ނުކުޅެދުންތެރިކަން ހުންނަ މީހުންނަށް ކުރިމަތިވާ ތަފާތު މައްސަލަތައް ހައްލުކުރުމަށް އެންމެންގެ އެހީތެރިކަން ބޭނުންވޭ: ޑެޕިއުޓީ މިނިސްޓަރު ލީޝާ
ނުކުޅެދުންތެރިކަން ހުންނަ މީހުންނަށް އާއިލާއާއި މުޖުތަމައުގެ ތެރެއިން ތަފާތުކޮށް، އިހުމާލުވޭ
ޖެންޑާ މިނިސްޓްރީގެ ބައެއް އިސްވެރިން، ވޯކްޝޮޕުގެ ބައިވެރިންނާއެކު
ނުކުޅެދުންތެރިކަން ހުންނަ މީހުންނަށް ކުރިމަތިވާ ތަފާތު މައްސަލަތައް ކޮންމެ މަހަކު ވެސް ޖެންޑާރ މިނިސްޓްރީއަށް ހުށަހަޅާ ކަމަށާއި، މިފަދަ އަމަލުތައް ހުއްޓުވުމަށް މުޅި މުޖުތަމައުގެ އެހީތެރިކަން ބޭނުންވާ ކަމަށް އެމިނިސްޓްރީގެ ޑެޕިއުޓީ މިނިސްޓަރު ލީޝާ މުހައްމަދު ވިދާޅުވެއްޖެއެވެ.
އަޑުއިވުމުގެ ނުކުޅެދުންތެރިކަން ހުންނަ މީހުން ބާރުވެރިކުރުވުމުގެ ގޮތުން 9 ދުވަހަށް ކުރިއަށް ގެންދިޔަ ވޯކްޝޮޕް ނިންމުމުގެ ރަސްމިއްޔާތުގައި ޑެޕިއުޓީ މިނިސްޓަރު ލީޝާ ވިދާޅުވީ ނުކުޅެދުންތެރިކަން ހުންނަ ފަރާތްތަކަށް، އާއިލާއާއި މުޖުތަމައުގެ ތެރެއިން ކުރިމަތިވާ ތަފާތުކުރުންތަކާއި އިހުމާލުގެ މައްސަލަތައް ކޮންމެ މަހަކު ވެސް މިނިސްޓްރީއަށް ހުށަހެޅޭ ކަމަށެވެ. އަދި އެ ފަރާތްތައް ހިމާޔަތްކޮށް، މި ފަދަ އަމަލުތައް ހުއްޓުވުމަށް މުޅި މުޖުތަމައުގެ އެހީތެރިކަން ބޭނުންވާ ކަމަށެވެ.
އަޑުއިވުމުގެ ނުކުޅެދުންތެރިކަން ހުންނަ މީހުން ބާރުވެރިކުރުވުމުގެ ގޮތުން ކުރިއަށް ގެންދިޔަ ވޯކްޝޮޕަށް އަލިއަޅުއްވާ ލައްވާ ޑެޕިއުޓީ މިނިސްޓަރު ލީޝާ ވިދާޅުވީ މިފަދަ ޕްރޮގްރާމްތަކުގެ ސަބަބުން ނުކުޅެދުންތެރިކަން ހުންނަ މީހުންނަށް ވެސް އެ މީހުންގެ އަމިއްލަ ދިފާއުގައްޔާއި ރައްކައުތެރިކަމަށް ތެދުވުމަށް ހިތްވަރު ލިބި، ބާރުވެރި ބައެއްގެ ގޮތުގައި ވެގެންދާނެ ކަމަށެވެ.
މިއީ އަޑުއިވުމުގެ ނުކުޅެދުންތެރިކަން ހުންނަ މީހުންނަށް ޚާއްސަ ކުރެވިގެން ރާއްޖޭގައި ހިންގުނު މިފަދަ ފުރަތަމަ ވޯކްޝޮޕެވެ.
ޖެންޑާރ މިނިސްޓްރީން ބުނީ މިފަދަ ވޯކްޝޮޕް ބޭއްވުމުގެ މަގުސަދަކީ އަޑުއިވުމުގެ ނުކުޅެދުންތެރިކަން ހުންނަ މީހުންނަށް ކުރިމަތިވާ އެކި ބާވަތުގެ އަނިޔާތަކާ ދެކޮޅަށް ބާރުވެރިކުރުވުން ކަމަށެވެ. އަދި އެ ފަދަ ކަމެއް ކުރިމަތިވެއްޖެ ނަމަ އަމަލުކުރާނެ އުސޫލުތައް ބާޔާންކޮށްދީ، ހޭލުންތެރިކަން އިތުރުކުރުވުން ކަމަށެވެ.
ޖެންޑާރ މިނިސްޓްރީން ބުނީ މިވޯކްޝޮޕްގައި 22 މީހުން ބައިވެރިވި ކަމަށާއި، ޖިންސީ ފުރައްސާރައާއި، ގެވެށި އަނިޔާއާއި، ޖެންޑަރ އަދި ސޯޝަލައިޒޭޝަންގެ އިތުރުން ބައެއް ޤާނޫނުތަކުގެ މައުލޫމާތު ބައިވެރިންނާ ހިއްސާ ކޮށްފައިވާ ކަމަށެވެ. އޭގެ ތެރޭގައި، ގެވެށި އަނިޔާ ހުއްޓުވުމުގެ ގާނޫނާއި ޖިންސީ ފުރައްސާރަ ހުއްޓުވުމުގެ ގާނޫނު ހިމެނޭ ކަމަށް އެމިނިސްޓްރީން މައުލޫމާތުދެއެވެ.
މި ވޯކްޝޮޕް އިންތިޒާމު ކުރެވުނީ ފެމިލީ ޕްރޮޓެކްޝަން އޮތޯރިޓީއާ ގުޅިގެންނެވެ. އަދި ސެޝަންތައް ކުރިއަށް ގެންދެވިފައިވަނީ ސޮސައިޓީ ފޮރ ހެލްތު އެޑިއުކޭޝަން (ޝީ)، ފެމިލީ ލީގަލް ކްލިނިކް އަދި މޯލްޑިވްސް ޕޮލިސް ސަރވިސްގެ އެހީތެރިކަމާއެކުގައެވެ.
