ދިވެހިންގެ ހުކުމަށް އިހުތިރާމްކޮށް މަރުހަބާ ކިޔަން: އިންޑިއާ
ދިވެހިރާއްޖެ އިން ޑިމޮކްރަސީގެ ހަމަތައް ހިފަހައްޓައި ގަނޫނީ ހުކޫމާތު ދަމަހައްޓާނެ
އިންޑިއާ ސަފީރު އަކިލެޝް ޝަރްމާ އާއި އިންތިޚާބީ ރައީސް ސޯލިހް ބައްދަލުކުރެއްވުން
ދިވެހިންގެ ހުކުމަށް އިންޑިއާ އިން އިހުތިރާމްކޮށް މަރުހަބާ ކިޔާ ކަމަށް އެގައުމުން ބުނެފިއެވެ.
އިންޑިއާގެ ފޮރިން މިނިސްޓްރީން ބުރާސްފަތި ދުވަހު ނެރުނު ބަޔާނެއްގައި ބުނެފައި ވަނީ، ދިވެހިރާއްޖޭގެ ޑިމޮކްރެޓިކް ޕްރޮސެސްގެ ތެރެއިން ބޭއްވުނު ތިންވަނަ ރިޔާސީ އިންތިޚާބުން ރައްޔިތުން ހޮވި ރައީސް އިބުރާހީމް މުހައްމަދު ސޯލިހަށް ކުރިން ވެސް އިންޑިއާ އިން މަރުހަބަ ކިޔައިފައިވާނޭ ކަމަށެވެ. އަދި އެގައުމުގެ ބޮޑުވަޒީރު ނަރެންދުރަ މޯދީ އަމިއްލަފުޅަށް އިބޫ އަށް ގުޅުއްވައި މަރުހަބާ ވިދާޅުވެފައިވާ ކަން ވަނީ ފާހަގަކޮށްފައެވެ.
އިންޑިއާ އާއި ރާއްޖެއަކީ އަޚުވަންތަ ގާތްގުޅުމެއް އަބަދު ވެސް ބާއްވަމުން އައި ދެ ގައުމު ކަަމަށް ވުމާ އެކު އިބޫގެ ޒައާމަތުގައި އެ ގުޅުން އިތުރަށް ވަރުގަދަ ވެގެންދާނެ ކަމަށް އުއްމީދުކުރާ ކަމަށް ބަޔާނުގައި ވެއެވެ.
މި އަހަރުގެ ކުރީކޮޅު ރާއްޖޭގައި އިއުލާނުކުރި ކުއްލި ނުރައްކަލުގެ ހާލަތު އިންޑިއާއިން ބަލައިނުގަތް ނަމަވެސް ރާއްޖެއާ އެކު އޮތް ގާތްގުޅުމަށް ބުރުލެއް އަޔަނުދީ ޑިމޮކްރެސީގެ ހަމަތަކުގެ މަތިން އެ ސްޓޭންޑް ދަމަހައްޓާފައިވާނެ ކަމަށް އިންޑިއާ އިން ބުންޏެވެ.
ދިވެހިރާއްޖެއިން ޑިމޮކްރަސީގެ ހަމަތަށް ހިފަހައްޓައި ގަނޫނީ ހުކޫމާތު ދަމަހައްޓައި، ޑިމޮކްރެސީއަށް ދިން އަހައްމިއްޔަތު މި އިންތިޚާބުން ހާމަވެގެން ހިގައްޖެ ކަމަށް އިންޑިއާ އިން ބުންޏެވެ.
އިންޑިއާ އިން ބުނީ، ރައްޔިތުންގެ މި ނިންމުން ފުރިހަމައަށް ބަލައިގަންނަ ކަމަށާއި ރައްޔިތުންގެ ބާރު އަބަދުވެސް ގަދަވާނެކަމީ ޝައްކެއް ވެސް އޮތް ކަމެއް ނޫން ކަމަށެވެ.
