ޅ. ނައިފަރުން ގޯތި ދޫނުކުރާތާ ހަ އަހަރުވެފައިވާ ކަމަށާއި، އުންމީދަކީ އާ ސަރުކާރުން އަވަހަށް ގޯތި ދޫކޮށް ބޯހިޔާވަހިކަމަށް ހައްލު ހޯދައިދިނުން ކަމަށް އެ ރަށުގެ ކައުންސިލުން ބުނެފިއެވެ. 

"އެތެރެދުނި ޕްރޮގްރާމް"އަށް ދެއްވި އިންޓަވިއުއެއްގައި ކައުންސިލްގެ ރައީސް މުހައްމަދު ކާރިމް ވިދާޅުވީ ކުރީގެ ރައީސް އަބްދުﷲ ޔާމީންގެ ސަރުކާރުގައި ނައިފަރުގެ ރައްޔިތުން ދިމާވެފައިވާ ބޯހިޔާވަހިކަމަށް ހައްލު ހޯދުމަށް ކައުންސިލުން ގިނަ މަސައްކަތްތަކެއް ކުރެވުނު ކަމަށާއި، ނަމަވެސް އެސަރުކާރުން ކައުންސިލްގެ މިމަސައްކަތްތަކަށް އެއްބާރުލުން ދީފައި ނުވާ ކަމަށެވެ. އޭނާ ވިދާޅުވީ ގޯތި ދޫކުރުމަށް ހުއްދައަށް އެދުނު ނަމަވެސް އެކަން ރައީސް ޔާމީންގެ ސަރުކާރުން ކޮށްދީފައިނުވާ ކަމަށެވެ. 

ނަމަވެސް ބިން ހިއްކާފައިވާ ރަށްރަށުން ގޯތިދޫކުރުމުގެ ހުއްދަ ކައުންސިލްތަކަށްދޭނެ ކަމަށް ރައީސުލުމްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދުފުޅަށް ފާހަގަކުރައްވައި ކާރިމް ވިދާޅުވީ ރައީސް ސޯލިހުގެ ސަރުކާރުގައި އެ މައްސަލައަށް ހައްލު ހޯދައިދޭނެ ކަމުގެ އުންމީދު ވަރަށް ބޮޑު އެބައޮތް ކަމަށެވެ. އަދި ރައްޔިތުން ތިބީ އެ ދުވަހެއްގެ އިންތިޒާރުގައި ކަމަށް އޭނާ ވިދާޅުވިއެވެ.

ކާރިމް ވިދާޅުވީ ނައިފަރަށް މިއަދު ދިމާވެފައިވާ އެންމެ ބޮޑު ދަތި ކަމަކީ ރައްޔިތުންނަށް ބޯހިޔާވަހިކަން ނުލިބުން ކަމަށާއި، މިހާރު ވެސް އެރަށުން ގޯތި ދޫކުރެވޭ ވަރަށް ބިން އެބައޮތް ކަމަށެވެ. ނަމަވެސް އެރަށުގެ ރައްޔިތުންގެ 90 އިންސައްތަ މީހުން ބޭނުން ވަނީ ރޯހައުސް ކަމަށް އޭނާ ވިދާޅުވިއެވެ.

"ފުދުންތެރިކަން ހުރި މީހުން މިހާރު ބޭނުންވަނީ ގޯތި. އޭއީ ގާތްގަނޑަކަށް 10 އިންސައްތަ މީހުން. އެމީހުންނަށް ބޭނުން ޑިޒައިންނަކަށް ގެދޮރު އެޅޭނެ. އެކަމަކު 90 އިންސައްތަ މީހުން ބޭނުންވަނީ ރޯހައުސް. މިހާރުގެ ރަށުންގެ ބިމުގެ ޖާގަހުރި ވަރަށް ބަލާއިރު 200ހާ ގޯތި އަސްލު ދޫކޮށްލެވޭނެ" ކާރިމް ވިދާޅުވިއެވެ.

ކާރިމް ވިދާޅުވީ ނައިފަރަށް ބިމުގެ ދަތިކަން ކުރިމަތިވުމާ ގުޅިގެން 2005 ވަނަ އަހަރު ބިން ހިއްކާ ނިންމާ އެމައްސަލަ ހައްލުކޮށްފައިވާ ކަމަށާއި، ނަމަވެސް ތަފާތު ސަބަބުތަކާ ހުރެ ބިންދޫނުކޮށް ގިނަ ދުވަސްތަކެއް ފާއިތުވެގެން ދިޔަ ކަމަށެވެ.

ކާރިމް ވިދާޅުވީ އެމްޑީޕީގެ ވެރިކަމުގައި ނައިފަރުގައި 25 ރޯހައުސް އަޅާދީފައިވާ ކަމަށާއި، މިރޯހައުސްގެ ތެރެއިން މާފިލާފުށިން އެރަށަށް ހިޖުރަކުރި 9 އާއިލާއަކަށް ރޯހައުސް ދޫކުރުމަށްފަހު ބާކީ ރޯހައުސްތައް ނައިފަރުގެ ރައްޔިތުންނަށް ދޫކޮށްފައިވާ ކަމަށް ކާރިމް ވިދާޅުވިއެވެ. އަދި 2012 ވަނަ އަހަރު ރައްޔިތުންނަށް ގޯތި ލިބުނު ކަމަށާއި، އެފަހަރު ޖުމްލަ 300 ގޯތި ދޫކުރި ކަމަށެވެ. ނަމަވެސް އޭގެ ފަހުން އެރަށުގައި ގޯތިދޫކޮށްފައި ނުވާ ކަމަށާއި، ރައްޔިތުންނަށް ބޯހިޔާވަހިކަން ހޯދައިދިނުމަށް ކައުންސިލުން ކުރި މަސައްކަތަށް ވެސް ކުރިއެރުން ލިބިފައި ނުވާ ކަމަށް އޭނާ  ވިދާޅުވިއެވެ.

"ބައެއް ގޭގޭތަކުގައި އެބައުޅޭ އަނެހެން ބުނަންޏާ މުނި ކާފަ މުނި މާމަ ދަރިން ފެށިގެން ގޮސް. ދަރިންގެ ދަރިންނަށް ދަންދެން މުޅި އާއިލާ އެއްގެއެއްގެ ތެރޭގައި. ވަރަށް ދަތި ހާލުގައި. ފުނިޖެހިގެން. ވަންނާނެ ގެދޮރު ނެތިގެން" ކާރިމް ވިދާޅުވިއެވެ.

ކާރިމް ވިދާޅުވީ ނައިފަރުގެ އާބާދީ 5400 އަށްވުރެ ބޮޑުވާނެ ކަމަށާއި، ގޭބިސީގެ އާބާދީއަކީ 1074 ކަމަށެވެ. އެހެން ރަށްރަށުގެ މީހުންނާއި، ބިދޭސީން ވެސް އެރަށުގެ ދިރިއުޅެމުންދާއިރު ގެދޮރުގެ ދަތިކަމަށް އަވަސް ހައްލެއް ބޭނުންވާ ކަމަށް އޭނާ ވިދާޅުވިއެވެ.