ކުރީގެ ނާއިބު ރައީސް އަހުމަދު އަދީބުގެ އާއިލީ ބޭފުޅެއް ކަމަށްވާ، ވިޔަފާރިވެރިޔާ ހާމިދު އިސްމާއިލަށް ކުރި ޖަލު ހުކުމުގެ މުއްދަތު ހަމަވުމުން، އޭނާ މިނިވަންކޮށްފިއެވެ.

ހާމިދު ތަންފީޒު ކުރައްވަމުން ގެންދެވީ ދެ އަހަރާއި ނުވަ މަހާއި 18 ދުވަހުގެ ޖަލު ހުކުމެކެވެ. މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އަށް ލިބެންޖެހޭ ފަސް މިލިއަން ޑޮލަރަށް ޚިޔާނާތްތެރިވި މައްސަލާގައި އޭނާގެ މައްޗަށް އެ ހުކުމްކޮށްފައި ވަނީ 2016 ވަނަ އަހަރުގެ ޖޫން މަހުގެ 23 ވަނަ ދުވަހުއެވެ.

މޯލްޑިވްސް ކަރެކްޝަނަލް ސާވިސްގެ އިންފޮމޭޝަން އޮފިސަރު އަހުމަދު ލުގުމާން ވިދާޅުވީ ހާމިދު ޖަލުން މިނިވަން ކުރީ ހޮނިހިރު ދުވަހުގެ ހެނދުނު ކަމަށެވެ.

އެމްއެމްޕީއާރްސީގެ ހިޔާނަތުގެ މައްސަލާގައި ހާމިދަށް ކުރި ހުކުމް ތަންފީޒުކޮށް ނިމިފައިވާއިރު، އެ މައްސަލާގައި އަހުމަދު އަދީބު ގެންދަވަނީ 33 އަހަރުގެ ޖަލު ހުކުމް ތަންފީޒު ކުރައްވަމުންނެވެ. އަދި އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު ގެންދަވަނީ އަށް އަހަރުގެ ޖަލު ހުކުމެއް ތަންފީޒު ކުރައްވަމުންނެވެ.