ޔުވަންޓަސް އިން ރެއާލް މެޑްރިޑަށް ކުޅެމުން އަންނަ ކްރޮއޭޝިއާގެ މިޑްފިލްޑަރު ލޫކަ މޮޑްރިޗް ހޯދުމަށް މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

ޑޮން ބެލޮން އިން ބުނީ ޔުވަންޓަސްގެ މިޑްފިލްޑް ވަރުގަދަކުރުމުގެ ގޮތުން މޮޑްރިޗް ހޯދުމަށް އެ ކްލަބުން މަސައްކަތް ކުރަމުން އަންނަ ކަމަށާއި، އެގޮތުން ވަރަށް އަވަހަށް އޭނާ ހޯދުމަށް ބިޑެއް ހުށަހެޅުމަށް އުޅޭ ކަމަށެވެ.

ނިމިދިޔަ ޓްރާންސްފާ ބާޒާރުގައި އިންޓަ މިލާނުން ވެސް ހޯދަން މަސައްކަތްކުރި މޮޑްރިޗް ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި އެމެރިކާ ލީގުގެ ކްލަބްތައް ވެސް ހިމެނެއެވެ.

ރެއާލްއާ އެކު މޮޑްރިޗް ހަދާފައިވާ އެއްބަސްވުން 2016 ވަނަ އަހަރު އާކޮށްފައިވާއިރު، އޭނާ ހަދާފައިވާ އާ އެއްބަސްވުން ހަމަވާނީ 2020 އަހަރެވެ.

ދާދި ފަހުން ނޫސްވެރިންނަށް މައުލޫމާތު ދެމުން ރެއާލްގެ ރައީސް ފްލޮރެންޓީނޯ ޕެރޭޒް ވިދާޅުވީ، މޮޑްރިޗް ދޫކޮށްލެވެން އޮތް ހަމައެކަނި ގޮތަކީ އޭނާ ހޯދުމަށް 750 މިލިއަން ޔޫރޯ ކްލަބަކުން ހުށަހެޅުން ކަމަށެވެ.

ރަޝިއާގައި ނިމިގެންދިޔަ ވޯލްޑް ކަޕްގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ މޮޑްރިޗް ވަނީ ނިމިގެންދިޔަ ސީޒަނުގައި ރެއާލްއާއެކު ޖެހިޖެހިގެން ތިންވަނަ ފަހަރަށް ޔުއެފާ ޗެމްޕިއަންސް ލީގު ކާމިޔާބުކޮށްފައެވެ.

ޓޮޓެންހަމް ހޮޓްސްޕާ އިން ވިދާލި މޮޑްރިޗް ބާސާ އަށް ބަދަލުވީ 2012 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް ކުޅުނު 272 މެޗުގައި 13 ލަނޑު ކާމިޔާބުކޮށްފައެވެ.

ކްރޮއޭޝިއާގެ މޮޅު ފުޓުބޯޅަ ކުޅުންތެރިޔާގެ މަގާމު ފާއިތުވެދިޔަ ދެއަހަރުވެސް ހޯދާފައިވާ މޮޑްރިޗް ވަނީ އެޓީމަށް ކުޅުނު 116 މެޗުގައި 14 ލަނޑު މިހާތަނަށް ކާމިޔާބުކޮށްފައެވެ.