އިލެކްޝަންގެ 1414 ހިދުމަތް އަލުން ފަށައިފި
29 އޯގަސްޓު 2018 | ބުދަ 19:50"1414" ހިދުމަތް މެދުކެނޑުނީ އިންޓަނެޓަށް ދިމާވި މައްސަލައެއްގައި
އިލެކްޝަންސް ކޮމިޝަން
އިލެކްޝަން ކޮމިޝަންގެ "1414"ގެ ހިދުމަތުގެ މައްސަލަ ރަނގަޅުކޮށް އަލުން އެހިދުމަށް ފަށައިފިއެވެ.
އިލެކްޝަން ކޮމިޝަނުން ބުނީ، ވޯޓު ރަޖިސްޓްރީ ޗެކްކުރެވޭ "1414" ހިދުމަތް މެދުކެނޑުނީ އިންޓަނެޓަށް ދިމާވި މައްސަލައެއްގައި ކަމަށެވެ. ހިދުމަތް މެދުކެނޑިފައިވަނީ ރޭގަ އެވެ. އަދި އެކަމުގެ ސަބަބުން ދިމާވާ ދަތިތަކަށް އެކޮމިޝަނުން ވަނީ މައާފަށްވެސް އެދިފަ އެވެ.
ރީރެޖިސްޓްރޭޝަން މުއްދަތު ހަމަވިއިރު، މައުލޫމާތު ފުރިހަމަނުވާ ކަމަށް ބުނެ އިލެކްޝަން ކޮމިޝަނުން ވަނީ ރީރެޖިސްޓްރޭޝަނަށް ހުށަހެޅި ފަރާތްތަކުގެ ތެރެއިން 5626 ފޯމު ބާތިލުކޮށްފަ އެވެ. އެ ފަރާތްތަކުން ރީރެޖިސްޓާ ކުރުން މިއަދު އިރުއޮއްސި 6:00 އަށްވަނީ ހަމަވެފަ އެވެ.
ބާތިލް ކުރި ފޯމުތަކުގެ ތެރެއިން ވެރިފަރާތް ނޫން އެހެން ފަރާތްތަކުން ފިންގާޕްރިންޓު ޖަހައިގެން 1892 ރީ ރަޖިސްޓްރޭޝަން ފޯމް ހުށަހަޅާފައިވާ ކަމަށާއި އެ ފަރާތްތަކަށް ދައުވާ ކުރާނެ ކަމަށް އިލެކްޝަން ކޮމިޝަން ވަނީ ބުނެފަ އެވެ.
