އެމެޒަންގެ މާކެޓް ވެލިއުވެސް 1 ޓްރިލިއަން ޑޮލަރަށް އަރައިފި!
5 ސެޕްޓެމްބަރު 2018 | ބުދަ 00:14ހިއްސާއެއްގެ އަގު 2050.50 ޑޮލަރަށް އުފުލުނު
އެމެޒަން އަކީ މިވަގުތު ދުނިޔޭގެ އެންމެ ބޮޑު އޮންލައިން ރީޓެއިލަރ
މަޝްހޫރު އޮންލައިން ވިޔަފާރި ކުންފުނި އެމެޒަން ކުންފުނީގެ އަގު 1 ޓްރިލިއަން އެމެރިކާ ޑޮލަރަށް އަރައިފިއެވެ.
އެމެޒަން އަކީ އެމެރިކާގެ ހިއްސާގެ ބާޒާރުގައި ލިސްޓްކޮށްފައިވާ ކުންފުނިތަކުގެ ތެރެއިން މާކެޓް ވެލިއު 1 ޓްރިލިއަން ޑޮލަރަށް އެރި 2 ވަނަ ކުންފުންޏެވެ. މިދިޔަ އޮގަސްޓްމަހު އެމެރިކާގެ އެހެން ކުންފުންޏެއްކަމަށް އެޕަލް ކުންފުނިން ވަނީ އެކުންފުނީގެ އަގު 1 ޓްރިލިއަން ޑޮލަރަށް އެރިކަން ހާމަކޮށްފައެވެ.
އަންގާރަ ދުވަހު ހެނދުނު ނިއުޔޯކްގެ ހިއްސާގެ ބާޒާރުގައި އެމެޒަން ކުންފުނީގެ ހިއްސާއެއްގެ އަގު 2 އިންސައްތަ މައްޗަށް ޖެހި، ހިއްސާގެ އަގު 2050.50 ޑޮލަރަށް އެރިއެވެ. އެހެން ނަމަވެސް މެންދުރުފަހު ހިއްސާގެ ބާޒާރު ބަންދުކުރިއިރު ހިއްސާއެއްގެ އަގު 2039.51 ޑޮލަރަށް ވަނީ ވެއްޓިފައެވެ.
1994 ވަނަ އަހަރު ވުޖޫދަށް އައި އެމެޒަން ކުންފުންޏަކީ ދުނިޔޭގައި މިވަގުތު އޮތް ރީޓެއިލް ވިޔަފާރި އޮންލައިންކޮށް ކުރާ އެންމެ ބޮޑު ކުންފުންޏެވެ. އަދި އެކުންފުނީގެ ވެރިޔާ ޖެފް ބީޒޮސް އަކީ ދުނިޔޭގައި މިވަގުތު ހުރި އެންމެ މުއްސަނދި މީހާއެވެ. އޭނާގެ މިލްކިއްޔާތު 160 ބިލިއަން އެމެރިކާ ޑޮލަރަށް އަރާކަމަށް ފޯބްސްއިން އަންދާޒާކުރެއެވެ.
މިއަހަރުގެ 2 ވަނަ ކުއާރޓަރގައި އެމެޒަންއިން 53 ބިލިއަން ޑޮލަރުގެ ވިޔަފާރިކުރިއިރު، ފައިދާވެފައިވަނީ 2.5 ބިލިއަން ޑޮލަރެވެ.
އެމެޒަންގެ ވަޒީފާގައި 575،000 މުވައްޒަފުން އެބަތިއްބެވެ. އަދި އެކުންފުންޏަކީ އޮންލައިން ރީޓެއިލްގެ އިތުރުން ކްލައުޑް ކޮމްޕިއުޓިންގ ދާއިރާގައި އެންމެ ފާހަގަކޮށްލެވޭ އެއް ކުންފުންޏެވެ.
