ސުނާމީ ލޯނުތައް މައާފުކޮށްދޭނަން: އިބޫ
13 ސެޕްޓެމްބަރު 2018 | ބުރާސްފަތި 14:06ދޫކުރެވިފައިވާ ހުރިހާ ލޯނެއް މައާފްކޮށްދެއްވާނެކަމަށް ވިދާޅުވި
އއ. މަތިވެރިއަށް އިބޫ ވަޑައިގަތުން
ސުނާމީއާއި ގުޅިގެން ގެއްލުން ލިބުނު ފަރާތްތަކުން ނެގި ލޯނުތައް މައާފްކޮށްދެއްވާނެކަމަށް ގުޅިފައިވާ ޕާޓީތަކުގެ ކެންޑިޑޭޓް އިބުރާހިމް މުހައްމަދު ސޯލިހް ވިދާޅުވެއްޖެއެވެ.
އއ. މަތިވެރީގައި ބުރާސްފަތި ދުވަހު ވާހަކަފުޅު ދައްކަވަމުން އިބޫ ވިދާޅުވީ، ސުނާމީގައި ހާލުގައި ޖެހިގެން ލޯނު ނެގި ފަރާތްތަކަށް އެ ލޯނުތައް ނުދެއްކި ބޮޑު އަދަދަކުން އިންޓަރެސްޓް އަރާފައިވާކަން އެމަނިކުފާނަށް އެނގިވަޑައިގަންނަވާކަމަށެވެ.
"އެ ލޯނު ނުދެއްކި އިންޓަރެސްޓް މައްޗަށް އިންޓަރެސްޓް ވަނީ އަރާފައި. މިއަދު އަޅުގަނޑުމެން މި ނިންމަނީ އަޅުގަނޑުމެންގެ ވެރިކަމުގައި އިރާދަ ކުރެއްވިއްޔާ ދޫކުރެވިފައިވާ އެ ހުރިހާ ލޯނެއް އަޅުގަނޑުމެން މައާފްކޮށްދޭނަން،" އިބޫ ވިދާޅުވިއެވެ.
އއ. އަތޮޅުގައި ވަޑައިނުގެން ހުރި ރަށްތަކަށް ވެސް އިންތިޚާބުގެ ކުރިން ވަޑައިގަންނަވާނެކަަމަށް ވިދާޅުވަމުން އިބޫ ވިދާޅުވީ، އެ އަތޮޅުގެ ގިނަ ރައްތަކުގައި ވެސް ފެނާއި ނަރުދަމާގެ މައްސަލަތައް ހައްލުކޮށްދެއްވާނެކަމަށެވެ. އެގޮތުން ފެރިދޫ އާއި މާޅޮހާއި، ހިމަންދޫއަށް އަސާސީ ގިނަ ޚިދުމަތްތައް ފޯރުކޮށްދީ، އެރަށްރަށުގެ ސިއްހީ ނިޒާމާއި ތައުލީމީ ނިޒާމު ހަރުދަނާ ކޮށްދެއްވާނެކަމަށް އިބޫ ވައުދުވެވަޑައިގަތެވެ.
