ރައީސް އަބުދުﷲ ޔާމީނަށް ތާއީދު ހޯދުމަށް ހުޅުމާލޭގައި ހޮނިހިރު ދުވަހުގެ ހަވީރު ކުރިއަށް ގެންދިޔަ ރެލީއެއްގައި ރައީސް މުހައްމަދު ނަޝީދު ރާއްޖެ ވަޑައިގެންފިނަމަ ކަރު ބުރިކޮށްލާނެކަމަށް ބުނެ އިންޒާރު ދީފިއެވެ.
ޕީޕީއެމްގެ އަންހެނުންތަކެއް އިސްވެތިބެ ކުރިއަށް ގެެންދިޔަ މި ރެލީގައި އަންހެނަކު ވާހަކަ ދައްކަމުން ބުނެފައިވަނީ، އަންނި ދިވެހިރާއްޖެއަށް ދެން އައިސްފިނަމަ ކަރު ބުރިކޮށްލާނެކަމަށެވެ.
"މިތިބަ ޒުވާނުންނައި މިތިބަ އަންހެން އަދި ފިރިހެން ކަލުން އެ ބުނަނީ، ނިކަން ދިވެހިރާއްޖެއަށް އަރައިބަލާށޭ.މި ދިވެހި ފަސްގަނޑުގެ ލޭ ދައްކާލާނަމޭ ކުޅި. ނިކަން އާދެބަލަ. ދިވެހިރާއްޖެެއަށް އަރާ ތި އިދިކޮޅު ފާރާތްތައް އިންޑިއާ ކީއްކުރަން. ކޮންމެ ތާކުން އަޔަސް އަންނި އަޔަސް ދެން ކަރު ބުރިކޮށްލާނީ" އެ އަންހެން މީހާ މި ރެލީގައި ވާހަކަ ދައްކަމުން ބުނެއެވެ.
ދެވަނަ ފަހަރުވެސް ތަކުރާރުކޮށް އޭނާ ބުނެފައިވަނީ، ރާއްޖެ އައިސްފިނަމަ "ހަމަ ކަރުބުރިއަރުވާލާނި" އެވެ.
ރިޔާސީ އިންތިހާބުގެ ނަތީޖާ އޮޅުވާލައިފިނަމަ އިންޑިއާއިން ރާއްޖެ ހިފަން ޖެހޭ ކަމަށް އެގައުމުގެ ގާނޫނު ހަދާ މަޖިލީހުގެ މަތިގޭގެ މެމްބަރު ސުބްރަމާނިއަން ސްވާމީ ގޮވާލެއްވި ގޮވާލެއްވުމާއި ގުޅިގެން ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ. އެގޮތުން ސަރުކާރުންނާއި އަދި އިދިކޮޅު ފަރާތްތަކުންވެސް ވަނީ އެކަމުގައި ކަންބޮޑުވުން ފާޅުކޮށްފައެވެ. އަދި އެކަން ކުށްވެރިކުރައްވާ އިދިކޮޅު ރިޔާސީ ކެންޑިޑޭޓް އިބުރާހިމް މުހައްމަދު ސޯލިހު ވިދާޅުވީ ރާއްޖެ ހިފުމަށް ސުބްރަމާނިއަން ގޮވާލެއްވި ގޮވާލެއްވުމަށް އެންމެ ހަރުކަށި އިބާރާތުން ދެކޮޅު ހައްދަވާ ކަމަށެވެ. އިލެކްޝަންސް ކޮމިޝަނާއި ރައީސް ޔާމީންއަކީ މިހާރުވެސް އިންތިހާބު އޮޅުވާލުމަށް މަސައްކަތްކުރަމުންދާ ފަރާތްތަކެއް ކަމަށް އިބޫ ވަނީ ވިދާޅުވެފައެވެ. އެފަދަ ކަންތައްތަކަށް ބަސް ބުނަން ޖެހޭނީ ބައިނަލްއަގްވާމީ މިންގަނޑުން ކަނޑައެޅިފައިވާ ފްރޭމްވަރކެއްގެ ދަށުން ކަމަށާއި ޖަޒުބާތުގައި ޖެހިގެން ބުނާ ބަސްތަކަކުން ނޫން ކަމަށް އިބޫ ވަނީ ވިދާޅުވެފައެވެ. ހަމައެހެންމެ ރާއްޖޭގެ މިނިވަންކަމަކީ އެންމެ ބޮޑު އަހަންމިއްޔަތު ކަމެއް ދޭންޖެހޭ ކަންތައްކަމަށް އިބޫ ވަނީ ވިދާޅުވެފައެވެ.
ރައީސް ނަޝީދު ރާއްޖެ ވަޑައިގެންފިނަމަ އަވަހާރަކޮށްލާނެ ކަމުގެ އިންޒާރު ދީފައިވާއިރު، އެމަނިކުފާނު އަވަހާރަކޮށްލުމަށް ހިތްވަރު ލިބޭ ގޮތަށް މީގެކުރިން ވެސް ބައެއް ފަރާތްތަކުން ވާހަކަ ދައްކަވާފައިވެ އެވެ. އެގޮތުން ދިރާގުގެ ޗެއާމަން އަދި ފިނޭންސް މިނިސްޓްރީގެ ސްޓޭޓު މިނިސްޓަރު މުހައްމަދު އަޝްމަލީ ވަނީ އެމަނިކުފާނު އަވަހާރަކޮށްލުމަށް ހިތްވަރު ލިބޭ ގޮތަށް ޓްވީޓު ކުރައްވާފައެވެ. އަދި ރައީސް ނަޝީދު މަރާލުމަށް މުސްލިމް އުއްމަތަށާއި މުއައްސަސާތަކަށް ގޮވާލައްވައި ފެނަކަ ކޯޕަރޭޝަނުން ޑެޕިއުޓީ މެނޭޖިން ޑިރެކްޓަރު މުހައްމަދު ލައްމާން ވެސް ވަނީ ޓްވީޓު ކުރައްވާފައެވެ. ނަމަވެސް ފަހުން އޭނާ ވިދާޅުވެފައި ވަނީ އެ ޓްވީޓުކޮށްފައި ވަނީ އެކައުންޓް ހެކްކޮށްގެން ކަމަށެވެ.
