އަބްދުﷲ ޝާހިދު: 25 އަހަރަށް ފަހު މަޖިލީހާ ދުރަށް!

5 ދައުރުގެ 25 އަހަރަށްފަހު ރައްޔިތުންގެ މަޖިލީހުގެ ކުރީގެ ރައީސް އަބްދުﷲ ޝާހިދު މަޖިލީހުގެ މެމްބަރުކަމުން އަންނަ ހޮނިހިރު ދުވަހު އިސްތިއުފާ ދެއްވާއިރު ބުދަ ދުވަހަކީ ޝާހިދު މަޖިލީހަށް ވަޑައިގެންނެވި އެންމެ ފަހު ދުވަހެވެ. ޝާހިދު ވަނީ މަޖިލީހުގެ ރައީސކަމުގެ އިތުރުން ވ. އަތޮޅުގެ މަޖިލިސް މެންބަރުކަމާއި، ކެޔޮދޫ ދާއިރާގެ މަޖިލިސް މެންބަރުކަމާއި އަދި ހެންވޭރު އުތުރު ދާއިރާގެ މަޖިލިސް މެންބަރު ކަން ކުރައްވާފަ އެވެ. މީގެއިތުރުން މިހާރު އެކުލަވާލާފައިވާ ފެހި ގާނޫނުއަސާސީއާއި އޭގެ ކުރިން އަމަލުކުރަމުން ދިޔަ ނޫގާނޫނު އަސާސީ އެކުލަވާލި ހާއްސަ މަޖިލީހުގައި ވެސް އަބްދުﷲ ޝާހިދު ވަނީ މަސައްކަތް ކުރައްވާފަ އެވެ.

ޝާހިދު ވިދާޅުވާގޮތުން މަޖިލީހުގައި ފަންސަވީސް އަހަރު މެދުކެނޑުމެއް ނެތި ހިދުމަތް ކޮށްދެއްވުމަށްފަހު މަޖިލީހަށް އަލްވަދާއު ކިޔުއްވީ ހިޔާލު ފާޅުކުރުމުގެ މިނިވަންކަން ތަންމިނަށް ފަހިކޮށް ދެއްވުމަށްފަހުއެވެ. ޝާހިދު ވިދާޅުވާގޮތުގައި ރައްޔިތުން ސަރުކާރަށް ފާޑުކިޔުން ހުއްޓުވުން އެއީ ރައްޔިތުންގެ ޓެކްސް ފައިސާއިން މުސާރަ ނައިގެން ތިބޭ ބަޔަކު ކުރަން ހެޔޮވާވަރު ކަމެއް ނޫނެވެ. ބުދަ ދުވަހު މަޖިލީހުން އަބުރުގެ ގާނޫނު އުވާލަން ފާސްކޮށްފައިވާއިރު އެގާނޫނު އުވާލުމަށް މަޖިލީހަށް ހުށައެޅުއްވީ ޝާހިދެވެ.

"ގާނޫނުގެ ސަބަބުން އެންމެ ބޮޑު އަނިޔާއެއް ތަހައްމަލުކުރީ ދިވެހި ރިޕޯޓަރުން ޖާނަލިސްޓުން ބްލޮގަރުން ރާއްޖޭގެ ޓީވީ،ސްޓޭޝަންތައް، ޓީވީ ސްޓޭޝަންތައް ވަނީ އެތައް މިލިއަން ރުފިޔާއަކުން ޖޫރިމަނާކޮށްފަ، އެހެން ނަމަވެސް އެކަން މި ހުއްޓުވުނީ. އަބުރުގެ ގާނޫނު މިވަނީ އުވާލާފައި،" ޝާހިދު ވިދާޅުވި އެވެ.

އަބުރުގެ ގާނޫނުގެ އުވާލުމުގެ ބިލް ފާސްކުރި ނަމަވެސް އެބިލް ތަސްދީގު ކުރައްވާނީ ރައީސުލްޖުމްހޫރިއްޔާއަށް ވާތީ އެ ބިލް ރައީސް އަބްދުﷲ ޔާމީން ތަސްދީގު ނުކުރައްވައިފިނަމަ އާސަރުކާރު ވެރިކަމަށް އައިސް އެންމެ ފުރަތަމަ ކުރާނެ ކަމަކީ ބިލްގެ ގޮތުގައި ތަސްދީގު ކުރުން ކަމަށް ޝާހިދު ވިދާޅުވިއެވެ.

