ފުޑް އެލާރޓް: ޑަންކެން ހައިންސްގެ ކޭކު މިކްސް އިން ސަލްމޮނެއްލާ ޖަރާސީމު ފެނިއްޖެ!
7 ނޮވެމްބަރު 2018 | ބުދަ 12:23މި އުފެއްދުންތައް ވިއްކަން ހުރިކަން ފާހަގަކުރެވިއްޖެ ނަމަ އެމްއެފްޑީއޭގެ ނަންބަރު 3014361 ފޯނަށް ގުޅުއްވާ
ޑަންކެން ހައިންސްގެ ކޭކު މިކްސް
ޑަންކޭން ހައިންސް ބްރޭންޑްގެ ކޭކު މިކްސްތަކުން "ސަލްމޮނެއްލާ" ޖަރާސީމު ފެނުމާ ގުޅިގެން އެ ބްރޭންޑްގެ ބައެއް އުފެއްދުންތައް ބާޒާރުން ނަގަން ފަށައިފިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުދަ ދުވަހު ނެރުނު ބަޔާނެއްގައި ބުނެފައި ވަނީ އެމެރިކާގެ ފުޑް އެންޑް ޑްރަގް އަދި ކޮމިޔުނިކަބަލް ޑިސީސް ކޮންޓްރޯލް އިން "ސަލްމޮނެއްލާ" ޖަރާސީމުގެ އައުޓް ބްރޭކްއަކާ ގުޅިގެން އެކަން ތަހުޤީގުކުރަމުންދާ ކަމަށާއި، މިހާތަނަށް އެ ޖަރާސީމު ފެނިފައި ވަނީ ޑަންކޭން ހައިންސް ބްރޭންޑްގެ ބައެއް ކޭކު މިކްސްތަކުން ކަމަށް އެ އޮތޯރިޓީތަކުން ހާމަކުރާ ކަމަށެވެ.
އެ ޖަރާސީމު އެކުލެވިފައިވާ ކަމަށް ލަފާކުރެވެނީ ޑަންކޭން ހައިންސް ކްލެސިކް ވައިޓް ކޭކް މިކްސް 15.25oz އާއި ކްލެސިކް ޔެލޯ ކޭކު މިކްސް 15.25oz، އަދި ބަޓާ ގޯލްޑެން ކޭކް މިކްސް 15.25ozގެ އިތުރުން ސިގްނޭޗަރ ކޮންފެޓީ ކޭކު މިކްސް 15.25oz އިން ކަމަށް އެމްއެފްޑީއޭ އިން ބުނެއެވެ.
އެމްއެފްޑީއޭ އިން ބުނީ މި ކޭކު މިކްސްތައް ރާއްޖެއަށް އެތެރެކޮށް ވިއްކުމާއި، ވިއްކަން ބެހެއްޓުމަކީ މަނަކާ ކަމެއް ކަމަށެވެ. އަދި އެތަކެތި ބޭނުން ނުކުރުމަށް ވެސް އެ އޮތޯރިޓީ އިން ވަނީ އިލްތިމާސްކޮށްފައެވެ.
