ރީރަޖިސްޓްރީވާން ހުށަހެޅީ 95،639 ފޯމު، ރަޖިސްޓްރީކޮށްފައި ވަނީ 78،964 މީހުން
26 އޯގަސްޓު 2018 | އާދީއްތަ 12:26ރީރަޖިސްޓްރޭޝަނަށް ހުށަހެޅި ފޯމުގެ އަދަދަކީ 95،639
އިންތިހާބެއްގައި ވޯޓު ކަރުދާސް ގުނުމުގެ މަސައްކަތް ކުރަނީ
ރަށްވެހިވެފައިވާ ރަށް ނޫން އެހެންތަނެއްގައި ވޯޓުލުމަށް ރަޖިސްޓްރީ ކުރި ޖުމްލަ އަދަދު އިލެކްޝަންސް ކޮމިޝަނުން އާންމުކޮށްފިއެވެ.
އިލެކްޝަންސް ކޮމިޝަންގައި ކުރިއަށްދާ ޕްރެސް ކޮންފަރެންސްގައި ވާހަކަފުޅު ދައްކަވަމުން އެ ކޮމިޝަންގެ ރައީސް އަހުމަދު ޝަރީފު ވިދާޅުވީ ރީރަޖިސްޓްރީ ކުރުމަށް ހުށަހެޅި ފޯމުތަކުގެ އަދަދަކީ 95،639 ކަމަށެވެ. އަދި އެ ފޯމުތައް ބެލުމަށްފަހު ރަށްވެހިވެފައިވާ ރަށް ނޫން އެހެން ތަނެއްގައި ރަޖިސްޓްރީކޮށްފައި ވަނީ 78،964 މީހުން ކަމަށް ޝަރީފު ވިދާޅުވިއެވެ.
ރީރަޖިސްޓްރޭޝަނަށް ހުށަހެޅި ފޯމުތަކުގެ ތެރެއިން 16،675 ފޯމުގެ މައްސަލަތަކުގެ ތަފްސީލެއް ޝަރީފު އަދި ވިދާޅެއް ނުވެއެވެ.
ޝަރީފު ވިދާޅުވީ މިފަހަރުގެ އިންތިހާބުގައި ބަހައްޓާނީ 472 ވޯޓު ފޮށި ކަމަށާއި އެގޮތުން މާލެ ސިޓީގައި 122 ވޯޓު ފޮށި ބަހައްޓާނެ ކަމަށެވެ. އެގޮތުން މާލޭގެ ރައްޔިތުންނަށް 55 ފޮށި ބަހައްޓާނެ ކަމަށާއި މާލޭގައި ދިރިއުޅޭ އަތޮޅުތަކުގެ ރައްޔިތުންނަށް 67 ފޮށި މާލޭގައި ބަހައްޓާނެ ކަމަށް އޭނާ ވިދާޅުވިއެވެ.
ރިޔާސީ އިންތިހާބުގައި ރިސޯޓުތަކުގައި ބަހައްޓަނީ 35 ވޯޓު ފޮށްޓެވެ. އަދި ހަތަރު ޖަލެއްގައި ހަތަރު ފޮށްޓާއި ސިނާއީ ރަށްތަކުގައި ހަތަރު ވޯޓު ފޮށި ބަހައްޓަން ވަނީ ނިންމާފައެވެ. ރާއްޖެއިން ބޭރުގައި ބަހައްޓަން ނިންމާފައި ވަނީ ފަސް ފޮށްޓެވެ.
އިލެކްޝަންސް ކޮމިޝަނުން ބުނީ ރިޔާސީ އިންތިހާބު 3،506 މޮނީޓަރުން ހަރަކާތްތެރިވާނެ ކަމަށާއި އޮބްޒާވަރުންގެ ގޮތުގައި 2624 މީހުން ހަރަކާތްތެރިވާނެ ކަމަށެވެ. ރިޔާސީ އިންތިހާބުގައި ވޯޓު ފޮށިތަކުގައި ހަރަކާތްތެރިވުމަށް 3،895 އޮފިޝަލުން ނަގާފައިވާ ކަމަށް ވެސް އިލެކްޝަންސް ކޮމިޝަނުން ވަނީ ބުނެފައެވެ.
