އިބޫ ދައްކަވަނީ ސިޔާސަތުތަކުގެ ވާހަކަ، ރައީސް ޔާމީން ކުރައްވާ ކަމަކީ ސިޔާސީ ބޭފުޅުންނަށް ހަމަލާތައް ދިނުން

މިއީ ރިޔާސީ އިންތިހާބުގެ ދުވަސްވަރު އެވެ. އިންތިހާބުގެ އެންމެ ފޯރިގަދަ ދުވަސްވަރު އެވެ. ރައްޔިތުންނަށް ކޮށްދެއްވާނެ ކަންކަމުގެ ވައުދުތައް ވެވަޑައިގަންނަަވަމުން ގެންދަވާ ދުވަސްވަރު އެވެ. އެ ބޭފުޅުންގެ ތަސައްވަރު ރައްޔިތުންނަށް ބުނެދެއްވާ ދުވަސްވަރު އެވެ.

ފޯރިޔާއެކު ކެމްޕޭން ކުރިއަށް ދާއިރު، އިންތިހާބުގެ ދެ ކެންޑިޑޭޓުންގެ ފަރާތުން ފެނިގެންދަނީ ވަރަށްވެސް ތަފާތު މަންޒަރެކެވެ. އެއް ކެނޑިޑޭޓަކު ރާއްޖޭގެ ހުރިހާ ރަށަކަށް ވަޑައިގެން ރައްޔިތުންނާއި ބައްދަލުކޮށް، ރައްޔިތުންގެ ހާލު އޮޅުން ފިލުވުމަށް ހުއްޓުމެއް ނެތި ދަނީ މަސައްކަތްކުރައްވަމުންނެވެ. ހަމަ ނިދި ލިބިވަޑައިނުގަތް ނަމަވެސް ރައްޔިތުންނާއި ބައްދަލުވެ، ރައްޔިތުންގެ އަޑުއެއްސެވުމަށް ކުރައްވާ ދަތުރުފުޅުތަކަށް ވަރަށް ބޮޑު އިސްކަމެއް ދެއްވަ އެވެ.

ދެ ވަނަ ކެންޑިޑޭޓްގެ ފަރާތުންނާއި، ކެމްޕޭން ޓީމްގެ ފަރާތުން ފެނިގެންދަނީ މުޅިން އިދިކޮޅު މަންޒަރު އެވެ. ކެމްޕޭންގައި މިއަދާ ހަމައަށް އައިރު އެކަން އެއޮތީ ރައްޔިތުންނަށް ސާފުވާ މިންވަރަށް ފެނި ހާމަވާށެވެ. ކޮންމެއަކަސް ދައްކަން މި އުޅެނީ އެ ވާހަކައެއް ނޫނެވެ. ދެ ބޭފުޅުންގެ ކެމްޕޭނާއި، ވާހަކަފުޅުތަކުން ފެންނަ އެހެންކަމެއްގެ ވާހަކަ އެވެ.

އިދިކޮޅު އިއްތިހާދުގެ ރިޔާސީ ކެނޑިޑޭޓް އިބްރާހިމް މުހައްމަދު ސޯލިހް (އިބޫ) ރަށްރަށަށް ވަޑައިގެން ކުރައްވާ މަސައްކަތަކީ ރައްޔިތުންނަށް ސިޔާސަތުތައް ވިއްކުމާއި މެނިފެސްޓޯ ހާމަކުރުމުގެ މަސައްކަތެވެ. ރައްޔިތުންނަށް ދިމާވެފައިވާ ހުރި އުދަނގޫތަކާއި، ރައްޔިތުންގެ ބޭނުންތައް އޮޅުން ފިލުމުގެ މަސައްކަތެވެ. ކިތަންމެ ކުޑަ އާބަދީއެއް ދިރިއުޅޭ ރަށެއް ކަމަކު އަދި އާބާދީ ބޮޑު ރަށެއް ކަމަކު، އެކަމުގައި ތަފާތެއް ނުގެންގުޅުއްވަ އެވެ. ރައްޔިތުންގެ ހުރި ވާހަކަތައް ކަނުލާ އަޑު އައްސަވަ އެވެ.

ރައްޔިތުންނާއި ބައްދަލުކުރައްވާ ވާހަކަ ދެއްކެވުމަށް ލިބިވަޑައިގަންނަވާ ޕޯޑިއަމްގެ ބޭނުން ހިތްޕަވަނީ ސިޔާސީ ބޭފުޅުންނަށް ބަހުގެ ހަމަލާތައް ދެއްކެވުމަކަށް ނޫނެވެ. ސިޔާސީ ބޭފުޅުންނަށް އެއްޗެތި ގޮވުމަކަށް ނޫނެވެ. ތިމާގެ ބޮޑާއި ކަމާއި ކިބުުރވެރިކަމާއި ބާރުވެރިކަން ދެއްކުމަކަށް ނޭނެވެ.

އެމަނިކުފާނަށް ލިބިވަޑައިގަންނަވާ ޕޯޑިއަމްގައި ކުރައްވާ ކަމަކީ ރައްޔިތުންނަށް ސިޔާސަތު ވިއްކުމުގެ މަސައްކަތެވެ. މެނިފެސްޓޯ ބުނެދިނުމުގެ މަސައްކަތެވެ. ކުރިއަށް އޮތް ފަސް އަހަރު އެމަނިކުފާނުގެ ތަސައްވަރު ހާމަކުރެއްވުމުގެ މަސައްކަތެވެ. ރަށްރަށަށް ބޭނުންވެފައިވާ ކަންތައްތަކަށް އެމަނިކުފާނަށް ހޯދައިދެވޭނެ ހައްލުތައް ރައްޔިތުންނާއި ހިއްސާކުރެއްވުމުގެ މަސައްކަތެވެ.

