ފުރަތަމަ ދުވަހު ފުއްދަވާނެކަމަށް ރާއްޖެ ޓީވީގައި ވެވަޑައިގެންނެވި ވައުދުތައް ރައީސް ސޯލިޙް ފުއްދަވައިފި
ސިޔާސީ ހައްޔަރީންނަށް އާއިލާގެ ގާތަށް ދެވޭނެކަމަށް ވައުދުވެވަޑައިގެންނެވި
ރައީސް ސޯލިޙް މި 3 ވައުދު ވެވަޑައިގަތީ ރާއްޖެ ޓީވީގެ ފަލަސުރުޚީ ޕްރޮގްރާމްގައި
ވެރިކަމުގެ ފުރަތަމަ ދުވަހު ކުރައްވާނެ ކަމަށް މިދިޔަ އޮގަސްޓް މަހުގެ 12 ވަނަ ދުވަހުގެ ރޭ ރާއްޖެ ޓީވީގެ ފަލަސުރުޚީ ޕްރޮގްރާމްގައި އޭރުގެ އެމްޑީޕީ އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް، ވައުދުވެވަޑައިގެންނެވި 3 ކަންތައް އެމަނިކުފާނު މިއަދު ފުރިހަމަ ކުރައްވައިފިއެވެ.
ހޮނިހިރު ދުވަހުގެ އިރު އޮއްސުމާއި ގާތްވެފައި ވަނިކޮށް ރާއްޖޭގެ ރައީސުލްޖުމްހުރިއްޔާކަމުގެ ހުވައި ކުރެއްވި ރައީސް ސޯލިޙްގެ ވެރިކަމުގެ ފުރަތަމަ ދުވަހު އެކަނިކުފާނު ކުރައްވާނެކަމަށް އޭރު ވައުދުވެވަޑައިގެންނެވި 3 ކަމަކީ އިންސާފު ޤާއިމްކުރުމުގެ މަސައްކަތް ފައްޓަވައި ސިޔާސީ ހައްޔަރީންނަށް އާއިލާގެ ގާތަށް ދެވުމާއި، ދައުލަތުން ގެއްލިފައިވާ ފައިސާ ހޯދުމުގެ މަސައްކަތް ފެއްޓެވުމުގެ އިތުރުން އަނިޔާވެރި ގޮތަކަށް މަރާލާފައިވާ އަދި ވީނުވީއެއް ނޭނގި ގެއްލިފައިވާ ފަރާތްތަކަށް ވީނުވީ ހޯދައި، މަރުތަކުގެ ހަޤީޤަތް ހޯދަން މަސައްކަތް ފެއްޓެވުމެވެ. މި 3 ވައުދު ރާއްޖެ ޓީވީގެ ފަލަސުރުޚީ ޕްރޮގްރާމްގައި ވެވަޑައިގެންނެވި އިރު ރައީސް ސޯލިޙަށް ގުޅިފައިވާ ޕާޓީތަކުގެ ރުހުމާއިއެކު އެމްޑީޕީގެ ރިޔާސީ ޓިކެޓް ލިބިވަޑައިގެންނެވިތާ 2 ހަފްތާ ނުވެއެވެ.
ރައީސް ސޯލިޙް ވަނީ ޚާއްސަ ޤަރާރަކުން މި 3 ކަންތައްވެސް ވެރިކަމުގެ ފުރަތަމަ ދުވަހު ފައްޓަވާފައެވެ. އެގޮތުން ވެރިކަމުގެ ފުރަތަމަ ދުވަހު ސިޔާސީ ހައްޔަރީންނަށް އާއިލާގެ ގާތަށް ދެވޭނެކަމަށް ވެވަޑައިގެންނެވި ވައުދުގެ ދަށުން ކުރީގެ އުއްތަމަ ފަނޑިޔާރު އަބްދުﷲ ސަޢީދާއި، ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދުގެ އިތުރުން ކުރީގެ ޕީޖީ މުހުތާޒް މުހުސިންއާއި މާމިގިލީ ކޯޓުގެ ކުރީގެ މެޖިސްޓްރޭޓް ނިހާން ވަނީ ގޭބަންދަށް ބަދަލުކުރެވިފައެވެ. ރައީސް ސޯލިޙް ސިޔާސީ ހައްޔަރީންނަށް އާއިލާ ގާތަށް ދެވޭނެކަމަށް ވައުދުވެވަޑައިގެންނެވިއިރު ގިނަ އަދަދެއްގެ ސިޔާސީ ހައްޔަރީން ޖަލުތަކުގައި ތިއްބެވިނަމަވެސް، ރިޔާސީ އިންތިޚާބުން ރައީސް އަބްދުﷲ ޔާމީން ބޮޑުތަނުން ބަލިވެ، އެމަނިކުފާނުގެ ސަރުކާރުގެ ބާރު ކެނޑުމާއިއެކު ގިނަ ގިނަ އަދަދެއްގެ ހައްޔަރީން ވަނީ މިނިވަން ކޮށްފައެވެ. ރައީސް ސޯލިޙް ވަނީ ސިޔާސީ ހައްޔަރީން ގޭބަންދަށް ބަދަލުކުރުމުގެ އިތުރުން "ސިޔާސީ ހައްޔަރީން މިނިވަންކުރުމާއި ބެހޭ ކޮމިޓީ" އެއްވެސް ވެރިކަމުގެ ފުރަތަމަ ދުވަހު އުފައްދަވާފައެވެ.
