ޖަޕާނުގެ މަޝްހޫރު ސޮނީ ބްރޭންޑްގެ ޝޯރޫމެއް ރާއްޖޭގައި އަލަށް ހުޅުވައިފިއެވެ.

މި ޝޯރޫމް ހުޅުވާފައި ވަނީ ހުޅުމާލޭގެ ހުވަނދުމާ ހިނގުމުގައެވެ. 

ސެޕްޓެމްބަރު 18 ވަނަ ދުވަހުގެ ރޭ މި ޝޯރޫމް ހުޅުއްވައިދެއްވީ ވެސްޓޯރގެ މެނޭޖިންގް ޑައިރެކްޓަރ އަހްމަދު ސައީދާއި ސޮނީގެ ރީޖަނަލް ޕްރެސިޑެންޓް އަޓްސުހީ އެންޑޯއެވެ.

މި ޝޯރޫމް ހުޅުވުމާ ދިމާކޮށް ވެސްޓޯރގެ ފަރާތުން ވަނީ ހާއްސަ ޕްރޮމޯޝަނެއް ވެސް ފަށާފައެވެ. މި ޕްރޮމޯޝަން އަންނަ މަހުގެ 18 ވަނަ ދުވަހާ ހަމައަށް ދެމިގެންދާއިރު ޕްރޮމޯޝަންގެ ދަށުން ސޮނީގެ ހުރިހާ ޕްރޮޑަކްޓްތަކަކުން 10 ޕަސަންޓް ޑިސްކައުންޓް ލިބިގެންދާނެއެވެ.

ޝޯރޫމް އިން ސޮނީ ކެމެރާ، ސޮނީ ޓީވީ، ސޮނީ ސްޕީކަރ، ސޮނީ އޯޑިއޯ ސިސްޓަމްގެ އިތުރުން ޕީއެސް ގޭމް ކޮންސޯލް ފަދަ ޒަމާނީ ގެޖެޓްތައް ވެސް ލިބިގެންދާނެއެވެ،. 

ވެސްޓޯރގެ ސޭލްސް އެންޑް މާކެޓިންގް މެނޭޖަރ އަހްމަދު ރިޔާޒް ވިދާޅުވީ އެ ފަރާތުން އަބަދުވެސް މަސައްކަތްކުރަނީ ކޮލެޓީ ރަނގަޅު ޕްރޮޑަކްޓްތައް ހެޔޮ އަގެއްގައި ކަސްޓަމަރުންނަށް ފޯރުކޮށްދޭން ކަމަށާއި އިތުރު ބްރޭންޑަޑް ޕްރޮޑަކްޓްތައް ރާއްޖޭގެ ބާޒާރަށް ނެރުމަށްޓަކައި ކުރިއަށް އޮތްތަނުގައި ވެސް މަސައްކަތް ކުރައްވާނެ ކަމަށެވެ.

ސޮނީ ޝޯރޫމް އިން ޑެލިވަރީގެ ހިދުމަތް ފޯރުކޮށްދޭއިރު އެ ޝޯރޫމް އިން ލިބެން ހުންނަ ޕްރޮޑަކްޓްތަކާ ބެހޭ މައުލޫމާތު ހޯދުމަށް 9690805 ނަންބަރަށް ގުޅުމަށް ޝޯރޫމް އިން ވަނީ އެދިފައެވެ.

ޝޯރޫމް އިން ވިއްކާ ހުރިހާ ފްރޮޑަކްޓްތަކަށް އެއް އަހަރުގެ ވޮރެންޓީ ލިބިގެންދާނެ ކަމަށް ވެސްޓޯރ އިން ބުންޏެވެ. މީގެ އިތުރުން މާލޭގައި ހުންނަ ވެސްޓޯރގެ ފިހާރަތަކުން ސޮނީގެ ޕްރޮޑަކްޓްތައް ލިބޭނެއެވެ.

ވެސްޓޯރގެ 4 ފިހާރައެއް މިހާރު ވެސް މާލޭގައި ހިންގަމުންދާއިރު ހުޅުމާލޭގައި 2 ފިހާރަ ހިންގައެވެ. ވެސްޓޯރގެ ފަރާތުން ބުނީ ވިޔަފާރި އިތުރަށް ފުޅާ ކުރުމަށް ނިންމާފައިވާ ކަމަށެވެ.