ހުއްދަނެތި އިލެކްޝަންސްގެ ލޯގޯ ބޭނުންކޮށްގެން ވޯޓް ކަރުދާސް ހެދުމަކީ ގާނޫނީ ކުށެއް: އިލެކްޝަންސް
19 އޯގަސްޓު 2018 | އާދީއްތަ 13:43ކޮމިޝަންގެ ހުއްދަ ނެތި ވޯޓް ކަރުދާހުގެ ގޮތުގައި ބެލެވިދާނެފަދަ އެއްޗެއް ތައްޔާރު ކުރުމަކީ ގާނޫނީ ކުށެއް
އިންތިހާބެއްގައި ބޭނުންކުރި ވޯޓު ކަރުދާސްތަކެއް
އިލެކްޝަންގެ ލޯގޯ ބޭނުންކޮށްގެން އާއްމުން ވޯޓް ކަރުދާސް ހެދުމަކީ ގާނޫނީ ކުށެއްކަމަށް އިލެކްޝަންސް ކޮމިޝަނުން ބުނެފިއެވެ.
އެ ކޮމިޝަނުން އާދިއްތަ ދުވަހު ނެރުނު ބަޔާނެއްގައި ބުނެފައިވަނީ، 23 ސެޕްޓެމްބަރުގައި ބޭއްވުމަށް ހަމަޖެހިފައިވާ ރިޔާސީ އިންތިޚާބާއި ގުޅިގެން އެ ކޮމިޝަނުގެ ލޯގޯ ބޭނުންކޮށްގެން ވޯޓް ކަރުދާހުގެ ގޮތުގައި ބެލެވިދާނެފަދަ އެއްޗެއް ތައްޔާރު ކުރެވި ސޯޝަލް މީޑިއާގައި ބޭނުންކުރަމުންދާކަން ފާހަގަކުރެވިފައިވާކަމަށެވެ.
އީސީން ބުނީ އިންތިޚާބުތަކާއި ބެހޭ ގާނޫނުގެ 74 ވަނަ މާއްދާގެ (ހ) ގެ 9 ވަނަ ނަމްބަރުގައިވާގޮތުންގެ މަތިން އެ ކޮމިޝަނުގެ ހުއްދަނެތި ވޯޓްކަރުދާސް އުފެއްދުން ނުވަތަ ވޯޓްކަރުދާހުގެ ގޮތުގައި އިންތިޚާބުގައި ބޭނުން ކުރެވިދާނެ އެއާއި އެއްފަދަ އެއްޗެއް އުފެއްދުން ނުވަތަ އެ މާއްދާގެ 13 ވަނަ ނަމްބަރުގައި ބަޔާންކޮށްފައިވާ ފަދައިން އިންތިޚާބުގައި ވޯޓްކަރުދާސް ހުންނާނެގޮތާއި މެދު އިލެކްޝަންސް ކޮމިޝަން ފިޔަވައި، އެއްވެސް ފަރާތަކުން އިއުލާނެއް ނުވަތަ އެއްވެސް ބާވަތެއްގެ އިޝްތިހާރެއް ކުރުމަކީ ގާނޫނީ ކުށެއްކަމަށެވެ.
ކޮމިޝަނުން އެފަދަ ބަޔާނެއް ނެރިފައިވާ ސޯޝަލް މީޑިއާގައި އެކި ކަހަލަ ވޯޓު ކަރުދާސްތައް އަންނަނީ ދައުރުކުރަމުންނެވެ. އަދި އެ ފަރާތްތަކުން ތާއީދު ކުރާ ފަރާތްތަކުގެ ނަމާއި ދިމާލުގައި ރަނގަޅު ފާހަގަޖައި، ތާއީދުކުރާކަން އަންނަނީ ހާމަވެސް ކުރަމުންނެވެ.
