ރާއްޖެ ހިމެނޭ ސަރަހައްދުގެ ސަލާމަތާއި ހަމަޖެހުން ގާއިމްކުރުމަށް ސަމާލުކަން ދޭނަން: މިނިސްޓަރ މާރިއާ
ރައީސް ސޯލިހު މިސަރަހައްދުގެ ސަލާމަތާއި ހަމަޖެހުން ގާއިމްކުރުމަށް ސަމާލުކަން ދެއްވާނެ
ޑިފެންސް މިނިސްޓަރ މާރިޔާ އަހުމަދު ދީދީ
ރައީސް އިބްރާހީމް މުހައްމަދު ސޯލިހްގެ ސަރުކާރުން އެންމެ ބޮޑު ސަމާލުކަމެއް ދެއްވާނީ އަވައްޓެރި ޤައުމުތަކާއި ދެމެދު އޮންނަ ގުޅުން ބަދަހި ކުރުމަށް ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
އަންގާރަ ދުވަހު އިސްލަމީ މަރުކަޒުގެ ޖަލްސާކުރާ މާލަމުގައި އޮތް ދޯސްތީގެ ނަމުގައި ބާއްވަން ހަމަޖެހިފައިވާ އަސްކަރީ ތަމްރީނުތައް ފެށުމުގެ ރަސްމިއްޔާތުގައި ވާހަކަދައްކަވަމުން މާރިޔާ ވިދާޅުވީ މި މަހުގެ 17 ވަނަ ދުވަހު ރައީސްކަމުގެ ހުވާކުރެއްވި ރައީސް އިބްރާހިމް މުހައްމަދު ސޯލިހު، ރާއްޖެ ހިމެނޭ ސަރަހައްދުގެ ސަލާމަތާއި ހަމަޖެހުން ގާއިމްކުރުމަށް ސަމާލުކަން ދެއްވާނެކަމުގެ ޔަގީންކަން ދެއްވާފައިވާ ކަމަށެވެ.
"ރާއްޖެއާއި އިންޑިޔާއާއި ދެމެދު އޮންނަ އަސްކަރީ ގުޅުން ބަދަހި ކުރުމުގެ ގޮތުން މިފަދަ އެކްސަސައިޒް ތަކަކީ މުހިންމު ކަމެއް. އަދި މިފަދަ އަސްކަރީ ތަމްރީނުތަކުގެ ސަބަބުން ދެ ޤައުމުގެ ދެމެދުގައި އޮންނަ އަސްކަރީ އަދި ޑިޕްލޮމެޓިކް ގުޅުން ބަދަހި ކުރުމަށް ފުރުސަތު ލިބިގެން ދާނެ." މިނިސްޓަރ ވިދާޅުވެފައެވެ.
މި ޖަލްސާގައި ވާހަކަފުޅު ދައްކަވަމުން ސްރީލަންކާ ކޯސްޓް ގާޑްގެ ޑިރެކްޓަރ ޖެނެރަލް ރިއާ އެޑްމަރަލް ސަމަންތާ ވިމާލަތުންގެ ވިދާޅުވެފައިވަނީ މިއީ އެއްޤައުމުގެ ކޯސްޓް ގާޑުގައި މަސައްކަތްކުރާ ބޭކަލުންގެ ތަޖުރިބާ އަވައްޓެރި އެހެން ޤައުމުތަކާއި ހިއްސާ ކުރުމަށް ލިބޭނެ ވަރަށް މުހިންމު ފުރުސަތެއް ކަމަށާއި މިފަދަ އެކްސަސައިޒްތަކުގެ ސަބަބުން ކުރިޔަށް އޮތް ތަނުގައި އެހެން ޤައުމުތަކުގެ ސިފައިން ފަރާތުން ތަފާތު ފިލާވަޅުތައް ލިބިގަނެ މުސްތަޤްބަލުގައި އޭގެ ބޭނުން ރަނގަޅު ގޮތުގައި ހިފޭނެ ކަމެއް ކަމަށެވެ.
މީގެ އިތުރުން އެ ރަސްމިއްޔާތުގައި ވާހަކަދައްކަވަމުން އިންޑިޔާ ކޯސްޓް ގާޑުގެ ޑިރެކްޓާ ޖެނެރަލް ރަޖެންދްރަ ސިންހް ވިދާޅުވީ ދޯސްތީގެ ތަމްރީނުތައް ވަރަށް ކައިރިން ބަލާފައިވާ ކަމަށާއި އެ ހަރަކާތަކީ ސަލާމަތާއި ރައްކާތެރިކަމަށް އެޅިގެންދާ ރަނގަޅު ފިޔަވަޅެއް ކަމަށެވެ.
އެކްސަސައިޒް ދޯސްތީ އަކީ 1991 ވަނަ އަހަރުން ފެށިގެން ކޮންމެ ދެ އަހަރުން އެއް އަހަރު އިންޑިއާ އަދި ރާއްޖޭގެ ކޯސްޓްގާޑު ގުޅިގެން ކުރިއަށް ގެންދަން ފެށި ޕްރޮގްރާމެކެވެ. މި ހަރަކާތުގައި ލަންކާ އިން ބައިވެރިވާން ފެށީ 2012 ވަނަ އަހަރުން ފެށިގެންނެވެ. މި ހަރަކާތް އެންމެ ފަހުން ބާއްވާފައިވަނީ 2016 ވަނަ އަހަރު އޮކްޓޯބަރު މަހުގެ ތެރޭގަ އެވެ.
