ފުރާވަރު ކުއްޖެއްގެ ގަޔަށް ވަޅި ހަރައި ޒަހަމްކޮށްލައިފި
10 އޮކްޓޯބަރު 2018 | ބުދަ 22:01ޒަހަމްކޮށްލާފައި ވަނީ 14 އަހަރުގެ ކުއްޖެއް
ޒުވާނާއަށް ހަމަލާދީ ޒަހަމްކޮށްލި ސަހަރައްދު ފުލުހުން ބަންދުކޮށްފައި--
ފުރާވަރު ކުއްޖެއްގެ ގަޔަށް ވަޅި ހަރައި ޒަހަމްކޮށްލައިފިއެވެ.
ބުދަ ދުވަހުގެ ރޭ މެންދަމު ވަޅި ހަރައި ޒަހަމްކޮށްލާފައި ވަނީ އުމުރުން 14 އަހަރުގެ ފިރިހެން ކުއްޖެކެވެ. އޭނާއަށް އޭޑީކޭ ހޮސްޕިޓަލުގައި ދަނީ ފަރުވާ ދެމުންނެވެ. ނަމަވެސް އޭނާގެ އަނިޔާގެ ތަފްސީލެއް އެ ހޮސްޕިޓަލަކުން ހާމައެއް ނުކުރެއެވެ.
ފުރާވަރު އެ ކުއްޖާއަށް ހަމަލާދީފައި ވަނީ ބުދަ ދުވަހުގެ ރޭ މެންދަމު 2:15 ހާއިރު ގަލޮޅު ސަބުދޭރިޔާ މަގުންނެވެ. އޭނާގެ ގަޔަށް ތޫނު އެއްޗަކުން ހަމަލާދީ ޒަހަމްކޮށްލުމުން، އޭނާގެ ގައިން ފޭބި ލޭ ވަނީ އެ ސަރަހައްދު މަގުމައްޗަށް ފައިބާފައެވެ.
މިމާރާމާރީއާ ގުޅިގެން ފުލުހުންގެ ބަހެއް އަދިވަނީ ލިބޭ ގޮތް ނުވެފައެވެ.
ބުދަ ދުވަހުގެ ރޭ މެންދަމު ފުރާވަރު ކުއްޖަކަށް ހަމަލާދީ ޒަހަމްކޮށްލާފައިވާއިރު، ބުދަ ދުވަހުގެ ހެނދުނު ވެސް ވަނީ ވަޅިން ހަމަލާދީ ޒުވާނަކު ޒަހަމްކޮށްލާފައެވެ. އަދި ހޯމަ ދުވަހުގެ ރޭ ޒުވާނެއްގެ ކަރަށް ވަޅި ހެރުމުން ލިބުނު އަނިޔާތަކުގައި ޒަހަމްވި ޒުވާނާގެ ހާލު ވެސް ސީރިއަސްއެވެ. އޭގެ ކުރިން އައްޑޫ ސިޓީގައި ޒަހަމްކޮށްލި ޒުވާނާގެ ހާލު ސީރިއަސްވެ، ނޭވާލަމުންދަނީ ވެންޓިލޭޓަރުގެ އެހީގައެވެ.
ސިލްސިލާ މާރާމާރީތައް އާންމުވެފައިވާޢިރު، ވަޅިތަކެއް ހިފައިގެން މާލޭގައި މާރާމާރީ ހިންގަން އުޅުނު ގްރޫޕެއް ބުދަ ދުވަހުގެ ރޭ މާލެއިން ފުލުހުން ވަނީ ހައްޔަރުކޮށްފައެވެ.