ދައުލަތުން ގެއްލިފައިވާ ފައިސާ ހޯދުމުގެ މަސައްކަތް ފައްޓަވާނެކަމަށް ކެމްޕޭންގެ ތެރެއިން އެތައް ފަހަރަކު ރައީސް ސޯލިހާއި ގުޅިފައިވާ ޕާޓީތަކުން ތަކުރާރުކޮށް ދިޔައީ ބުނަމުންނެވެ. އަދި ރައީސް ސޯލިހަށް ވޯޓު ދިން ގިނަ ބަޔަކު އެމަނިކުފާނަށް ވޯޓު ދިން އެއް ސަބަބަކީވެސް އެވައުދެވެ. ދައުލަތުން ފާއިތުވި 5 ވަރަކަށް އަހަރު ތެރޭ ބިލިއަނުން ފައިސާ ގެއްލިފައިވާއިރު، މި ފައިސާ އަކީ ރައްޔިތުންގެ ފައިސާއެވެ. އެފައިސާއަށް ވީގޮތް ހޯދައި، ފައިސާ ހޯދުމުގައި ދިވެހި ކޮންމެ ރައްޔިތެއްގެވެސް އުއްމީދެވެ. ވެރިކަމުގެ ފުރަތަމަ ދުވަހުވެސް ދައުލަތުން ގެއްލުނު ފައިސާ ހޯދުމުގެ މަސައްކަތް ފައްޓަވާނެކަމަށް ރައީސް ސޯލިޙް ވެވަޑައިގެންނެވި ވައުދު އެވަނީ ފުއްދަވާފައެވެ. "ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ" ގެ ނަމުގައި އެވަނީ ޚާއްސަ ރިޔާސީ ކޮމިޝަނެއް އުފައްދަވައި، އެމަސައްކަތް ފައްޓަވާފައެވެ.
ރައީސް ސޯލިޙް އެމަނިކުފާނުގެ ވެރިކަމުގެ ފުރަތަމަ ދުވަހު ކުރައްވާނެކަމަށް ފަލަސުރުޚީ ޕްރޮގްރާމްގައި ވައުދުވެވަޑައިގެންނެވި 3 ވަނަ ކަމަކީ އަނިޔާވެރި ގޮތަކަށް މަރާލާފައިވާ އަދި ވީނުވީ ނޭނގި ގެއްލިފައިވާ ފަރާތްތަކަށް ވީނުވީ ގޮތް ހޯދައި، މަރުތަކުގެ ހަގީގަތް ހޯދުމަށް މަސައްކަތް ފެއްޓެވުމެވެ. ނޫސްވެރިޔާ ރިލްވާންގެ އިތުރުންވެސް އެތައް ބަޔަކު ވީނުވީއެއް ނޭނގި ގެއްލިފައިވާއިރު، ބްލޮގަރ މަރްހޫމް ޔާމީން ރަޝީދާއި މަރްޙޫމް އަފްރާޝީމްގެ އިތުރުން މާލޭގެ މަގުތަކަށް މަރާލާ ވައްޓާލި އެތައް ޒުވާނެއްގެ މަރުގެ ޙަޤީގަތް ހޯދަން ދިވެހިން މިއަދު ބޭނުންވެއެވެ. އެކަމަށްޓަކައި ރައީސް ސޯލިޙް އެވަނީ "މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަން"ގެ ނަމުގައި ޚާއްސަ ކޮމިޝަނެއް ވެރިކަމުގެ ފުރަތަމަ ދުވަހު އެކުލަވާލައްވާފައެވެ.
ވެރިކަމުގެ ފުރަތަމަ ދުވަހު ކުރައްވާނެކަމަށް ވައުދުވެވަޑައިގެންނެވި 3 ކަންތައް ފުއްދެވި ފަދައިން، ރައްޔިތުން ދެން ދެކެން ބޭނުންވަނީ އެވައުދުތަކުން ރައްޔިތުން ނިކުންނަން ބޭނުންވި ނަތީޖާތައް ނިކުތުމެވެ. އަދި ވެރިކަމުގެ ފުރަތަމަ 100 ދުވަހު ކުރައްވާނެކަމަށް ވައުދުވެވަޑައިގެންނެވި ކަންތައްވެސް ކުރެއްވުމެވެ. ވެވަޑައިގެންނެވި އެހެން ވައުދުތައްވެސް ފުއްދަވައި، މެނިފެސްޓޯ ހަޤީޤަތަކަށް ހައްދަވައި ދެއްވުމެވެ. ރައްޔިތުން މިތިބީ ވާނުވާ ބަލާށެވެ.
