ސްވިޓްޒަލެންޑްގެ މަޝްހޫރު ހޮޓެލް ޗެއިން މޫވެންޕިކް ހޮޓެލްސް އެންޑް ރިސޯޓްސް އިން ރާއްޖޭގައި ހެދި ފުރަތަމަ ރިސޯޓް ނ. ކުރެދިވަރުގައި ހުޅުވައިފިއެވެ.

އެ ރިސޯޓު 105 ކޮޓަރިއާ އެކުގައި ހުޅުވާފައިވާއިރު 72 އޯވާ ވޯޓަރ ވިލާ، 30 ބީޗް ޕޫލް ސުއިޓް އާއި ތިން ބީޗް ސްޕާ ޕޫލް ރެސިޑެންސް ހުރެއެވެ. އަދި މޫވެންޕިކްގެ އާ ރިސޯޓުގައި 14 ކޮޓަރީގެ ޕްރައިވެޓް ރޫމް ހިމެނޭ ސްޕާއެއް އަދި ޔޯގާ އާއި އެންމެ ޒަމާނީ ފެންވަރުގެ ޖިމަކާއި ކުޅިވަރު ކުޅޭނެ ތަނެއް ވެސް ހުރެއެވެ.

މޫވެންޕިކް އިން ބުނީ ވަށައިގެން ހިތްގައިމު މޫދާއި ފަރު އޮންނަ އެ ރަށަކީ ފަތުރުވެރިންގެ މެދުގައި ވަރަށް މަގުބޫލު ރިސޯޓަކަށްވާނެ ކަމަށާއި އެރަށުގައި މަތީ ފެންވަރުގެ ބީޗް ސްޕާއަކާއި ޑައިވް ސެންޓަރެއް ހަދާނެ ކަމަށެވެ. އަދި އޭގެ އިތުރުން ފަތުރުވެރިންނަށް ހާއްސަ ޔޮޓަކާއި މެރިން ރީސާޗް ސެންޓަރެއްގެ އިތުރުން ޕްރައިވެޓް މެރީނާއެއް ވެސް ހިމެނޭނެ ކަމަށް އެ ފަރާތުން ބުންޏެވެ.

ރިސޯޓުގައި ތިން ރެސްޓޯރަންޓްގެ އިތުރުން ބާރއެއް ވެސް ހުރެއެވެ. އަދި އެ ތަނުން މޫވެންޕިކްގެ މަޝްހޫރު އުފެއްދުންތައް ވެސް ލިބެން ހުންނާނެއެވެ.

ނ. އަތޮޅުގައި މިހާރު ވެސް މަތީ ފެންވަރުގެ ހަ ރިސޯޓެއް އަންނަނީ ހިންގަމުންނެވެ. އޭގެ ތެރޭގައި ޝެވަލް ބްލަންކް ރަންދެލި އާއި ވެލާ ޕްރައިވެޓް އައިލެންޑް، ސޮނޭވާ ޖާނީ އަދި ރޮބިންސަން ކްލަބް ނޫނު ހިމެނެއެވެ.

މޫވެންޕިކް ހޮޓާތައް އޭޝިއާ، ޔޫރަޕް، އެފްރިކާ އަދި މެދުއިރުމަތީގެ 23 ގައުމެއްގައި މިހާރު ވެސް ހިންގަމުންދެއެވެ.