އެމެރިކާ އާއި ޗައިނާއާ ދެމެދު ފެށިފައިވާ ވިޔަފާރީގެ ހަނގުރާމައިގެ ސަބަބުން ދުނިޔެއަކީ "މިއަށްވުރެ ފަގީރު އަދި އިތުރަށް ބިރުވެރި" ތަނަކަށް ވެގެން ދިއުމުގެ ނުރައްކާ އެބަ އޮތް ކަމަށް އިންޓަރނޭޝަނަލް މަނިޓަރީ ފަންޑު (އައިއެމްއެފް) އިން ބުނެފިއެވެ.

ދުނިޔޭގެ އިގްތިސާދީ ހާލަތާ ގުޅޭގޮތުން އައިއެމްއެފްގެ އެންމެ ފަހުގެ ހޯދުންތައް ހޯދުމަށްފަހު އެ ޖަމާއަތުން ވަނީ މި އަހަރާއި އަންނަ އަހަރަށް އިގްތިސާދު ކުރި އަރާނެކަމަށް ލަފާކުރާ މިންވަރު ދަށްކޮށްފައެވެ.

އެ ޖަމާއަތުން ބުނެފައި ވަނީ އެމެރިކާ އާއި ޗައިނާގެ ވިޔަފާރީގެ ހަނގުރާމަ މައްޗަށް ގޮސްފައިވާއިރު އިގްތިސާދު އިއާދަކުރަން ދަތިވާ ހާލަތަކަށް ގޮސްދާނެ ކަމަށެވެ.

އައިއެމްއެފްގެ ޗީފް އިކޮނޮމިސްޓް ވިދާޅުވީ ވިޔަފާރީގެ ހުރަސްތައް މިއަށްވުރެ އިތުރު ވެއްޖެނަމަ ގޭބިސީތަކާއި، ވިޔަފާރިތަކާއި އަދި ފުޅާ އިގްތިސާދަށް މިކަމުގެ އަސަރު ފޯރާނެކަމަށެވެ.

ވިޔަފާރީގެ ސިޔާސަތުގެ އަސަރުކުރާނެ ސިޔާސީ ކަންކަމަށް އަދި ސިޔާސީ ހަމަނުޖެހުން އުފެދުމުން ގައުމުތައް އިތުރު ނުރައްކަލަށް ހުށަހެޅޭ ކަމަށް މައުރިސް އޮބްސްޓްފެލްޑް ވިދާޅުވިއެވެ.

ޗައިނާއިން ދާދި ފަހުން ވަނީ އެމެރިކާއިން އެގައުމަށް އެތެރެކުރާ 60 ބިލިއަނެއްހާ އެމެރިކާ ޑޮލަރުގެ މުދަލުން ޑިއުޓީ އެއް ނަގަންފަށާފައެވެ. އޭގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕަށް ވަފާތެރި ގައުމުތަކުން އުފައްދާ ގުދުރަތީ ގޭސް ވެސް ހިމެނެއެވެ. އޭގެ ރައްދުގައި ރައީސް ޓްރަމްޕް ކުރެއްވި ޓްވީޓެއްގައި ވަނީ ޗައިނާއިން އުޅެނީ އެމެރިކާގެ މިޑްޓަރމް އިލެކްޝަނަށް ނުފޫޒު ފޯރުވަން ކަމަށެވެ.

ރައީސް ޓްރަމްޕް ވިދާޅުވެފައި ވަނީ ޗައިނާއިން އެމެރިކާގެ ދަނޑުވެރިންނާއި އިންޑަސްޓްރިއަލް މަސައްކަތް ކުރާ ފަރާތްތަކަށް އަމާޒުކޮށް ފިޔަވަޅު އަޅާނަމަ އަވަސްގޮތެއްގައި ބޮޑު އަދި ވަރުގަދަ އިގްތިސާދީ ބަދަލުހިފުމެއް އޮންނާނެކަމަށެވެ.

ޗައިނާއިން އެމެރިކާއަށް ފޮނުވާ 200 ބިލިއަނެއްހާ ޑޮލަރުން ޑިއުޓީއެއް ނަގަން ފެށްޓީ މިދިޔަ މަހުއެވެ.

ދުނިޔޭގެ އިގްތިސާދު 2018 އަދި 2019ގައި ކުރިއަރާނެ ކަމަށް ލަފާކޮށްފައި ވަނީ 3.7 އިންސައްތައެވެ. ނަމަވެސް ޖުލައި މަހު ލަފާކޮށްފައި އޮތީ 3.9 އިންސައްތައިގައި ކުރިއަރާނެކަމަށެވެ.