ހުވާ ކުރެއްވުމުގެ ރަސްމިއްޔާތުގައި 46 ގައުމެއްގެ އިއްޒަތްތެރިން ބައިވެރިވާނެ: ފޮރިން މިނިސްޓްރީ
19 ނޮވެމްބަރު 2018 | ހޯމަ 04:47ހުވާ ކުރެއްވުމުގެ ރަސްމިއްޔާތު އޮންނާނީ ގަލޮޅު ދަނޑުގައި
ފޮރިން މިނިސްޓްރީ
އިންތިހާބީ ރައީސް އިބްރާހިމް މުހައްމަދު ސޯލިހު އަދި އިންތިހާބީ ނާއިބް ރައީސް ފައިސަލް ނަސީމް ހުވާ ކުރައްވާ ރަސްމިއްޔާތަށް 46 ގައުމެއްގެ އިއްޒަތްތެރިން ބައިވެރިވެ ވަޑައިގަންނަވާނެ ކަމަށް ފޮރިން މިނިސްޓްރީން ބުނެފިއެވެ.
ހޮނިހިރު ދުވަހު ގަލޮޅު ދަނޑުގައި އޮންނަ ހުވާކުރެއްވުމުގެ ރަސްމިއްޔާތަށް ވަޑައިގަންނަވާނެ ކަމަށް ފޮރިން މިނިސްޓްރީން ނެރެފައިވާ ލިސްޓުގައި 17 އިއްޒަތްތެރި ބޭފުޅުން ހިމެނިވަޑައިގަންނަވައެވެ.
އޭގެ ތެރޭގައި އިންޑިއާގެ ބޮޑުވަޒީރު ނަރެންދުރަ މޯދީގެ އިތުރުން ސްރީލަންކާގެ ކުރީގެ ރައީސާ ޗަންދްރިކާ ބަންޑާރަނަޔަކަ ކުމާރުތުންގާ ހިމެނިވަޑައިގަންނަވައެވެ. އެގޮތުން ޗަންދްރިކާ ވަނީ ބުރާސްފަތި ދުވަހު ރާއްޖެ ވަޑައިގަންނަވާފައެވެ. މޯދީ ވަޑައިގެންނެވުމަށް ހަމަޖެހިފައި ވަނީ ހޮނިހިރު ދުވަހުއެވެ.
ފޮރިން މިނިސްޓްރީން ބުނީ މި 17 ބޭފުޅުންގެ އިތުރުން އެކި ގައުމުތަކުން އެމްބަސެޑެރުންނާއި، އޮފިޝަލުންނާއި ވިޔަފާރިވެރިންގެ އިތުރުން ބައެއް ލީޑަރުން ވެސް ހުވާ ކުރުމުގެ ރަސްމިއްޔާތުގައި ބައިވެރިވެ ވަޑައިގަންނަވާނެ ކަމަށެވެ.
ހުވާ ކުރެއްވުމުގެ ރަސްމިއްޔާތަށް ސައުދީ އަރަބިއްޔާ، ފަލަސްތީނު، ޕާކިސްތާނު، ސްރީލަންކާ، ޗައިނާ، ޖަޕާން، މޮރޮކޯ، އެމެރިކާ، ޝީޝެލްސް، މޮރިޝަސް، އަދި ޔޫއޭއީގެ އިސްވެރިން ބައިވެރިވެ ވަޑައިގެންނެވުމަށް ވަނީ ހަމަޖެހިފައިވެއެވެ.
ހުވާ ކުރެއްވުމުގެ ރަސްމިއްޔާތު ހޮނިހިރު ދުވަހު ހަވީރު 17:00 ގައި ފެށުމަށް ހަމަޖެހިފައިވާއިރު، މި ރަސްމިއްޔާތުގައި 11،500 ބޭފުޅުން ބައިވެރިވެ ވަޑައިގަންނަވާނެ އެވެ.
