ކެމްޕެއިންގެ ފަހު ދަތުރުފުޅު ނިންމާލެއްވުމަށް އިބޫ އައްޑޫ ސިޓީއަށް!

ރިޔާސީ އިންތިހާބުގެ ކެމްޕެއިންގެ ފަހު ދަތުރުފުޅުގައި ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އައްޑޫ ސިޓީއަށް ވަޑައިގަންނަވައިފިއެވެ.

ކެމްޕެއިންގެ ފަހު ދަތުރުފުޅުގައި އިބޫ އައްޑޫ ސިޓީއަށް ވަޑައިގެންނެވީ ބުރާސްފަތި ދުވަހު ހެނދުނުގެ ވަގުތެއްގައެވެ. އިބޫ އައްޑޫ ސިޓީ މީދޫއަށް ވަޑައިގަތުމުން އެންމެ ފުރަތަމަ އެމަނިކުފާނަން މަރުޙަބާ ދަންނަވާފައި ވަނީ އައްޑޫ ސިޓީގެ މޭޔަރ އަބްދުﷲ ސޯދިގް (ސޯބެ) އެވެ. އިބޫއަށް މަރުޙަބާ ދެންނެވުމުގެ ގޮތުން އައްޑޫ ސިޓީ ހުޅުމީދޫގެ ގިނަ އަދަދެއްގެ އާންމު ރައްޔިތުން ވަނީ ނުކުމެފައެވެ.

މި ދަތުރުފުޅުގައި އިބޫ ވަނީ ހުޅުމީދޫގެ ރައްޔިތުންނާ ބައްދަލުކުރައްވާފައެވެ. މި ދަތުރުފުޅުގައި އިބޫ މެންދުރު ފަހު ދެން ވަޑައިގަންނަވާނީ އައްޑޫ ސިޓީ ފޭދޫ އަށެވެ. އެ އަށް ފަހު މަރަދޫ ފޭދޫ އަށް ވަޑައިގެން އެ އަވަށުގައި ގުޅިފައިވާ ސިޔާސީ ޕާޓީތަކުގެ ޖަގަހަ ހުޅުއްވާދެއްވާނެއެވެ.

އިބޫ އައްޑޫ ސިޓީ މީދޫ އަށް ވަޑައިގަތުމުން އެމަނިކުފާނަން ވަނީ ހޫނު މަރުހަބާއެއް ދަންނަވާފައި

މި ދަތުރުފުޅުގައި އިބޫ އާއި ފައިސަލް ބައިވެރިވަޑައިގަންނަވާ ބޮޑު ޖަލްސާއެއް މިރޭ އައްޑޫ ސިޓީ ހިތަދޫގައި ބޭއްވުމަށް ވަނީ ހަމަޖެހިފައެވެ. މި ޖަލްސާ ބޭއްވުމަށް ހަމަޖެހިފައި ވަނީ މިރޭ 9:30 ގައި އައްޑޫ ސިޓީ ހިތަދޫ ބަނދަރު ސަރަހައްދުގައެވެ. އިބޫ އާއި ފައިސަލް މި އިންތިހާބުގެ ކެމްޕެއިން ފެއްޓެވި އައްޑޫ ސިޓީގައި ބާއްވާ ކެމްޕެއިންގެ މި ފަހު ޖަލްސާގައި ގުޅިފައިވާ ސިޔާސީ ޕާޓީތަކުގެ އިސްވެރިން ބައިވެރިވަޑައިގަންނަވާނެއެވެ.

އިބޫ އާއި ފައިސަލް ވަނީ މި އިންތިހާބުގައި ކެމްޕެއިން ކުރުމަށް ރާއްޖޭގެ މީހުން ދިރިއުޅޭ 187 ރަށަކަށް ވަޑައިގެންފައެވެ. އިބޫ 153 ރަށަށް ވަޑައިގެންނެވިރު، މި އިންތިހާބުގެ ކެމްޕެއިން ދެ ބޭފުޅުން ފެއްޓެވީ ވެސް އައްޑޫ ފުވައްމުލަކުންނެވެ.