ސަރުކާރު ހިއްސާވާ 25 ކުންފުނީގެ ތެރެއިން ފައިދާވަނީ ޖުމްލަ ނުވަ ކުންފުންޏަކަށް ކަމަށް ޓްރާންސިޝަން ކޮމެޓީން ބުނެފިއެވެ.

ސަރުކާރު ހިންގާ ކުންފުނިތަކުގެ އެސެސްމެންޓެއް ހެދުމަށް ފަހު ޓްރާންސިޝަން ކޮމެޓީން ބޭއްވި ނޫސްވެރިންގެ ބައްދަލުވުމެއްގައި އެކޮމެޓީގައި ހިމެނިވަޑައިގަންނަވާ އިލްޔާސް ލަބީބު ވިދާޅުވީ އެކުންފުނިތަކުން އެކި ފަރާތްތަކަށް 3.9 ބިލިއަން ރުފިޔާ ދައްކަންޖެހޭ ކަމަށް ބެލިބެލުމުން ފާހަގަކުރެވިފައިވާ ކަމަށެވެ. އަދި އެހެން ފަރާތްތަކުން 4.4 ބިލއަން ރުފިޔާ އެ ކުންފުނިތަކަށް ލިބެންޖެހޭ ކަމަށް ލިބުނު މައުލޫމާތުތަކުން އެނގިލައްވާ ކަމަށެވެ. ސަރުކާރު ހިއްސާވާ ކުންފުނިތަކުގައި 22،212 މުއައްޒަފުން، މަސައްކަތް ކުރަމުންދާ ކަމަށް އިލްޔާސް ވިދާޅުވިއެވެ. ކުންފުނިތަކުން ލިބޭ މިންވަރަށް ވުރެ އިތުރަށް ދައުލަތުން އެ ކުންފުނިތަކަށް ބޮޑު އެއްޗެއް ހޭދަކުރާ ކަމަށް ވެސް އިލްޔާސް ވިދާޅުވިއެވެ.

" އަޅުގަނޑުމެން ބެލީ މި ކުންފުނިތަކުން ދައުލަތުގެ ބަޖެޓުން ކިހާވަރެއް ޚަރަދު ކުރަންޖެހޭތޯ. ބެލިއިރު ކެޕިޓަލް ކޮންޓްރިބިއުޝަންގެ ގޮތުގައި 2019 ވަނަ އަހަރު ދައުލަތުން ދޭންޖެހޭނެ ކަމަށް ބަޖެޓުކޮށްފައި އެބަ އޮތް  784،789،00 މިލިއަން ރުފިޔާ. ސަބްސިޑަރީއާއި ލޯން ރިޕޭމެންޓުގެ ގޮތުގައި 2019 ވަނަ އަހަރު ސަރުކާރު ހިއްސާވާ ކުންފުނިތަކަށް ދައުލަތުގެ ބަޖެޓުގައި އެބައޮތް 1.3 ބިލިއަން ރުފިޔާ. އެހެންކަމުން ދައުލަތުން މި ކުންފުނިތަކުގެ ފަރާތުން ލިބެނީ 891 މިލިއަން ރުފިޔާ. ދައުލަތުން މިކުންފުނިތަކަށް ކެޕިޓަލް ކޮންޓްރިބިއުޝަންގެ ގޮތުގަޔާއި ސަބްސިޑަރީގެ ގޮތުގައި ލޯން ރިޕޭމެންޓުގެ ގޮތުގައި 1.8 ބިލިއަން ރުފިޔާ އެބަދައްކާ. ލިބޭ އެއްޗަކަށްވުރެ ދެގުނަ ދައުލަތުގެ ބަޖެޓުން މި ކުންފުނިތަކަށް އެބަ ޚަރަދު ކުރޭ،" އިލްޔާސް ވިދާޅުވިއެވެ.

އިލްޔާސް ވިދާޅުވީ ޓްރާންސިޝަން ކޮމެޓީން ކުންފުނިތައް އެސެސްކުރުމަށް ކުރި މަސައްކަތުގައި ހަ ކުންފުންޏެއްގެ އެއްބާރުލުން އެއްވެސް ގޮތަކަށް އެކޮމެޓީއަށް ލިބިފައިނުވާ ކަމަށެވެ. އޭގެ ތެރޭގައި ހިމެނެނީ އެޗްޑީސީ، އެމްޕީއެލް، އެމްޓީސީސީ، ޕީއެސްއެމް، އާސަންދަ، ކައްދޫ އެއާޕޯޓް ކުންފުނި އަދި ފެނަކަ ހިމެނޭ ކަމަށެވެ. ރަސްމީކޮށް އެ ކުންފުނިތަކުގެ އެއްބާރުލުން ނުލިބުނު ކަމުގައިވިއަސް ކުންފުނިތަކުގެ މުއައްޒަފުންގެ ފަރާތުން އެއްބާރުލުން ލިބުނު ކަމަށް އިލްޔާސް ވިދާޅުވިއެވެ.