ސައުދީގައި ރިލީޒް ކުރި ފުރަތަމަ ބޮލީވުޑް ފިލްމަކަށް އަކްޝޭގެ 'ގޯލްޑް'

ސައުދީ އަރަބިއާގައި ރިލީޒް ކުރި ފުރަތަމަ ބޮލީވުޑް ފިލްމަކަށް އަކްޝޭ ކުމާރުގެ ފިލްމް "ގޯލްޑް" ވެގެން ގޮސްފިއެވެ.

ރީމާ ކަގްޓީ ޑައިރެކްޓްކޮށްފައިވާ މި ފިލްމް ވެގެން ގޮސްފައި މިވަނީ ރަޖްނީ ކާންތުގެ "ކާލާ" އަށް ފަހު ގަލްފް ގައުމުތަކުގައި ސިނަމާތަކުގައި ދައްކާލި ދެވަނަ ފިލްމަށެވެ.

މިދިޔަ ބުރާސްފަތި ދުވަހު އަކްޝޭ ވަނީ އޭނާގެ ޓްވިޓާ ހެންޑްލްގައި މި ޚަބަރު ހިއްސާ ކޮށްފައެވެ.

އަކްޝޭގެ ޓްވީޓްގައި ވަނީ އިންޑިއާގެ ޓީމް ފުރަތަމަ ފަހަރަށް ގޯލްޑް މެޑަލް ހޯދި ވާހަކައިގެ މައްޗަށް ތައްޔަރުކޮށްފައިވާ މި ފިލްމް ސައުދީ އަރަބިޔާގެ ސިނާމާތަކުގައި ބުރާސްފަތި ދުވަހުން ފެށިގެން ދައްކަމުންދާނެ ކަމަށެވެ.

"ގޯލްޑް"ގައި ދައްކުވައިދީފައި ވަނީ ސަމާ އޮލިމްޕިކްސްގައި 1948 ވަނަ އަހަރު އިންޑިއާގެ ހޮކީ ޓީމު ބައިވެރިވެ އެ ޓީމަށް ފުރަތަމަ ރަން މެޑައްޔެއް ލިބުނު ގޮތެވެ.

މިމަހު 15 ގައި ރިލީޒްކުރި މި ފިލްމުން ފެނިގެންދަނީ އަކްޝޭ ކުމާރުގެ އިތުރުން މޮނީ ރޯއީ، އަމިތް ސާދް، ކުނާލް ކަޕޫރު އަދި ވިނީތް ކުމާރު ސިންގްއެވެ.