ފަސް މިލިއަން އެމެރިކާ ޑޮލަރަށް (77 މިލިއަން ރުފިޔާ)އަށް ހިޔާނާތްތެރިވުމުގެ އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު ޖަލަށްލުމަށް ކުރި ހުކުމް ހައި ކޯޓުން ދަމަހައްޓައިފިއެވެ.
ޒިޔަތު ހިޔާނާތްތެރިވި ކަމަށް ބުނާ އެ މައްސަލާގައި ކުރީގެ ނައިބު ރައީސް އަހުމަދު އަދީބާއި މ. ޝުރާ މަންޒިލް ހާމިދު އިސްމާއިލު ވެސް ޖަލަށްލުމަށް ކްރިމިނަލް ކޯޓުން ހުކުމްކުރިއެވެ. ހައި ކޯޓުން އެ ހުކުމަށް ތާއިދު ކުރީ އެ މައްސަލާގައި ޒިޔަތުގެ ފަރާތުން އެ ހުކުމް ހައި ކޯޓަށް ހުށަހެޅުމުންނެވެ.
އަދީބާއި ޒިޔަތާއި ހާމިދުގެ މައްޗަށް ދަށު ކޯޓުން ކުށް ސާބިތުވީ ކުރެއްދޫ ހޯލްޑިންގްސް ޕްރައިވެޓް ލިމިޓެޑުން ރިސޯޓެއް ތަރައްގީ ކުރުމުގެ ގޮތުން ޅ. މާބިންހުރާ ކުއްޔަށް ހިފުމަށް އެކުއިޒިޝަން ކޮސްޓުގެ ގޮތުގައި އެމްއެމްޕީއާރްސީއަށް ދައްކާފައިވާ ފަސް މިލިއަން ޑޮލަރަށް ހިޔާނާތްތެރި މައްސަލާގައެވެ.
އެ މައްސަލާގައި ޒިޔަތާއި އަދީބު އަށް އަހަރަށް ޖަލަށްލުމަށާއި ހާމިދު ދެ އަހަރާއި ނުވަ މަހާއި 18 ދުވަހަށް ޖަލަށްލުމަށް ކްރިމިނަލް ކޯޓުން ވަނީ ހުކުމްކޮށްފައެވެ.
އެ މައްސަލާގައި ޕީޖީން ކުރި ދައުވާގައި ބުނެފައި ވަނީ ޅ. މާބިންހުރާ ކުއްޔަށް ހިފުމަށް ދެއްކި ފަސް މިލިއަން ޑޮލަރުގެ ޗެކާ ޒިޔަތު ހަވާލުވެފައިވާ ކަމަށާއި އެ ފައިސާ އެމްއެމްޕީއާރްސީއަށް ލިބިފައި ނުވާ ކަމަށެވެ. އަދި އަދީބާއި ހާމިދު ބައިވެރިވެގެން އެ ޗެކު ހާމިދު ހިއްސާވާ މިލޭނިއަމް ކެޕިޓަލް މޭނޭޖުމަންޓުގެ އެކައުންޓަށް ޖަމާކޮށް، ހާމިދު އެ ފައިސާއިން މުއާމަލާތްކޮށްފައިވާ ކަމަށެވެ.
އެ މައްސަލާގައި ޝަރީއަތް ހިންގުމަށްފަހު، ހައި ކޯޓުގެ އިސް ފަނޑިޔާރު ޝުޖާއު އުސްމާނާއި ފަނޑިޔާރު މުހައްމަދު ނިޔާޒާއި ފަނޑިޔާރު އަލީ ސަމީރު ބުދަ ދުވަހު ކުރެއްވި ހުކުމްގައި ބުނެފައި ވަނީ އެ ތިން މީހުންގެ މައްޗަށް ކްރިމިނަލް ކޯޓުން ހުކުމްކޮށްފައި ވަނީ ގާނޫނާ އެއްގޮތަށް ކަމަށެވެ.