"ރައީސް ޔާމީން އެބިލް ތަސްދީގު ނުކުރައްވައިފިނަމަ މީޑިއާގެ ބޭފުޅުންނަށް އެ ފުރުސަތު ދިނުން އެއީ އެމަނިކުފާނުގެ ފުރަތަމަ ހަދިޔާގެ ގޮތުގައި ވެގެން ދާނެ." ޝާހިދު ވިދާޅުވި އެވެ.

މަޖިލީހުގެ 5 ދައުރު ހޭދަކުރެއްވިއިރު ކުރިމަތިވެ ވަޑައިގެންނެވި ތަޖުރިބާތައް ހިއްސާ ކުރައްވަމުން ޝާހިދު ވިދާޅުވީ ރައްޔިތުންގެ މަޖިލީހަށް ވަދެވަޑައިގެންނެވުމުން އިންތިޚާބީ ރައީސް އިބްރާހިމް މުހައްމަދު ސޯލިހު ހިމެނިވަޑައިގަންނަވާ ގޮތަށް ގައުމުގެ އަމަން ބަލަހައްޓާ ބޭފުޅުން މަޖިލިސް މެމްބަރުން ނެރެގެން ގެންދިޔަ ދުވަސް އެއީ އުއްމީދު ކުރެއްވި ދުވަހެއް ނޫންކަމަށެވެ.

"މަޖިލީހުގެ ރައީސްކަން ކުރުމަށްފަހު މި ރައްޔިތުންގެ މަޖިލީހަށް ރައްޔިތުން ފޮނުވާފައިހުރި މީހެއްގެ ގޮތުން އައިސް ވަނީމާ މަޖިލީސް ތެރެއިން އުފުރާލައިގެން ރާއްޖޭގެ އަމަން ބަލަހައްޓާ މީހުން މިތަނުން އަޅުގަނޑު ނެރެގެން ވެސް ގެންދިޔަ. އަޅުގަނޑު އުއްމީދު ކުރި ދުވަހެއް ނޫން އެއީކީ. އަޅުގަނޑު އުއްމީދެއް ނުކުރަން އެގޮތަށް ގެންގޮސްފާނޭ. އަޅުގަނޑާއި އަޅުގަނޑާއި އެއްކޮށް އުޅުނު މީހުން އޭގެ ތެރޭގައި މިއަދު ގައުމުގެ ރައީސެއްކަމުގައި އިންތިޚާބުވެވަޑައިގެންފައި ހުންނެވި އިބްރާހިމް މުހައްމަދު ސޯލިހު ހިމެނިވަޑައިގަންނަވާގޮތަށް މިތަނުން ނެރެގެން ގެންދިޔަ. އެހުންނަނީ ރައްޔިތުންގެ މަޖިލީހުގެ ތެރޭގައި ކުރެވޭ ތަޖުރިބާތައް އިނގޭތޯ." ޝާހިދު ވިދާޅުވިއެވެ.

މަޖިލިސް މެންބަރު ކަމުން އިސްތިއުފާ ދެއްވުމަށްފަހު ޝާހިދު ފެނިވަޑައިގަންނަވާނީ ރައްޔިތުންނަށް ހިދުމަތް ކުރެއްވުމުގައި އިންތިޚާބީ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ތެރެއިންނެވެ. ނަމަވެސް ފެނިވަޑައިގަންނަވާނީ ކޮން މަގާމަކުން ކަމެއް ހާމައެއް ނުކުރައްވައެވެ.

އާ ރައްޔިތުންގެ މަޖިލީހަކަށް ކުރެވޭ އުއްމީދަކަށް ޝާހިދު ވިދާޅުވީ ރައްޔިތުންގެ ބައިވެރިވުން މަޖިލީހުން ފެނުމެވެ.