މަޖިލީހަށް ކޯލިޝަން ޕާޓީތަކުން ވާދަކުރުމުގެ މަޝްވަރާ މިހަފްތާގައި ފަށަނީ
މަޝްވަރާތައް ކުރާނީ ލީޑަރުން
ލީޑަރުން ބައިވެރިވެވަޑައިގެން އެންމެ ފަހުން ބޭއްވި މަޝްވަރާ
ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް ގުޅިފައިވާ ޕާޓީތަކުގެ ކެންޑިޑޭޓުން ވާދަކުރުމާ ގުޅޭ މަޝްވަރާތައް ކުރިއަށް އޮތް ހަފްތާގައި ފަށަން ތައްޔާރުވެއްޖެއެވެ.
ކޯލިޝަންގެ އިސް އޮފިޝަލަކު "ރާއްޖެއެމްވީ"އަށް ވިދާޅުވީ ގުޅިފައިވާ ޕާޓީތަކަށް ކޯލިޝަންގެ ޓިކެޓް ދޭނެ ގޮތްތަކާ ގުޅޭ މަޝްވަރާތައް މި ހަފްތާގައި ފަށާނީ ލީޑަރުން ބައިވެރިވާ ގޮތަށް ކަމަށެވެ.
ނުރަސްމީ މަޝްވަރާތަކުގައި މަޖިލީހުގެ ބައެއް ދާއިރާތަކަށް ކޯލިޝަންގައި ހިމެނޭ ހަތަރު ޕާޓީން ވެސް ވާދަ ކުރަން ވަނީ ވާހަކަ ދައްކާފައެވެ. ނަމަވެސް ރަސްމީކޮށް އެކަމުގައި ގޮތެއް ކަނޑައަޅާފައެއް ނުވެއެވެ.
އަޑު ފެތުރިފައިވާ ގޮތުގައި މަޖިލިސް އިންތިހާބުގައި ޕާޓީތަކަށް ޓިކެޓް ދިނުމަށް ނިންމާފައި ވަނީ ސަރުކާރުގައި ވެސް ޕާޓީތަކުގެ ބައިވެރިވުން އޮތް މިންވަރަށެވެ. އެގޮތުން އެމްޑީޕީއަށް ސަރުކާރުގެ 40 ޕަސެންޓެވެ. ޖުމްހޫރީ ޕާޓީއަށް 25 ޕަސެންޓެވެ. ރައީސް މައުމޫނަށް 20 ޕަސެންޓެވެ. އަދާލަތަށް 15 ޕަސެންޓެވެ.
އެ ނިސްބަތުން ބަލާނަމަ، އެމްޑީޕީން ވާދަ ކުރާނީ މަޖިލީހުގެ 35 ގޮނޑިއަށެވެ. ޖޭޕީން ވާދަ ކުރާނީ 22 ގޮނޑިއަށެވެ. އަދި ރައީސް މައުމޫންގެ އެމްއެމުން ވާދަ ކުރަނީ 17 ގޮނޑިއަށެވެ. ބާކީ ހުރި 13 ގޮނޑި އަދާލަތަށެވެ.
ނަމަވެސް ބައެއް ދާއިރާތަކުގައި ކޯލިޝަންގެ ޕާޓީތަކުގެ މެދުގައި ވާދަވެރިކަން ބޮޑުވެ، ވަކިވަކިން ޕާޓީތަކުން ވާދަ ކުރުމަށް ދަނީ ވާހަކަ ދައްކަމުންނެވެ.
