ފޭސްބުކް އާއި ޓުވިޓަރ އިން ރަޝިއާ އަދި އިރާންއަށް ލިންކްވެފައިވާ އެކައުންޓުތައް ރިމޫވްކޮށްފި

ފޭސްބުކް އާއި ޓުވިޓަރ އިން ރަޝިއާ އަދި އިރާންއަށް ލިންކްވެފައިވާ އެކައުންޓުތައް ރިމޫވްކޮށްފިއެވެ.

ފޭސްބުކް އާއި ޓުވިޓަރ އިން ބުނީ ރަޝިއާ އާއި އިރާންއަށް ލިންކްވެފައިވާ އެކައުންޓުތައް ސަސްޕެންޑްކޮށް އަދި ރިމޫވްކޮށްފައިވަނީ އެ އެކައުންޓުތަކުގެ ސައްހަކަން ކަށަވަރު ނުވާތީ އާއި އެ އެކައުންޓުތައް މެދުވެރިކޮށް ބޮޑެތި އޮޅުވާލުތަން ކުރިއަށް ގެންގޮސްފައިވާތީ ކަމަށެވެ.

ފޭސްބުކްގެ ސީއީއޯ މާކް ޒަކަބަރގް ވިދާޅުވީ 650 އަށްވުރެ ގިނަ ފޭސްބުކް ގްރޫޕްތަކާއި ފޭސްބުކް ޕޭޖްތަކުގައި އޮޅުވާލުންތައް ހުރި ކަމަށް ފާހަގަކުރެވިފައިވާ ކަމަށެވެ. އަދި ޓުވިޓަރ އިން ވަނީ އިރާންއާ ލިންކްވެފައިވާ 284 އެކައުންޓް ސަސްޕެންޑްކޮށްފައިއެވެ.

ފޭސްބުކް އިން ވަނީ މީގެ ކުރިން އެ ޕްލެޓްފޯމް ބޭނުން ކުރާ ބައެއް ފަރާތްތަކުގެ މައުލޫމާތު ނަހަމަ ގޮތުގައި ބޭނުންކުރިކަމުގެ ތުހުމަތުގައި ކެނެޑާގެ ޑޭޓާ ކުންފުންޏެއް ސަސްޕެންޑް ކޮށްފައެވެ.

ސަސްޕެންޑް ކުރި ކުންފުންޏަކީ އިނގިރޭސިވިލާތް ވިލާތުގެ އިއްތިޙާދުން ވަކިވުމަށް ނެގި ވޯޓުގައި، އީޔޫއިން ވަކިވުމަށް ކެމްޕޭން ކުރި ޓީމަށް މަސައްކަތް ކޮށްދިން ކެނެޑާގެ ޑޭޓާ އެނަލިޓިކްސް ކުންފުންޏެއް ކަމަށްވާ އެގްރިގޭޓް އައިކިއު ކިޔާ ކުންފުންޏެކެވެ. އެކުންފުންޏާއި ކޭމްބްރިޖް އެނަލިޓިކާ ކުންފުންޏާއި ގުޅުމެއް އޮތް ކަމަށް ފޭސްބުކްއިން ތުހުމަތުކުރެއެވެ.

ކޭމްބްރިޖް އެނަލިޓިކާ ކުންފުންޏަކީ އެމެރިކާގެ ރިޔާސީ އިންތިޚާބުގައި ފޭސްބުކް ބޭނުން ކުރާ އެތައް މިލިއަން ބައެއްގެ މައުލޫމާތު ނަހަމަ ގޮތުގައި ބޭނުންކުރިކަން ދާދިފަހުން ފަޅާ އަރައި، ހޫނު ފެނަށް ވެއްޓިފައިވާ ކުންފުންޏެކެވެ. އެމައްސަލައިގައި ފޭސްބުކް ކުންފުނިން ދަނީ މިހާރު ވެސް އެމެރިކާގެ ކޮންގްރެސްއަށާއި އިނގިރޭސި ޕާލަމެންޓަށް ޖަވާބުދާރީވަމުންނެވެ.

ފޭސްބުކް ބޭނުން ކުރާ އެތައް މިލިއަން ބައެއްގެ މައުލޫމާތު ނަހަމަ ގޮތުގައި ބޭނުން ކުރާ މައްސަލައިގައި އެކުންފުނީގެ ހިއްސާގެ އަގުތައްވެސް ވަނީ ވަރަށް ބޮޑުތަން ދަށްވެފައެވެ.