ބޮޑާއިކަމާއި ކިބުރުވެރިކަމެއް ނެތި، ރައްޔިތުންނާއެކު ހުންނެވިި ބޭފުޅެއްކަން ހާމަކުރެއްވުމުގެ މަސައްކަތެވެ. އިބޫގެ މުޅިި ކެމްޕޭން ފެނިގެންދަނީ މި ދެންނެވިި މަންޒަރު އެވެ. ދެން އޮތީ އިބޫ އާއި ވާދަކުރައްވާ ކެންޑިޑޭޓްގެ ވާހަކަ އެވެ. ވެރިކަމުގައި ހުންނެވި ބޭފުޅާގެ ވާހަކަ އެވެ. ރައީސް ޔާމީން ކެމްޕޭންގައި ކުރައްވާ ކަންތައްތަކުގެ ވާހަކަ އެވެ.

އިންތިހާބަށް 6 ދުވަހަށްވީއިރު، މިހަތަނަށް ރައީސް ޔާމީނާއި އެމަނިކުފާނުގެ ކެމްޕޭން ޓީމަށް މެނިފެސްޓޯއެއް ހާމަކުރެވިފައެއް ނުވެ އެވެ. ރައްޔިތުންނަށް ކޮށްދެއްވާނެ ކަަންކަން ހާމަކޮށްދެއްވިފައެއް ނުވެ އެވެ. ކުރިއަށް އޮތް ފަސް އަހަރުގެ ތަސައްވަރު ހާމަކޮށްދެވިފައެއް ނުވެ އެވެ.

ކެމްޕޭންގައި މި ހިސާބަށް އައިރު ރައީސް ޔާމީންވެސް ރާއްޖޭގެ ބޮޑެތ އާބާދީތަކަށް ވަޑައިގެން ކެމްޕޭން ހަރަކާތްތަކެއް ކަމަށް ވިދާޅުވެ، ހަރަކާތްތަކެއް ކުރިއަށްގެންދަވާފައިވާ ކަމަށް ޕީޕީއެމުން ހާމަކޮށްފައެއް ނުވެ އެވެ. ނަމަވެސް އެއީ ރައީސުލްޖުމްހޫރިއްޔާގެ ހައިިސިއްޔަތު ކުރެއްވި ދަތުރުފުޅުތަކެއް ކަމެއް ނުވަތަ ނޫން ކަމެއް އޮތީ ސާފު ނުވެ އެވެ.

ދެން އޮތީ ޕޯޑިއަމްގައި އެމަނިކުފާނު ދައްކަވަމުންގެންދަވާ ވާހަކަފުޅުތަކެވެ. ރައްޔިތުންނާއި ބައްދަލުކޮށް ވާހަކަ ދެއްކުވުމަށް ލިބިވަޑައިގަންނަވާ ޕޯޑިއަމްގެ ބޭނުންވެސް ހިތްޕަވަނީ މުޅިން އެހެން ގޮތަކަށެވެ. ރައްޔިތުންނާއި ދިމާލަށް ހަރު ބަސްތަކުން މުޚާތަބު ކުރެއްވުމަށެވެ. 23 ސެޕްޓެމްބަރަށް ފަހުގައި އަސްލު ސޫރަ ފެންނާނެ ކަމަށް ވިދާޅުވެ ރައްޔިތުން ބިރުވެރިކަމެއްގެ ތެރެޔަށް ވެއްޓޭނެ ފަދަ ވާހަކަތަށް ދެއްކެވުމަށެވެ. އިދިކޮޅު ފަރާތްތަކަށް ބަހުގެ ހަމަލާތައް ދެއްވުމަށެވެ. ރައީސް ނަޝީދަށް ބަހުގެ ހަމަލާ ދެއްވުމަށެވެ. ގަޑިއެއްހާއިރު ވާހަކަފުޅުދައްވާއިރު، ވިއްސަކަށްފަހު ރައީސް ނަޝީދުގެ ނަންފުޅު ވިދާޅުވެއެވެ. ނުވަތަ ކޮންމެވެސް ސިޔާސީ ބޭފުޅަކަށް ބަހުގެ ހަމަލާތައް ދެއްވަ އެވެ.

ރައީސް ޔާމީންގެ ވާހަކަފުޅުތައް އަޑުއައްސަވާ ރައްޔިތުންނަށް މި ދެންނެވި ކަންތައްތައް ވަރަށްވެސް ރަނގަޅަށް ސާފުވާނެ އެވެ.

މިއީ ދެ ކެނޑިޑޭޓުންގެ މެދުގައި ހުރި ކުޑަކުޑަ ތަފާތެއްގެ ވާހަކަ އެވެ. ގޮތް ނިންމާނީ ރއްޔިތުންނެވެ. އިންތިހާބު ބޯމަތިވެފައި އޮތްއިރު، އިހްތިޔާރުކުރާނީ ރައްޔިތުންގެ އަޑު އައްސަވާ ބޭފުޅެއްތޯ ނުވަތަ ނޫންތޯ ނިންމާނީ ރައްޔިތުންނެވެ. ޤައުމު އެކަތިގަނޑަކަށް ހައްދަވާނެ ހިތްތިރި ބޭފުޅެއްތޯ ނުވަތަ ސިޔާސީ ބޭފުޅުންނާއި ރައްޔިތުންނަށް ކުރުދޮށިން ދެއްވޭ ވެރިޔެއްތޯ ނިންމާނީވެސް ރައްޔިތުންނެވެ.

މިއީ ރައްޔިތުންނަށް ރައްޔިތުންގެ ނިންމުން ނިންމުމަށް ލެބޭނެ ފުރުސަތު އެވެ.