އިބޫއަށް ތާއީދުކުރި ޣާޒީ ސުކޫލްގެ ޓީޗަރުންނަށް ބިރު ދައްކަނީ
އިބޫ އަށް ތާއީދު ކުރަން ނިންމާފައި ވަނީ އެ ސުކޫލްގެ 50 ޓީޗަރެއް
އިބޫއަށް ތާއިދުކުރަން ނިންމި ޣާޒީ ސްކޫލްގެ ޓީޗަރުން އެ މަނިކުފާނާއެކު ފޮޓާއަކަށް ހުއްޓިގެން
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އަށް ތާއީދު ކުރަން ނިންމި ޣާޒީ ސުކޫލްގެ 50 ޓީޗަރުންނަށް ފިޔަވަޅު އަޅާނެ ކަމަށް ބުނެ ބިރު ދައްކައިފިއެވެ.
ޣާޒީ ސުކޫލްގައި މަސައްކަތް ކުރާ ޓީޗަރަކު ރާއްޖެއެމްވީ އަށް މައުލޫމާތު ދެމުން ވިދާޅުވީ އިބޫ އަށް ތާއިދުކޮށް އެ ސުކޫލުގައި މަސައްކަތް ކުރާ ޓީޗަރުންތަކެއް ވައިބަރ ގްރޫޕެއް ހުޅުވާފައިވާ ކަމަށާއި އެ ވައިބަރ ގްރޫޕް ހުޅުވައިގެން އުޅޭކަން އެނގުމުން އިބޫ އަށް ތާއިދު ކުރުން ހުއްޓުވުމަށް އެޑިއުކޭޝަން މިނިސްޓްރީން އެކި ގޮތް ގޮތުން އެ މުވައްޒަފުންނަށް ފިއްތަމުންދާ ކަމަށެވެ.
ޣާޒީ ސުކޫލްގައި މަސައްކަތް ކުރާ ޓީޗަރު އިތުރަށް ވިދާޅުވީ އެ ޓީޗަރުން ވަޒީފާ އިން ކަނޑާލި ކަމުގައިވީ ނަމަވެސް އިބޫއަށް ތާއީދު ކުރުމުގައި ސާބިތުކަންމަތީ ދެމިތިބޭނެ ކަމަށެވެ. އިބޫއަށް ތާއިދު ކުރުމަށް ނިންމީ މި ސަރުކާރުގެ ތައުލީމީ ސިޔާސަތުގެ ސަބަބުން ސުކޫލުތަކަށް ލިބޭ ގެއްލުމުގެ ބޮޑު ކަމުން ކަމަށާއި މި ސަރުކާރުގެ އަނިޔާވެރިކަމަށް ހިތްވަރު ނުދޭނެ ކަމަށް ވެސް އޭނާ ބުނުއްވިއެވެ.
މިކަމާ ގުޅޭ ގޮތުން މައުލޫމާތު ހޯދުމަށް ޣާޒީ ސުކޫލްގެ ޕްރިންސިޕަލް މަރިޔަމް މުހައްމަދަށް ގުޅުމުން ފޯނަށް ޖަވާބު ނުދެއްވާތީ ވަނީ މައުލޫމާތު ލިބޭ ގޮތް ނުވެފައެވެ.
މީގެ ތިން ދުވަސް ކުރިން ރެހެންދި ސުކޫލްގެ ޓީޗަރުންތަކެއް ވެސް ވަނީ އިބޫ އަށް ތާއީދު ކުރާކަން ހާމަކޮށްފައެވެ.
ގިނަ އަދަދެއްގެ ސިވިލް ސާވަންޓުން އިބޫއަށް ތާއީދު ކުރާކަން ހާމަކުރަމުން މިދަނީ ވަޒީފާގެ ބިރަށް ނުތިބެ، އިސްލާހީ ހަރަކާތާއި ގުޅި، ބަދަލެއް ގެނައުމަށް މަސައްކަތް ކުރުމަށް އިބޫ އާއި އެމަނިކުފާނުގެ ރަނިންގމޭޓް ފައިސަލް ނަސީމް ގޮވާލައްވާފައި ވަނިކޮށެވެ. މީގެ އިތުރުން ކެމްޕެއިން ދަތުރުތަކުގައި އެހެން ބައެއް ރަށްރަށުން ވެސް ޓީޗަރުންނާއި އެހެނިހެން ސިވިލް ސަރވަންޓުން ގެންދަނީ އިބޫ އާއި ފައިސަލްއާ ބައްދަލުކޮށް، އެ ދެ ބޭފުޅުންނަށް ތާއީދުކުރާކަން ހާމަކުރަމުންނެވެ.
ކޯލިޝަނުން ބުނެފައި ވަނީ އެކޮލިޝަނަށް ތާއީދުކޮށްގެން ވަޒީފާ އިން ވަކިކުރާ މުވައްޒަފުންނަށް އަލުން ވަޒީފާ ދޭނެ ކަމަށާއި، ވަޒީފާ އެހެން ތަނަކަށް ބަދަލުކޮށްފި ނަމަ، އަލުން ކުރިން ހުރި ތަނަށް ވަޒީފާ ބަދަލުކޮށްދޭނެ ކަމަށެވެ. އިބޫ އަށް ތާއީދުކުރާކަން ހާމަކުރާ މުވައްޒަފުންނާ މެދު ކުންފުނިތަކާއި އެކި މުއައްސަސާތަކުން ދަނީ ފިޔަވަޅު އަޅަމުންނެވެ.
