ރިޔާސީ އިންތިހާބުގައި ބޭނުން ކުރި ވޯޓު ކަރުދާސް ޝްރެޑްކޮށް، އަންދާލައިގެން ނައްތާލުމުގެ މަސައްކަތް އިލެކްޝަންސް ކޮމިޝަނުން ފަށައިފިއެވެ.

އިލެކްޝަންސް ކޮމިޝަނުން އަންގާރަ ދުވަހު ބޭއްވި ޕްރެސް ކޮންފަރެންސްގައި އެ ކޮމިޝަންގެ ރައީސް އަހުމަދު ޝަރީފު ވިދާޅުވީ ރިޔާސީ އިންތިހާބުގައި ބޭނުންކުރި ވޯޓު ކަރުދާސް ނައްތާނުލައި ބަހައްޓަންޖެހޭ ގާނޫނީ މުއްދަތު ފަހަނައަޅާފައިވާ ކަމަށެވެ. ވޭތުވެދިޔަ މުއްދަތުގައި އެ ތަކެތި ނައްތާނުލައި މަޑުކުރީ އިންތިހާބާ ބެހޭ ގޮތުން ސުޕްރީމް ކޯޓަށް މައްސަލައެއް ހުށަހެޅުމުން ކަމަށް ޝަރީފު ވިދާޅުވިއެވެ.

އޭނާ ވިދާޅުވީ އިންތިހާބާ ގުޅޭ ހުރިހާ ލިޔެކިއުމެއް ނައްތާ ނުލާ ކަަމަށާއި ހަމައެކަނި ނައްތާލީ ވޯޓު ކަރުދާސްތަކާއި ވޯޓުކަރުދާހާ ގުޅުން ހުރި ލިޔެކިއުންތައް ކަމަށެވެ.

"ވޯޓުލުމަށް ބޭނުން ކުރި ވޯޓު ކަރުދާސް، އަޅުގަނޑުމެން މިއަދު ވާނީ ނައްތާލާފައި. ޝްރެޑްކޮށް ނިންމާފައި. މިއަދު ގަޑިއެއްގައި ނުވަތަ މާދަމާގެ ގަޑިއެއްގައި ފަޔާ އެންޑް ރެސްކިއުގެ ބެލުމުގެ ދަށުން އަޅުގަނޑުމެން އެ ކަރުދާސްތައް އަންދާލުމުގެ މަސައްކަތް ކުރާނަން،" އިލެކްޝަންސް ކޮމިޝަންގެ ރައީސް ވިދާޅުވިއެވެ.

ޝަރީފު ވިދާޅުވީ އިންތިހާބުގެ "ކަން ހިނގި ގޮތުގެ ރިޕޯޓު" ތައްޔާރުކޮށް، ވޯޓުލީ މީހުންގެ ރަޖިސްޓްރީ އެ ކޮމިޝަނުން ފައިލްކޮށް، ރައްކާކުރާނެ ކަމަށެވެ.

އިލެކްޝަންސް ކޮމިޝަނުން ބުނި ގޮތުގައި ރައްޔިތުންގެ މަޖިލީހުގެ އިންތިހާބުގެ ދާއިރާތައް ވަނީ ފައިނަލްކޮށްފައެވެ. އެ ނިންމުމާއެކު 19 ވަނަ ރައްޔިތުންގެ މަޖިލީހަށް ދެ ދާއިރާއެއް އިތުރުކޮށް، މަޖިލީހުގެ މެމްބަރުންގެ އަދަދު 87 އިތުރުވާނެއެވެ. މަޖިލީހަށް އިތުރުވާ ދެ ދާއިރާއަކީ މައްޗަންގޮޅީ މެދު ދާއިރާ އާއި ހެންވޭރު ހުޅަނގު ދާއިރާއެވެ. ހުޅުހެންވޭރު ދާއިރާ ބަދަލު ވެގެންދާނީ ހުޅުމާލެ ދާއިރާއަށެވެ.

އެކަމާ ގުޅޭ ގޮތުން ޝަރީފު ވިދާޅުވީ މަޖިލީހަށް އިތުރު ކުރާ ދެ ދާއިރާއާ އެކު، މަޖިލީހުން އިންތިހާބީ ދާއިރާތަކުގެ ރިޕޯޓް ގެޒެޓް ކުރަން ފޮނުވާފައިވާ ކަމަށާއި މަޖިލީހަށް ދެން އެއްވެސް ދާއިރާއެއް އިތުރު ނުކުރާނެ ކަމަށެވެ.

"[ދެ ދާއިރާއެއް] އިތުރު ކުރުން ފިޔަވައި، ވޭތުވެދިޔަ ރައްޔިތުންގެ މަޖިލީހުގެ އެހެން އެއްވެސް އިންތިހާބީ ދާއިރާއަކަށް އެއްވެސް ސިފައެއްގައި ބައުންޑްރީއަށް ވެސް އަދި އާބާދީ އެއްވަރު ކުރުމުގެ ނިޔަތުގައި ވެސް އެއްވެސް ކަހަލަ ބަދަލެއް ނުގެންނަން އިލެކްޝަންސް ކޮމިޝަނުން މި ވަނީ ނިންމާފައި،" އިލެކްޝަންސް ކޮމިޝަންގެ ރައީސް ޝަރީފު ވިދާޅުވިއެވެ.

އައްޑޫ ސިޓީއަށް ދެ ދާއިރާއެއް އިތުރު ކުރުމަށް އެ ސިޓީން އެދިފައިވާ މައްސަލާގައި ވާހަކަފުޅު ދައްކަވަމުން އެ ކޮމިޝަންގެ މެމްބަރު އަހުމަދު އަކްރަމް ވިދާޅުވީ އެ ސިޓީއަށް ދެ ދާއިރާ އިތުރު ނުކުރުމަށް ނިންމީ ކޮމިޝަންގައި މަޝްވަރާ ކުރުމަށްފަހު، މަސްލަހަތަށް ކަމަށެވެ.

"ކޮމިޝަނުން ނިންމި އެންމެ މަސްލަހަތު ހުރި ގޮތަކީ މިހާރު ވެސް މިއޮތް ގޮތަށް އެއްވެސް ދާއިރާއެއް އިތުރު ނުކޮށް، އަދި އިންތަކަަށް ވެސް އެއްވެސް ބަދަލެއް ނުގެނެސް، ކުރިއަށް ގެންދިއުމަށް،" އަކްރަމް ވިދާޅުވިއެވެ.