ރެއާލްއަށް މުހިންމު ކުޅުންތެރިޔަކަށް ވާން ބޭނުން: އެސެންސިއޯ

ރެއާލް މެޑްރިޑަށް މުހިންމު ކުޅުންތެރިޔަކަށް ވާން ބޭނުންވާ ކަމަށް އެ ކްލަބަށް ކުޅެމުން އަންނަ މާކޯ އެސެންސިއޯ ބުނެފިއެވެ.

މާސާއަށް ދިންޓަވިއުއެއްގައި އެސެންސިއޯ ބުނީ ރެއާލްއަށް މުހިންމު ކުޅުންތެރިޔަކަށް ވާން ބޭނުންވާ ކަމަށާއި، އެކަން ފޮރުވަން ބޭނުންނުވާ ކަމަށެވެ.

އެގޮތުން ރެއާލްއާއެކު ކާމިޔާބީ ހޯދަން ބޭނުންވާކަން ފާހަގަކުރަމުން އެސެންސިއޯ ބުނީ ރެއާލްއަށް ކުޅެން ފުރުސަތު ލިބުމުން އެކަމާ އުފާވާ ކަމަށާއި، ރެއާލް އަކީ އެންމެ ކުޑައިރުއްސުރެ ކުޅެން ބޭނުންވި ކްލަބް ކަމަށެވެ.

އެސެންސިއޯ ރެއާލްގައި ދައްކަމުން އަންނަ މޮޅު ކުޅުމާއެކު އޭނާ ހޯދުމަށް ގިނަ ކްލަބްތަކުން ވަނީ ޝައުގުވެރިވެފައެވެ. އޭގެ ތެރޭގައި ޕްރިމިއާ ލީގުގެ ކްލަބްތަކުގެ އިތުރުން ސްޕެއިން އަދި އިޓަލީގެ ކްލަބްތައްވެސް ހިމެނެއެވެ.

މަޔޯކާއާއެކު 2013 ވަނަ އަހަރު ކެރިޔަރު ފެށި އެސެންސިއޯ ވަނީ އެޓީމުގެ ޖޫނިއާ ޓީމަށް 14 މެޗު ކުޅެދީ ތިން ލަނޑު ކާމިޔާބުކޮށްފައެވެ. އެއަށްފަހު އޭނާ ވަނީ އެ ކްލަބުގެ ސީނިއާ ޓީމަށް ބަދަލުވެ، ކުޅުނު ދެ ސީޒަނުގައި 56 މެޗު ކުޅެދީ ހަތް ލަނޑު ކާމިޔާބުކޮށްފައެވެ.

މަޔޯކާ ދޫކޮށްލުމަށްފަހު ދެން އެސެންސިއޯ ބަދަލުވީ 2015 ވަނަ އަހަރު އެސްޕަނިޔޯލް އަށެވެ. އެގޮތުން އޭނާ ވަނީ އެ ކްލަބަށް ކުޅުނު 37 މެޗުގައި ހަތަރު ލަނޑު ކާމިޔާބުކޮށްފައެވެ.

އެސްޕަނިޔޯލްގައި ސީޒަނެއް ހޭދަކުރުމަށްފަހު 2016 ވަނަ އަހަރު އެސެންސިއޯ ބަދަލުވީ ރެއާލް އަށެވެ. އޭނާ ވިދާލާފައިވަނީ ރެއާލްއިންނެވެ. އެގޮތުން އޭނާ ވަނީ އެ ކްލަބަށް މިހާތަނަށް ކުޅުނު 108 މެޗުގައި 23 ލަނޑު ކާމިޔާބުކޮށްފައެވެ.

އެސެންސިއޯ ވަނީ ރެއާލްއާއެކު ސްޕެނިޝް ލަލީގާ، ސްޕެނިޝް ސުޕާކަޕް، ޔުއެފާ ޗެމްޕިއަންސް ލީގު، ޔުއެފާ ސުޕާކަޕް ދެފަހަރު އަދި ފީފާ ކްލަބް ވޯލްޑްކަޕް ދެފަހަރު ކާމިޔާބުކޮށްފައެވެ.

ސްޕެއިން ގައުމީ ޓީމަށް 19 މެޗު ކުޅެދީފައިވާ އެސެންސިއޯ ވަނީ 2015 ވަނަ އަހަރު ބޭއްވުނު 19 އަހަރުން ދަށުގެ ޔޫރޯ ފުޓުބޯޅަ މުބާރާތް ސްޕެއިން ގައުމީ ޓީމާއެކު ކާމިޔާބުކޮށްދިނުމަށް މުހިއްމު މަސައްކަތްތަކެއް ކޮށްފައެވެ.