މާލޭގައި މުޒާހަރާ ކުރުން މަނާކޮށް، ހިޔާލުފާޅު ކުރުން ހުއްޓުވި ޕީޕީއެމުން މިރޭ މުޒާހަރާއަށް!
1 އޮކްޓޯބަރު 2018 | ހޯމަ 15:26ޕީޕީއެމުން ނުކުންނަނީ އޮޅުވާލި ވޯޓުގެ ނަމުގައި
ޕީޕީއެމް ރެލީއެއްގެ ތެރެއިން:
މާލޭގައި މުޒާހަރާ ކުރުން މަނާކޮށް، ހިޔާލުފާޅު ކުރުމަށް ހުރަސް އެޅުމަށް ގާނޫނަށް އިސްލާހު ގެނައި ސަރުކާރު ހިންގާ ޕާޓީ، ޕީޕީއެމުން "އޮޅުވާލި ވޯޓަށް އިންސާފު ހޯދަން" ނަމުގައި މުޒާހަރާއަށް ނުކުތުމަށް ނިންމައިފިއެވެ.
މިރޭ 9.00 ގައި އެ ޕާޓީގެ އޮފީސް ހ. ހުރަފަ ކުރިމައްޗަށް މުޒާހަރާއަށް ނުކުތުމަށް އެ ޕާޓީގެ އިސްވެރިން ވަނީ ޕާޓީގެ އާއްމު މެންބަރުންނަށް ގޮވާލާފައެވެ. ސޯޝަލް މީޑިއާއާއި، މެންބަރުންނަށް ފޮނުވަމުންދާ މެސެޖުތަކުގައި ވަނީ އޮޅުވާލި ވޯޓަށް އިންސާފު ހޯދުމަށް އަޑުއުފުލުމަށް ނުކުތުމަށް ގޮވާލާ ކަމަށެވެ.
ޕީޕީއެމުން އާއްމު މެންބަރުންނަށް ފޮނުވަމުންދާ މެސެޖުގައި ބުނެފައި ވަނީ އީސީން ވޯޓް އޮޅުވާލުމަށް ބޮޑެތި ޖަރީމާތަކެއް ހިންގި ކަމަށް ސޯޝަލް މީޑިއާގައި ދައުރުވަމުންދާ މައުލޫމާތުތަކުގެ ހަގީގަތް ހޯދުމަށް އެ ޕާޓީން ކުރާ މަސަައްކަތުގައި ބައިވެރިވުމަށް އެދޭ ކަމަށެވެ.
ވޯޓްގެ ނަތީޖާ ގަބޫލު ނުކުރަން އެކި އުޒުރުތައް ދެއްކުމަށް ޕީޕީއެމްގެ ސަޕޯޓަރުން މާލޭގެ މަގުތަކަށް ނުކުތުމަށް މި ނިންމީ، އިލެކްޝަންސް ކޮމިޝަންގެ ރައީސް، އަހުމަދު ޝަރީފް އޭނާގެ ރަހުމަތްތެރިޔަކާ އެކު ދެއްކެވި ވާހަކަތަކެއްގެ އޯޑިއޯއެއް ޕީޕީއެމްގެ އިސްވެރިން ސޯޝަލް މީޑިއާއަށް ލީކުކޮށްލައި، ދައުރުކުރަމުންދާ ދަނޑިވަޅެއްގައެވެ.
އަދި މިއަދު ދެ ފަހަރެއްގެ މަތިން ޕީޕީއެމްގެ އެކި މަޖިލިސް މެންބަރުން ޕްރެސްއެއް ދެއްވައި އީސީގެ ވެރިންގެ މައްޗަށް އެކި ތުހުމަތުތައް ކުރެއްވި އެވެ. އެ އޯޑިއޯ އާންމުވީ ވެސް އެއަށް ފަހު އެވެ
ލީކުވެފައިވާ އޯޑިއޯގައި ޝަރީފް ވިދާޅު ވަނީ، މި ވަގުތުގައި ރައީސް ބޭނުންފުޅު ވަނީ ކޮންމެ ގޮތެއް ހަދައިގެން ވެސް ކޮންމެ މީހަކު ގުރުބާން ކޮށްގެން، ވިޔަސް މީތި "ދުއްވާލަން" ކަމަށެވެ. އަދި ފޯނުން ވާހަކަ ދައްކާ މީހާއަށް ޝަރީފް ނަސޭހަތްތެރިވަނީ އެއްވެސް ކަމަކަށް އެއްބަސް ކުރުވަން އުޅުނަސް އެކަން ނުކުރުމަށެވެ.
އީސީގެ ރައީސް ޝަރީފް ވިދާޅުވެފައި ވަނީ، އެ އޯޑިއޯއަކީ އޭނާ މީހަކާ އެކު ވާހަކަ ދެއްކި ފޯން ކޯލްގެ ތަންތަންކޮޅު ނަގައިގެން ހަދާފައިވާ އޯޑިއޯއެއް ކަމަށެވެ.
އެ އޯޑިއޯ އާންމު ވުމާ އެކު އިދިކޮޅު ފަރާތްތަކުން ބުނަނީ ސަރުކާރުން މަސައްކަތް ކުރަނީ އިންތިހާބުގައި އޮޅުވާލުންތަކެއް ހުރި ކަމަށް ބުނެ އިންތިހާބުގެ ނަތީޖާ ބާތިލް ކުރުމަށް ކަމަށެވެ. އަދި ސްޓޭޓް އޮފް އެމެޖެންސީއެއް އިއުލާންކޮށް އީސީގެ މެންބަރުންގެ މައްޗަށް ރިޝްވަތުގެ ތުހުމަތުކޮށް އެ މީހުން ހައްޔަރު ކުރުމަށް ސަރުކާރުން މަސައްކަތް ކުރާ ކަމަށް ވެސް ދަނީ އަޑުފެތުރެމުން ނެވެ.
ސުލުހަވެރިކަމާއި އެކު އެއްވެ އުޅުމުގެ ގާނޫނަށް އިސްލާހު ގެނެސް މާލޭގައި އެއްވުން މަނާކުރީ ސަރުކާރު ހިންގާ ޕާޓީ ޕީޕީއެމުން ހުށައެޅި އިސްލާހެއްގެ ދަށުންނެވެ. އެ އިސްލާހު ހުށައެޅުއްވީ މާފަންނު ދެކުނު ދާއިރާގެ މެންބަރު އަބުދުﷲ ރިފާއު (ބޮޗޭ) އެވެ.
އޭނާ ހުށައެޅުއްވީ މާލޭގައި މުޒާހަރާ ކުރެވޭނީ ހަމައެކަނި ކާނިވާ ސަހައްދުގައި އެކަނި ކަމަށެވެ. އަދި އެއްވާ ނަމަވެސް ކުރިން ފުލުހުންގެ ހުއްދަ ހޯދަން ޖެހޭނެކަމަށްވެސް ވަނީ ކަނޑައަޅާފައެވެ.
