ވޯޓާސް ލިސްޓުގައި ކެންޑިޑޭޓުންގެ ފަރާތުން ސޮއި ނިންމާލައިފި
12 ސެޕްޓެމްބަރު 2018 | ބުދަ 10:58ވޯޓާސް ލިސްޓުގައި ސޮއި ކުރީ ފަސް ދުވަހުން
އިންތިހާބުގައި މީހަކު ވޯޓުލަނީ: މިފަހަރުގެ އިންތިހާބުގައި ވޯޓުލުމުގެ ހައްގު ލިބުގެންވާ މީހުންގެ އަދަދު 262،000 އަށް އަރާ
ރިޔާސީ އިންތިހާބުގައި ވޯޓުލުމުގެ ހައްގު ލިބިގެންވާ މީހުންގެ ލިސްޓުގައި ކެންޑިޑޭޓުންގެ ފަރާތުން ސޮއިކޮށް ނިމިފައިވާ ކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.
ވޯޓާސް ލިސްޓުގައި ކެންޑިޑޭޓުންގެ ފަރާތުން ސޮއިކޮށް ނިންމާލާފައި ވަނީ ފަސް ދުވަހުގެ ތެރޭގައެވެ. ވޯޓާސް ލިސްޓުގައި ސޮއި ކުރަން އިލެކްޝަންސް ކޮމިޝަނުން ދިނީ ވެސް ފަސް ދުވަހުގެ މުއްދަތެކެވެ. އެއީ މިދިޔަ ހޮނިހިރު ދުވަހުން ފެށިގެން ބުދަ ދުވަހުގެ ނިޔަލަށެވެ.
އިލެކްޝަންސް ކޮމިޝަނުން ބުނީ ވޯޓާސް ލިސްޓުގައި ސޮއިކޮށް ނިންމާލީ ކޮންމެ ދުވަހަކު 24 ގަޑިއިރު، އެ މަސައްކަތް ކުރިއަށް ގެންދިއުމަށް ފުރުސަތު ދިނުމަށްފަހުގައި ކަމަށެވެ.
ރިޔާސީ އިންތިހާބުގައި ވާދަ ކުރާ ކެންޑިޑޭޓުންގެ ފަރާތުން، ވޯޓުލުމުގެ ހައްގު ލިބިގެންވާ މީހުންގެ ލިސްޓުގައި ސޮއި ކުރަން ޖެހެނީ 2013 ވަނަ އަހަރު ސުޕްރީމް ކޯޓުން ކަނޑައަޅާފައިވާ ގައިޑްލައިނާ އެއްގޮތަށް، އިންތިހާބުތަކާ ބެހޭ އާންމު ގާނޫނަށް ގެނެސްފައިވާ ބަދަލުތަކާ ގުޅިގެންނެވެ. އެގޮތުން ކެންޑިޑޭޓުންގެ މަންދޫބުންގެ ފަރާތުން ވޯޓާސް ލިސްޓުގައި ސޮއި ކުރަން އިލެކްޝަންސް ކޮމިޝަނުން ފުރުސަތު ދީފައިވެއެވެ.
