ބްރެޒިލްގެ ރިއޯ ޑި ޖެނިރޯގައި ހުންނަ އެ ގައުމުގެ ގައުމީ ދާރުލް އާސާރުގައި އަލިފާން ރޯވެއްޖެއެވެ. އެތަނަކީ އެގައުމުގައި ހުންނަ އެންމެ ޒަމާންވީ ސައިންފިކް އިންސްޓިޓިއުޝަނެވެ.
މި ދާރުލްއާސާރުގައި 20 މިލިއަން އައިޓަމެއް ހުރެއެވެ.
ބްރެޒިލްގެ ގްލޯބޯ ވެބްސައިޓުގައި ރިޕޯޓްކޮށްފައިވާ ގޮތުގައި މި ހާދިސާ ހިނގާފައި ވަނީ ދާރުލްއާސާރަށް ޒިޔާރާތް ކުރުމަށް ހުޅުވާލާފައި އޮތް ވަގުތުއެވެ.
ޕޯޗުގަލްގެ ޝާހީ އާއިލާގެ ގެކޮޅުގެ ގޮތުގައި އެއް ދުވަސްވަރެއްގައި ބޭނުންކޮށްފައިވާ މި ދާރުލް އާސާރަށް 200 އަހަރު ފުރުން ފާހަގަކޮށްފައި ވަނީ މި އަހަރުގެ ކުރީކޮޅުއެވެ.
އެއްވެސް މީހަކަށް ހާނީއްކައެއް ވެފައިވާކަން މިހާތަނަށް ކަށަވަރުކުރެވިފައެއްނުވެއެވެ.
