ގޯލްޑް ސަތޭކަ ކްރޯޑް ކްލަބަށް!

އަކްޝޭ ކުމާރާއި މޯނީ ރޯއީ ލީޑްރޯލުން ފެނިގެންދާ ފިލްމް "ގޯލްޑް" ބޮލީވުޑްގެ ސަތޭކަ ކްރޯޑް ކްލަބަށް ވަންނަން ވަރަށް ކައިރިވެއްޖެ އެވެ.

އިންޑިއާގެ 72 ވަނަ މިނިވަން ދުވަހުގައި ރިލީޒް ކުރި މި ފިލްމަށް ވަނީ މިހާތަނަށް އާމްދަނީގެ ގޮތުގައި 88.9 ކްރޯޑް އިންޑިއަން ރުޕީސް ލިބިފައެވެ.

މިފިލްމް ރިލީޒް ކުރި ބުދަ ދުވަހު ފިލްމަށް ވަނީ އާމްދަނީގެ ގޮތުގައި 25.25 ކްރޯޑް ރުޕީސް ލިބިފައެވެ. ޖެހިގެން އައި ބުރާސްފަތި ދުވަހު 8.10 ކްރޯޑް ރުޕީސް، ހުކުރު ދުވަހު 10.10 ކްރޯޑް ރުޕީސް، ހޮނިހިރު ދުވަހު 12.3 ކްރޯޑް ރުޕީސް، އާދިއްތަ ދުވަހު 15.55 ކްރޯޑް ރުޕީސް، ހޯމަ އަދި އަންގާރަ ދުވަހު 4 ކްރޯޑް ރުޕީސް، ބުދަ ދުވަހު 6 ކްރޯޑް ރުޕީސް އަދި މިދިޔަ ބުރާސްފަތި ދުވަހު 3.6 ކްރޯޑް ރުޕީސް ވަނީ ލިބިފައެވެ.

މި ފިލްމް ވެފައިވަނީ އަކްޝޭ ކުމާރު ކުޅުނު ފިލްމް ތަކުގެ ތެރެއިން ފިލްމް ރިލީޒްކުރި ދުވަހު އެންމެ ބޮޑު އާމްދަނީ ލިބުނު ފިލްމަށެވެ.

ރީމާ ކަތުގީ ޑައިރެކްޓްކޮށްފައިވާ "ގޯލްޑް" މި ފިލްމަކީ 1947 ވަނަ އަހަރު އިންޑިއާ އަށް މިނިވަންކަން ލިބުމަށް ފަހު 12އޮގަސްޓް 1948 ގައި އޮލިމްޕިކްގައި އިންޑިއާ އަށް ހޮކީއިން ރަން މެޑެލް ގެނެސްދޭ ހާދިސާ ގެ މައްޗަށް ބިނާކޮށް ތައްޔާރު ކޮށްފައިވާ ފިލްމެކެވެ.