގަނޑުމެންނަށްވަނީ ކޮންމެވެސް މިންވަރަކަށް ފަރުވާކުޑަކުރެވިފައި. މި ގޮތުން ކަނޑުތަކާއި ކަނޑުގައިވާ ދިރުމަށްދެވޭ އެންމެ ބޮޑޫ ގެއްލުމަކީ ކަނޑަށް އެޅޭ ކުނި ގިނަވުން" ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ތަފާސް ހިސާބްތައް ދައްކާ ގޮތުން ދުވާލަކު ރާއްޖޭގެ ކަނޑުތަކަށް 860 މެޓްރިކްޓަނުގެ ކުނި އަޅާ ކަމަށާއި، ބޭނުންކޮށްފައި އުކާލާ ޕްލާސްޓިކަށް ބަރޯސާވެފައިވަނީ ކަންބޮޑުވާންޖެހޭ ފަދަ ދަރަޖައަކަށް ކަމަށެވެ. ކަނޑަށް އުކާލެވޭ ޕްލާސްޓިކް ތަކުގެ ތެރޭގައި ޕްލާސްޓިކް ކޮތަޅާއި ޕްލާސްޓިކް ފުޅި އާއި ތަކެތި ބަންދުކުރަން ގެންގުޅޭ ޕްލާސްޓިކް ރެޕިންގްސް ހިމެނޭ ކަމަށް ރައީސުލްޖުމްހޫރިއްޔާ ވިދާޅުވިއެވެ.
"ހަމައެކަނި މާލޭގައިވެސް ދުވާލަކަށް ދެ ލައްކަ އަށްޑިހަހާސް ޕްލާސްޓިކް ފެންފުޅި ބޭނުންކުރެވޭ. މި ފުޅިތަކަކީ ނަން ބައޯޑިގްރޭޑެބަލް، ފަސޭހައިން ފަނާވެގެންދާ ބާވަތުގެ އެއްޗެއްސެއް ނޫން. އަދި އެ ތަކެތީގެ ބޮޑު ބައެއް ނިމިގެންދަނީ ކަނޑަށް. އޭގެ ސަބަބުން ކަނޑުގެ ދިރުމަށް ނޭދެވޭ އެތަށް އަސަރުތަކެއް ކުރޭ" ރައީސުލްޖުމްހޫރިއްޔާ ވިދާޅުވިއެވެ.
