އަންނަ އާދިއްތަ ދުވަހު ނުވަތަ އޭގެ ކުރިން ރިޔާސީ އިންތިހާބުގެ ދާއިމީ ނަތީޖާ އިއުލާން ކުރާނެ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަނުގެ މެމްބަރު އަދި އެކޮމިޝަނުގެ ތަރުޖަމާނު އަހުމަދު އަކްރަމް "ރާއްޖެއެމްވީ"އަށް ވިދާޅުވީ ގާނޫނު ބުނާގޮތުން ދާއިމީ ނަތީޖާ އިއުލާން ކުރުމުގެ އެންމެ ފަހު ދުވަހަކީ އަންނަ އާދިއްތަ ދުވަސް ކަމަށްވާތީ، އާދިއްތަ ދުވަހު ނުވަތަ އޭގެ ކުރިން ދާއިމީ ނަތީޖާ އިއުލާން ކުރައްވާނެ ކަމަށެވެ.
އަކްރަމް ވިދާޅުވީ ރިޔާސީ އިންތިހާބުގައި ވޯޓު ލުމަށް ތަންތާނގައި ބަހައްޓާފައިވާ ބައެއް ވޯޓު ފޮށިތައް އެކޮމިޝަނަށް އަދި ނުލިބޭ ކަމަށާއި ދާއިމީ ނަތީޖާ ލަސްވަނީ އެސަބަބާހުރެ ކަމަށެވެ.
"ދާއިމީ ނަތީޖާ އިއުލާނު ކުރަނީ ވޯޓު ފޮއްޓާއެއާއެކު އަންނަ، އެ މަރުކަޒެއްގެ ވޯޓުގެ ނަތީޖާ ޝީޓްގެ އޮރިޖިނަލް ޝީޓް ލިބުމުން. އަދި ހުރިހާ ވޯޓު ފޮށިތަކެއް ކޮމިޝަނަކަށް ނުލިބޭ،" އަކްރަމް ވިދާޅުވި އެވެ.
ވޯޓުލީ ދުވަހާ ހަމައަށް ހުށަހެޅުނު ޝަކުވާތަކުގެ އިތުރުން އެއްވެސް ޝަކުވާއެއް ހުށަހެޅިފައިވޭތޯ އެހުމުން އަކްރަމް ވިދާޅުވީ ވޯޓުލީ ދުވަހާ ހަމައަށް ހުށަހެޅިފައިވާ 78 ޝަކުވާގެ އިތުރުން، އިތުރު ޝަކުވާއެއް ކޮމްޕްލެއިންސް ބިއުރޯއަށް ލިބިފައިވާކަން އެނގިނުވާ ކަމަށާއި، އިތުރު ޝާކުވާއެއް ހުށަހެޅިފައިވޭތޯ ޖެހޭނީ ބަލާލަން ކަމަށް އަކްރަމް ވިދާޅުވި އެވެ.
ރިޔާސީ އިންތިހާބުގެ ނަތީޖާތައް ވޯޓުލި މަރުކަޒުތަކުން އިއުލާން ކުރުމާއެކު އާދިއްތަ ދުވަހުގެ ރޭ އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމުގައި އެކޮމިޝަނުގެ ރައީސް އަހުމަދު ޝަރީފް ވިދާޅުވީ ވޯޓުގެ ނަތީޖާއަށް އަސަރުކުރާފަދަ އެއްވެސް ޝަކުވާއެއް ލިބިފައިނުވާ ކަމަށެވެ.
އަދި އެކޮމިޝަނުން ވަނީ ވަގުތީ ނަތީޖާވެސް އިއުލާން ކޮށްފަ އެވެ. ނަތީޖާ ދައްކާ ގޮތުން ރިޔާސީ އިންތިހާބު ކާމިޔާބު ކުރައްވާފައިވަނީ ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހު އެވެ. އެމަނިކުފާނަށް 134616 ވޯޓު ލިބިލައްވާފައިވާއިރު އެއީ 58.5 ޕަސެންޓެވެ. ސަރުކާރު ހިންގާ ޕީޕީއެމްގެ ރިޔާސީ ކެންޑިޑޭޓް ރައީސް ޔާމީނަށް ލިބިލައްވާފައިވަނީ 96132 ވޯޓެވެ. އެއީ 41.5 ޕަސެންޓެވެ.
