ޓޮޓެންހަމް އަށް ކުރިން ކުޅުނު އަޔަލޭންޑްގެ ތަރި ރޮބީ ކީން އުމުރުން 38 އަހަރުގައި ފުޓުބޯޅަ ކުޅުން ހުއްޓާލައިފިއެވެ.
ކުޅުން ހުއްޓާލުމަށްފަހު ކީން ބުނީ ކެޕްޓަން ބޭންޑް އަޅައިގެންވެސް ގައުމީ ޓީމަށް އޭނާ އަށް ހިދުމަތް ކޮށްދެވުނު ކަމަށާއި، އެއީ އޭނާ ކުޅުން ހުއްޓާލާއިރުވެސް އެންމެ އުފާވާ އެއް ކަންތައް ކަމަށެވެ.
އެގޮތުން ކީން ބުނީ ކްލަބް ލެވެލްގައިވެސް ހޯދުނު ކާމިޔާބީތަކާ މެދު ހިތްހަމަޖެހޭ ކަމަށާއި، ސަޕޯޓަރުން ދިން ސަޕޯޓަށް ޝުކުރު އަދާކުރާ ކަމަށެވެ. އަދި އޭނާ ކުޅުނު ހުރިހާ ކްލަބަކަށް ދިން އެއްބާރުލުމަށް ޝުކުރު އަދާކުރާ ކަމަށެވެ.
ކީންގެ 23 އަހަރުގެ ފުޓުބޯޅަ ކެރިޔަރުގައި އޭނާ ވަނީ 10 ކްލަބަށް ކުޅެފައެވެ. އޭނާ ކުޅުނު ކްލަބްތަކުގެ ތެރޭގައި ޓޮޓެންހަމް، ލިވަޕޫލް އަދި އެލްއޭ ގެލެކްސީ ހިމެނެއެވެ.
68 goals in 146 @FAIreland games
— FIFA World Cup (@FIFAWorldCup) November 28, 2018
His country's top goalscorer
Three goals at the 2002 #WorldCup
Robbie Keane has announced his playing retirement having been appointed assistant coach of @FAIreland. Thanks for the memories pic.twitter.com/1w0Pzdfs2D
ކީން ވަނީ ކެރިޔަރުގައި ކުޅުނު 737 މެޗުގައި 325 ލަނޑު ކާމިޔާބުކޮށްފައެވެ. ޓޮޓެންހަމްއާއެކު ލީގު ކަޕް އެއްފަހަރު ކާމިޔާބުކޮށްފައިވާ ކީން ވަނީ އަޔަލޭންޑްއާއެކު 2011 ވަނަ އަހަރު ނޭޝަންސް ކަޕްވެސް ކާމިޔާބުކޮށްފައެވެ. އަދި އޭނާ ވަނީ 18 އަހަރުން ދަށުގެ ޔުއެފާ ޔޫރޯ 1998 ވަނަ އަހަރު އެ ގައުމާއެކު ކާމިޔާބުކޮށްފައެވެ.
ގައުމީ ޓީމުން 2016 ވަނަ އަހަރު ކީން ރިޓަޔާކުރިއިރު، އޭނާ ވަނީ އެ ގައުމަށް ކުޅުނު 146 މެޗުގައި 68 ލަނޑު ކާމިޔާބުކޮށްފައެވެ. އޭނާ އަކީ އެ ގައުމަށް އެންމެ ގިނަ ލަނޑު ކާމިޔާބުކޮށްދިން ކުޅުންތެރިޔާއެވެ.
ކެރިޔަރުގައި ގިނަ އެވޯޑްތައް ހާސިލްކޮށްފައިވާ ކީން ޓޮޓެންހަމްގެ އެންމެ މޮޅު ކުޅުންތެރިޔާގެ މަގާމު ތިންފަހަރު ހޯދާފައިވާއިރު، ގެލެކްސީގެ އެންމެ މޮޅު ކުޅުންތެރިޔާގެ މަގާމުވެސް ޖެހި ޖެހިގެން ހަތަރު ފަހަރު އޭނާ ވަނީ ހޯދާފައެވެ.
