އޮސްޓްރޭލިއާގެ ބޮޑު ދޫނިތަކަށް ކާރު އެރުވި މީހާ ހައްޔަރުކޮށްފި

އޮސްޓްރޭލިއާގެ އެންމެ ބޮޑު ދޫނި، އީމިއުސްތަކަކަށް ގަސްދުގައި ކާރު އަރުވާ ވީޑިއޯ އާންމު ކުރި މީހާ ހައްޔަރުކޮށްފިއެވެ.

މުޅި އޮސްޓްރޭލިއާ ސިއްސުވާލި މި ވީޑިއޯ، ވީޑިއޯކުރި 20 އަހަރުގެ ޒުވާނާ ހައްޔަރުކޮށްފައި ވަނީ މަގުމަތީގައި ދުވެފައި ދިޔަ 13 އީމިއުސްތަކަކަށް ކާރު އެރުވުމުންނެވެ. ވީޑިއޯ އިން ފެންނަގޮތުގައި 120 ކިލޯ މީޓަރުގެ ބާރުމިނުގައި ކާރު ދުއްވި ފިރިހެން މީހާ ވަނީ އެ ދޫނިތަކުގެ މައްޗަށް ކާރުއެރުވުމަށްފަހު އުފާ ފާޅު ކޮށްފައެވެ.

"ވަރަށް ބަރާބަރު، އަހަންނަށް އެހެރަ ދޫނީތަކުގައި ވެސް ޖެއްސިއްޖެ"

އޮސްޓްރޭލިއާގެ ފުލުހުން ހުކުރު ދުވަހު ބުނީ ހައްޔަރު ކުރި ޒުވާނާގެ މައްޗަށް ވަނީ ޖަނަވާރުގެ ހައްގުތަކާއި ބެހޭ ދައުވާތައް އުފުލާފައި ކަމަށެވެ. އަދި އެ ހާދިސާ ހިނގާފައި ވަނީ އޮސްޓްރޭލިއާގެ މެލްބަންގެ ހުޅަނގު އުތުރުން 500 ކިލޯމީޓަރު ދުރުންކަމަށް ވެސް ފުލުހުން ބުނެއެވެ.

އޮސްޓްރޭލިއާގެ ވިކްޓޯރިއަން ގާނޫނު ބުނާ ގޮތުން ޖަނަވާރުންނަށް ކުރާ އަނިޔާ ސާބިތުވެއްޖެނަމަ ދެ އަހަރަށް ޖަލަށްލުމާއެކު 54،000 ޑޮލަރުގެ ޖޫރިމަނާއެއް އަންނާނެއެވެ.

އެ ފިރިހެން މީހާ ކޯޓަށް ހާޒިރުކުރަން ނިންމާފައި ވަނީ ނުވެމްބަރު މަހުއެވެ. އޭނާގެ ކާރު އެރުވި އީމިއުސް ދޫންޏަކީ، ދުނިޔޭގެ ދެވަނައަށް އެންމެ ބޮޑު ދޫންޏެވެ.